TLAWNG CHHANTU AN PEN CHHUAK TA LUNGLEI ṬHALAI & CYMA

Auchhuakin penchhuak zel ang aw.

Project save Tlawng -

Lunglei ṭhalai pawl te chuan Tlawng lui, a bikin a hnar lam humhalh kawngah hmalakna mumal zawk neih ṭulin an hria a, 22nd April khan mumal zawka hmalak a nih theih nan Group an din ta hial a, Project Save Tlawng a lo piang ta!! Member 500 bawrin an zawm der tawh a ni. An zawm belh zel pawh a rinawm a, lo lian thur thur teh se.

He pawl hian ṭum eng­emaw zat tui harsatna chungchangah thuneitute lo hmu fo tawhin, Department te pawh an harsatna te enpuiin, thuneitu (sorkar) lam pawh an lo hmu fo tawh a, Tlawng fintu kawrte te enfiahin Sairep tlang thlengin an lo han kal tawh bawk.

He project hnuaia hma­lakna hmasa atan April ni 26, 2021 khan tlawng hnar leh a lui dunga tuikhuah(dam) awm te leh Tlawng hnar lama project hrang hrang awm te enfiah leh bawk a ni. He Project hian tum mumal tak neiin a theih angin an bawhzui mek bawk a ni.

1. Tlawng hnar humhalh pawimawh zia leh chumi atan a hmalak theih hrang hrang mipui te hnena hriattir.

2. Tlawng hnâr lama ramngaw ti chereu thei hrang hrang te enfiah leh titàwp tura hma lâk.

3. Lui dungah Check Dams siam a nih theihna tura hmalak.

4. Ramngaw chereu tawh siam ṭha leh tura hmalak leh ramngaw zau zawk neih theihna tura hmalak.

Hmalakna hmasa atan 1st May 2021 mai khan Planning Secretary hnenah proposal mumal tak an thehlut bawk. Lunglei ṭhalai pawl, in chhuanawm a, kal zel rawh u. Aizawl lam ṭhalai te pawh hian thilṭha tih kawngah entawnin hma kan la ve thei ngei ang. Nawr ngai, bawhzui, chhutzui ngai thuneitu a awm theih avangin kan lui chhanchhuah nan su kaw zel ang che u.

CYMA an che dawn e!

Kan hriattur chu Mizoram lui lian 16 kamtuak te Riverine Forest Reserved Area atan 1965 kum khan Section 21 of the Mizo District (Forest) Act, 1955 hnuaiah puan a ni a, he dan hi Gauhati High Court, Aizawl Bench chuan kumin 27th Jan khan ṭhiahna Order a chhuah ta a ni.

Mizoram Sorkar chuan he luikam humhalh ṭhiahna Order hi Court sang zawka khin let a tum lova, lui humhalh ngai tho si a a hriat avangin Executive Order a chhuah ve thawr ringawt a ta a ni. Central YMA Executive Committee chuan court thuneitu sang zawka zualko a nih ngei theih nan sawrkarah thlen nise tiin an rel ta a, tunkar hian sorkar hnenah Appeal anih theih nan thlen an tum dawn tih an sawi.

Ṭawngka chuan sorkar hotute an hriattir tawh tih an sawi bawk.

High Court thutlukna chhuah tirhin Chief Minister hnenah appeal tura rawtna an thlen tawh thu an sawi a, amaherawhchu CM in appeal an tum loh thu leh Riverine Reserved Forest a nih chhung chuan Ministry of Forest, Govt of India an thu dawn avangin appeal lo a Executive Order hmanga Sorkarin humhalh zawk an tum tih Central YMA hruai­tute chuan an sawi bawk.

CYMA hmalakna hi bulṭanna dik tak a ni. Kan luidung te hi humhalh tumin NGO leh pawl hrang hrangte nen thingphun beihpui thlak tum ngawt ila, hei Sorkar pawhin Executive Order a chhuah a lawm ti ve ngawt mah ila, lui kama ram neituten High Court Order min lo pharh khum a, an rama ngaihah thingphun emaw lui humhalh nana hmalak emaw an lo rem ti tlat lo a nih chuan phur hurh theih pawh a ni lovang.

Kan luidung humhalhna tura ke pen mek te i thlawp zel ang u hmiang.

David Sailo