KAN HMACHHAWN THEIH RENG HI I NGAIHVEN ANG U

Nikum (2020) chawhnu lam atang tawh khan United States, Brazil leh India te chuan SARS COV-2 (Covid-19) khawvel pumpuia darh ta, hrileng hluarna nasatna ber pakhatna atanga pathumna chu vawiin ni thleng an luah chho a. Tunah hian United States pakhatna niin, India in a hnung a zui mek a, Brazil chu pathumnaah a awm mek. United States hian pakhatna luah mahse, tunah tak chuan hrileng in a den nat ber chu India a ni ti ila kan sawi sual lovang.

India leh United States a Covid-19 hri a len dan hian inzul deuhna a nei a. June 2020 atanga April 2021 thleng data awm te chu, thla sawmpakhat chhunga thlatin ni 5 dan zel (April, 2021 thla tih loh – ni 4 dan a data awm te lak thlak niin) an test tihte, positive awm zat leh thi zat te atangin India leh United States-a hrileng a thlen danin nghawng a neihte leh, chu chuan India a kan tawrh mek hian hmathlir engtinnge min neihtir theih ang tih thlir han tum chhin dawn ila. Ni kar dan a statistics lak hi kan thuziah tur kan tehna tur a ni ang.

POSITIVE LEH TEST
Mithiam ten positive chu test neihzat in a hril (positive case is a factor of the number of tests) an tih angin June 2020 atang khan India leh United States ah thla tin a test neih zat leh Positive awmah, test neih tam ber ni zelah positive case an tam deuh ber ziah a. Chutih rual chuan positive case neih tamin Covid-19 avanga thihna a thlen tam ber chuang lo thung. United states in test an neih atanga positive an hmuh chhuah chu za zelah 3.9% (June ni 15, 2020) atanga in tanin an neih san ber chu January ni 5, 2021 kha niin, 14.3% a ni. Nikhat chhunga test an la lak hnem ber chu November ni 25, 2020 kha niin, nuai 19 (1,902,311) vel test an la a ni. January ni 20, 2021 kha nikhat thil thu a Covid-19 avanga mitthi an ngah ber ni a ni a, 4380 mitthi an nei.

India-ah chuan test kan neih atanga positive hmuh chhuah chu za zelah 1.6% (February ni 15, 2021) atanga in tanin kan neih san ber chu April ni 30, 2021 kha niin, 23.6% a ni. Nikhat chhunga test kan la lak hnem ber chu April ni 30, 2021 tho kha niin (he article ziah thleng chuan), nuai 17 (1,706,663) vel test lak a ni. April ni 28, 2021 kha nikhat thil thu a Covid-19 avanga mitthi kan ngah ber ni a ni a, 3645 kan nei.

COVID-19 AVANGA THIHNA
Covid-19 avanga thi ah hian, test lak hnem ni ah kher mitthi an tam phah chuang lova, mahse kan sawi tawh angin, test lak hnem ni ah chuan positive hmuhchhuah thar erawh an pung zel tangpui a ni. Test lak hnem poh leh positive hmuhchhuah thar an tam tihah hian, India chu 63.6% in a dik a, United states ah chuan 90.9% in a dik thung. 23.7% lai mai ‘positive case a factor of tests” tih kan inthlauhna nasa lutuk hian a chhan zawtna a siam lo theilo mahna. Tunah mai chuan a chhanna ka nei lo na chungin, a chhe ber ngaihtuahin, test kan lak atanga positive hmuhchhuah thar kan neih tlem zawkna hian mipui nawlpui hriat phak chiah loh a awm em tih zawhna a siam thei mai awm e. Engpawhnise, test lak hnem chhoh hun chhung apiangin Covid-19 avanga thi pawh an tam zel a ni tih erawh hai rual lohin a dik hle thung. United states ah chuan hrileng in a den vawrtawp an thlen lai, test pawh an lak hnem ber lai, November 2020 ni 15 atanga February Thla chhung kha han khaikhawm ta ila, ni khatah mi 2268.7 thi ang an ni. India ah chuan September 2020 khan 1158.4 ni tin a thi ang kan ni tih loh kha chu kum 2020 chhung khan nikhata thi zat chu 900 hnuai vek a ni. February 2021 ah khan nikhatah mi 99.1 mitthi nei ang kan ni a, March 2021 ah khan 197 a ni. April thla, kan vawrtawp tanah kha chuan 2175.3 ah a zuang ta dawr a ni. United States in an vawrtawp an thlen kha January 2021 kha kan ti thei anga, an vawrtawp thlen hun tur intan tirh November atang khan thi an neih a pung tial tial a ni. November, 2020 thlaah 1309 a ni a, December, 2020 ah 2397.7 a ni leh a, January ah kha chuan nikhata Covid-19 avanga thi an neihzat chu 2966.3 a ni.

Zawhna lian tak lo piang leh ta chu, tun April 2021 a India rama Covid-19 avanga mitthi kan neih February leh March atanga nasa tak maia a zuan dawrna hian, kan hmaah hrileng avang hian thim chhah tak hmachhawn tur thla hnih dang, a vawrtawp tak tak thleng turin kan la nei tihna nge ni anga, a hma atang daih tawh khan mipui nawlpuiin kan hriat loh tur inthup a lo awm reng tawh zawk? Chumi a nih leh lek phei chuan, hetia nasa tak mai a April thlaa a zuan dawrna hi thup sen loh rawn hnam chhuak chauh a la nih leh lek phei chuan, a manganthlak hle dawn a ni.

INRIN HMAN A NI EM?
Thlatin positive hmuhchhuah tharah hian, 2020 June atanga 2021 April thlengin United States ah leh Indiaah thla indawtin positive hmuhchhuah thar a tamna emaw a tlemna emaw a danglamna chu 2% atanga 3.5% velah a rin luh theih a. United States-a a danglamna san ber tum chu 2021 January (12%) atanga 2021 February (6.8%) a 5.2 % a a tlakhniam kha a ni. Indiaah chuan 2021 March thla (3.4%) atanga 2021 April thla (14.8%) a 11.4% a a tam thut kha a ni thung. Sawi tawh ang khan, mipui nawlpui hriat tur ni lem lo a awm nge sorkar inrelbawlna hi a chak tawklo hle nge, kan health system kan thuam chak tawk lohzia a rawn pholang tihte chu tum lawk pawh ni chuang lovin manganna ruam atang chuan ngaihtuah theih tak a ni mahna. He hri kan donaah hian a thawhhnihna atan hian kan inring hman ta lo pawh a ni thei bawk awm tho e.

A VAWRTAWP THLENG TURIN NI A CHHIAR EM NI?
United States ah chuan hrileng in na taka a den, an vawrtawp an thlen na kawng tihian thlir chhin ta ila. October 2020 ni 10 na vel atang khan intanin December ni 10, 2020 (ni 60 hnu) a thlen kha chuan Covid-19 nghawng an tuar na hle tawh a ni. Tawp ta mai lo chuan January thla ni 20, 2021 an thlen meuh kha chuan nikhat chhunga thi an neih leh test an lak atanga positive an hmuhchhuah san ber an hawlh a nih kha. A lan dan chuan, Covid-19 in a beih tak takna intantirh atangin a vawrtawp hmasa zawk thleng turin ni 60 vel a duh a, a hma aia nasa zawka nghawng turin ni 30-40 vel a ni leh pawh a tih theih awm e. Chutiang tho chu Indiaah hian kan hmabak tur lo ni ve ta se. 2021 April thla ni 30 a nuai li chuang positive kan neih mek tak leh ni 28 a nikhat chhunga Covid-19 avanga thi kan ngah ber ni, mi 3645 thih takna kar bawr hi a vawrtawp vawikhatna a la ni chauh thei mai engem? A nih palh hlauh chuan, 2021 May thla hi a huphurhawm dawn hle a ni. Mithiam ten May thla chu a hlauhawm hun tur leh mipuite kan fimkhur tawp a ngaih hun an sawi pawh a rinhlelhawm awm loh tan thei mai awm e.

Kan Covid statistic-a a lan danah chuan, United States anga zawi zawia rawn pung ta tial tial ang chu India rama kan tawn mek hluar dan chu a ni si lo. India ah hian engtikah chiah nge a vawrtawp thleng tur hian a intan tih chu chhui theih dan awm mahse, 2020 September atanga nuai chuang test kan neih kha tun kum 2021 January atang kha chuan nuai hnuai vek test a ni a. March thla tawp atang chauh khan nuai chuang test kan nei leh tan chauh a, ni 40 bawr vel chhungin a mak maka tam positive kan pung ta vak a nih hi maw! Chuvang chuan United States ang deuha, a ni bikim Covid-19 hian min nghawng dan kan chhiar dawn chuan tun April thla tawp kha a vawrtawp thleng anga sawi theih hi, a ni 40 velna chauh a ni dawn tihna a ni. Lo ni ta se, May thla laihawl vel hi a vawrtawp vawikhatna tur ang a la ni chauh dawn a, chumi aia nasa zawk a vawrtawp vawihnihna chu June thla laihawl atangin a rawn intan dawn tihna a ni dawn bawk a ni. Tunah pawh kan dinhmun chu a zualzapuivaihlenhlo an tih tluk a ni der tawh mai awm e. Mizoram bik hi kan population a tlem avangin kan vanneih phian thei a, kan inven uluk viau erawh a ngai hle dawn a ni. Covid-19 in a vawrtawp min thlenpui tur chu ni (days) min chhiarpui dawn anih chuan, a dawt leha kan ziah tur pawh hi a thleng lovang tih tun dinhmunah chuan hriathiam a har viau rih dawn a ni.

POPULATION ATANGA CHHUTNA
Kan ngaihtuahna tihian han kal bing tir lehzual ta ila. United States ah khan Covid-19 in a nghawng nasat ber lai khan an test neih kha India in test kan neih mekah hian nuai hnih dawnin a la pha lo a ni. Chutichung chuan positive kan neih danah erawh Indian in tunah hian nuai hnihin kan ngah zawk daih tawh a. A lehlamah chuan, Covid-19 avanga mitthi kan neihah erawh United States in nikhat chhunga thi an neihzat chu 700 dawnin kan la pha lo thung a ni. A lawmawm nge lawmawm loh chu thutlukna fiah vaklo pawha siam a ti har ta viau mai. 2021 April thla a kan exponential growth en hi chuan, United States in test an neih tam ber 1,902,311 (Indiaah 1,706,663) bawr vel test hi nei ta ila, 46,000 vel positive hmu belh thei dinhmunah kan awm dawn tihna a ni a. Nikhatah nuai li singnga nei thei dinhmunah kan awm ta reng pawh kan ti thei ang. Han thliar sin hretin, nuai khat zel la test lohah positive an ni tih inhre lem lo 23,000 vel kan awm mek tihna pawh a ni thei. A chhe ber ngaihtuahin, India population (1,391,478,400) atangin Covid-19 vaccine la tawh 8% chu 111,318,272 vel anga kan chhut chuan, kan population la bang zawng chu 1280,160,128 a ni anga, chhiarkawp atang chuan 294,446,000 vel chu test loh positive la hmuhchhuah loh, positive ni si kan ni dawn tihna a ni. Vaccine la tawh paih tawh hnu a India population atanga Mizoram population nuai sawmpakhat chu 0.086 % niin, Mizoram ah chuan nuaikhatah positive a ni tih in hre lo 1.978 a lu nunga awm ang a ni dawn a. Nuai sawmpakhatah chuan positive a ni tih inhre lo mi 21.758 kan awm dawn kan ti thei mai awm e.

INKAICHHAWN AWLSAM COVID-19
Mithiam ten Basic Reproduction Number an tih, he natna hri inkaichhawn theih dan (RO) an teh dan chuan, mi pakhatin midang pathum a kaichhawng vat thei a (RO= 3.8 pawh a ni thei an ti bawk a, chu chuan midang pali a kaichhawng thei tihna a ni). Nuai sawmpakhat vela mi 21 bawr vel lek chu a ho e mai kan ti pawh a ni mai thei. Mahse chhui theih miah loh hri paia, pu darhtu pakhat chauh pawhin ni 5-6 inkar lekah mi 33 dang a kai chhawng thei a ni. Mi 21 chuan midang 693 ni 5-6 chhungin a kaichhawng thei dawn tihna a ni. Hri kai hriat (positive a ni tih hriat), a kaina chhui theihah chuan a la ziaawm hle ang. Hri vei – positive – a ni tih inhre loah erawh chuan, amah ang bawk, inhre lo tam zawk khiti zat khi ni 5-6 chhung lekin a kaichhawng thei dawn tihna a ni a. Za a sawmnga atang chauh pawha chhutin, an vei a ni tih inhre bawk si lo, chhui theih loha awm bawk chu, an kai atanga ni 12 chhungin mi 11,435 lai an kaichhawng thei tihna a ni leh ta zel dawn a ni. Chutiang zelin ni 18 naah chuan nuai 4 dawnin kan inkaichhawng hman dawn tihna a ni. Kan health system te enin, kan medical manpower te enin a thlen palh vaih chuan a ho miah lovang.

DUHTAWK PHAWT ANG
Aw le, heta chhiarkawp (figure) ka han dah te hi khitiang diak diak khian a thleng dawn tihna ni lovin, kan fimkhur loh chuan kan rin phak baka nasa in Covid-19 hri hi a darh vak thei a ni. India ah nuai 17 vel kan test mek a, nuai 34 vel test nei thei ila chuan nikhata positive hmuhchhuah thar zat tur chu nuai 8 bawr vel a ni dawn tihna a nih theih angin, Mizoramah pawh hian kan test hi a rintlak loh ni lovin, tun ai hian test hnem ta ila, engzah chiah nge kan in hmuhchhuah belh zel dawn tih chu thlir ngam a ni lo mahna. Sorkar pawhin random test a tum chho mek ta reng a. Mahse Sorkar hmalak tum danah hian mimal remtihna chauhin kalpui a nih dawn avangin, vei palh ve reng thei kan ni tih inhriain keimahni tan leh kan chhungte, kan zavaia kan him tlan nan test nih (laksak) i hreh lovang u.

Kan hmachhawn theih reng kan hmaah a awm mek si a, sorkar pawhin theihtawpa a tan pawha hma a lak hleih theihloh hun kan thlen hma tak takin, mipuiin thuawih taka zawm tur te zawmin, a tul lovah chuan chhuak lova, kan him tlan zawk zel nan sorkar hmalaknate, LLTF hmalaknate kan tanpuina chu mahni intanpuina a tih hriain, tunah zet chuan kan ngaihven a hun lehzual tawh tak meuh meuh a ni.

Dr Zodinpuia Pachuau