Kangṭhelh motor tlem leh Police officer motor
Tun hnaia Vanglaini lama Editorial leh article-a ziaktu pakhatin a rawn ziah kan hmuh pahnih hi kan siam rem chuan Mizoramah hian Fire Service lamin motor an neih belh theih dan awlsam tak a lo lang a ni. Police officer zingah motor pakhat aia tam kawl engemaw zat an awm thu kan chhiar tawh a, chumi hnuah Lungleia kangmei a chhuah kha kangṭhelh motor pahnih chiah Lunglei khawpuiah a awm thu kan hmu leh a, Home Department hnuaia awm an nih ve ve avang hian awlsam tak in a siam rem theih tih a lang a ni.
Police officer zingah hian mipui nawlpui hriat miah loh hian sorkar motor pahnih kawl hi eng emawzat an lo awm reng hi a lo ni a, chu chu tun hnaia an kawl thar thut pawh ni lovin tun hma aṭang tawhin Police officer lian chin hian motor pahnih hi an lo enjoy ṭhin niin kan ṭhian pakhat thil hre deuh chuan a sawi. Battalion Headquarters lama an Commandant tin hian motor pahnih hi an kawl tlangpui a, chu bakah chuan an Battalion chhunga lirthei enkawltu an nih tel bawk avangin a fair lo deuh chuan Police motor lian hmangin in an sa a, thlam an sa a, Police truck, 407 motor ang chi leh tuichawina motor te hi an private hman hmiah hmiah a ni awm a.
MPS senior tak pakhat chuan tun hma deuhva in a sak laiin a in satu Police te phur khawmtu atan an Battalion bus hi zing tin a hmang tawp mai a, police hnathawk tura a chhawr te chuan City Bus Stand a awm ang hian an lo chang tawp ṭhin an ti. Police officer lianin motor pahnih an kawl fur laia kangṭhelh motor tlem lutuk hi thil inbuk tawk lo a nih avangin Home Department aṭang hian siam rem theih a ni ang.
Tunah hian Police officer motor hi chhuh sak ṭhenin kangṭhelh motor ah chan tir theih a ni tawh lova, mahse motor lei tura ti a nih leh hunah Police officer motor Compact SUV leh luxry car ang chi hi chu lei belh tawh lo se, a awm sa hi officer ṭhenkhat nupuite chan pual a ni mai mai an ti si a, chu ai chuan a pawisa hian kangṭhelh motor lei mai ta se la a ṭha lo maw? Kangṭhelh motor hi a man a tova, car pathum lei aiah pakhat pawh lei se Zoram chuan a la ṭhat pui zawk dawn tho tho a ni.
Mizorama police lal tak chin hian motor pahnih an kawl zel hi thil ṭul ber a ni bik lova, mamawha pawh theih chu Department hian nei tho se, 'one car for one officer' tih policy te hi awm thei se chu Home Department lama budget dah belh kher si lo hian Kangṭhelh motor pawh kan neih belh thei ve tawh ang.
JK Lalthanzama