TUI DAHKHÂWL A PAWIMAWH
Khatia ram hla tak a harsatna tâwk, ka chhungte pui tura ka zuk kal khân lawmna tur tam tak ka tawngin hmasawnna atana pawimawh tak tak ka zuk chhar chhuak a. Tunlai hriin kan chhungkuaah ro a rel avangin, Kolkata-a Mizo Welfare-te leh Sorkar lama kan hotute'n min ngaihtuahin kan tibuai tam hle mai. Mizoram House a awm kan Mizo puite lah an lo felin an lo hawihhawm nasa mai si. Hripui lêng karah ngaihsakna ṭhami tinrêng nên kan Mizo puite'n Ka Pi ruang Zorama a thlen theih nân min buaipui a, buai tak leh hmanhmawh taka kal kan nih avang khân an zingah lawmthû pawh kan sawi mumal ta lo kha a ni a. He ka thuziak hi min buaipuitu zawng zawngte'n an lo chhiara an lo hmu ve mial a nih chuan thinlung takin kan lâwm tak zet a ni tih min lo pawmsak se ka va ti êm.
Chutia ram hla tak aṭanga kan lo haw lai chuan Mizoram chhim lam (kan khua leh a chhehvel) ah ram a kâng nasa hle tih thawmte kan lo hria a. Thingkung pakhat a ṭangkâizia leh phun nung tur leh puitling tura hun a duh reizia hretu tân chuan kan ram a kâng chhe duâi duâi tih hriat khan, a takah hmu lo mah ila rilru a lo nâ ngawih ngawih a. Kan tlawmngâi pawl, Zofate ṭangruala kangṭhelha an buai thu han hriat khan hnuk a tiulh hle mai.
Chhim lamin meipui kan tawrh mek laiin ṭhenkhat Sorkar dan zawm lova an thuhril, dodal avanga chhim lama meipui chhuakah an lo sawi a. A ṭhenin Social Media ah fiamthu thawh nân ka ti dawn nge indiriamna thu an lo chhakchhuak mêk bawk a. Zeldinnain thil thui tak a kalpui theih a, rilru sukthlek dik loh avanga kalsualna nasa tak thleng thei a awm bawk. Hun ṭha kan neih laia Pathian zahngaihna kan chan theih nâna dil leh ṭawngṭai hun a awm a. Chu hun ṭha kan neih lai chuan thilmak buaipui aiin zahngaihna kan chan theih nan dil hi a ṭha zawk awm e. Tuna kan hun tawn chhoh mêkah hian ringtu mipuite hian Pathian Zahngaihna nasa lehzuala kan dil a, Pathian lam kan hawi hi a ṭul hle a. Covid hrileng avanga Sorkarin dân a siam ngaipawimawh a, thuawihna nen kan ram hi Pathian tan kan hlan a pawimawh tak zet a ni.
Chhim lam ram kâng avanga fiamthu thawh nana lo hmang duh pawl an awm kha a mak ka ti hran lova, chutihrualin ngaihtuahna erawh a tithui ṭhin mang e. He hnam tlem te, India Hmarchhak kilkhawra inhnawhkhawm ve laih laih hian kan ram chhung zim teah hian fiamthu chunglam hreta kan han inchhawnchhaih ṭhin hi chu ram tlukchhiatna, intihbingna, inthliarnate hi min thlen mai hun a herchhuak lo ang tih pawh a sawi theih loh. A bik takin Aizawl leh Lunglei hi Mizorama khaw hmasa an nih angin mihring pawh an lo tam ta a. Hmanlai pipute hun aṭang tawha khaw lian pahnih an nih angin kawng eng emaw zawng tak chuan inelna ṭha chu an nei chho ṭhîn ngêi ang. Kan tunlai hunah erawh inelna mai ni lo, inerna thinlung pu mi kan awmin a lang a, hei hi a pawi in, indiriamna thinlung kan put ṭhin hi sim a ṭha khawp mai.
Ni zasawmnga chuang teh meuh ruah kan dawn loh avangin chhim lamin tui kan harsa chho êm êm. Chuta karah Kan ram ro tak mai chu kângmeiin nasa takin a suasam zui a ni a. Lungleia haw chakawm loh raih khawpin min siamin min tihnual viau mai. Mahse, harsatna kan tawh avang hian indawmkun ringawt ila, harsat lehzualnain min nang dawn. Heng harsatna hmachhawn tur hian Chhim mipuite kan huaisen ve tawk a, chu kan huaisenna chu kan hma fûr khua a lo herchhuah hun hian thiltihin kan lantir theih ngei ka beisei a. He kan thil tawn hi Zoram nuam siam tura thingphun uar deuh deuh tûra kan inzirtirna hmanrua atân pawh a pawimawh hle a ni.
He ṭhal khawro tak avanga tui harsatna lo thleng zel hi, sik leh sa her danglam vang leh a enkawltu tur mihringte'n kan khawvel kan hmangaih dânah a tilang chiang êm êm a. Lunglei mai ni lo Zawlkhawpui leh kan Zoram hmun hrang hrangah tui harsatnate pawh a la thleng chho dâwn chauh a. Chuvangin tui dahkhâwlna kawngah te pawh Zofate kan ṭhanharh a, kan thingtlang unaute'n Zotuithiang dâwna an tlân ang tlukpui hi kan neih zel theih nan Tui dahkhâwlna lama hmalak kan inzirtir chhoh zelte pawh a pawimawh hle a ni.
Address:
Jerome Zoremsanga
Bazarveng, Lunglei
Ph no: 9862541301
Jemato of Leitlangpui