RAM LEH MIPUI RAWNGBAWLTU KEJRIWAL, DELHI C.M

Kum 2015 hma kha chuan India ram State Chief Minister hna thawk ṭha leh ram pum hriat Tripura C.M Manik Sarkar te, Bihar C.M Nitish Kumar te an lar hle a. Delhi C.M Kejriwal a rawn lan ve hnu hi chuan India ram mai ni lo khawvêl deng chhuak khawpa India ram khawpui ber New Delhi kawng tinrenga hmel danglama a siam dan hi State dang CM leh hruaitute tân entawn tlak a nih vangin sawi fo loh theih a ni lo, a hnathawh dan leh thil tih dan kimchang taka sawi tur chuan lehkhabua siam tham a ni.

Electric leh tui-a Delhi khawpui harsatna a sut kian dan kan sawi tawh bakah mipui tana a luan chhuahna dang sawi leh ta ila. Pu Kejriwal-a hian a lo intiam tawh angin, a sorkar aṭangin Delhi sorkar bus service zawng zawngah hmeichhiate tan chuan man a awl (free) vek a. BJP leh Congress hruaitute chuan Kejriwala thil tih dan hi nasa taka sawisêlin, mipuite hnena a thlawna thil sem tam lutuk chuan thatchhiatna leh vote leina a ni tiin an sawisel a. Pu Kejriwal-a’n BJP leh Congress hotute a chhan let dan chu, “Vijay Rupani, Gujarat C.M (BJP)-in ama mimal hman tur thlawhtheihna cheng vaibelchhe 190 chuang man a lei a, chutiang lei ve lova Delhi hmeichhiate'n a thlawna bus an chuan theihna tur leh unit 200 chin electric leh litre 20000 chin tui hmangtute hnena a thlawna kan pe thei hi a sualna eng nge awm?” tiin.

Hei bakah zirna chawisan kawngah hna ropui taka thawk a, private school aia dinhmun ṭha zawka sorkar school an hlangkai ang chiahin hriselna kawnga an hnathawh hi a ropui em em bawk. India ram hmun dang leh Mizoram ang bawkin Delhi-ah pawh sorkar doctor-ten, an hna aiin an mimal clinic an dah pawimawh a, damdawi sem tur an kawl ngai lo bawk. Mipui pawhin sorkar damdawi in aiin private damdawi in an pan zawk ṭhin. Pu Kejriwal-a a C.M aṭangin doctor inthlahdah ngam an awm lo, a hun takah damdawi in an thlen a ngai a, damlo mamawh tur damdawi pawh a thlawn veka damlo pek turin damdawi inah a dahtir vek bawk. C.M-in damdawi in hrang hrangah surprise visit a nei ṭhin a, thil diklo a hmuhin na takin action a la ṭhin. Delhi sorkar damdawi inte chuan kâr lovah hmel thar hmu theiin an awm ta a ni, inentir man leh damdawi in awm man zawng zawng a thlawn vek a nih bakah natna khirh tak tak enkawl leh zai nana cheng nuai sawm aia tamah pawh Delhi mipuite tan a thlawn vekin a kalpui a ni.

Private damdawi in hi a ensan chuang lo va, damlote tân ṭanpuina leh malsawmna rilru pu lova sum siam nan chauhva private damdawi in dintute tan chuan a tawrhhlehawm hle, kum 2020 November-ah khan Delhi khawpuia private hospital changtlung tak Max Super Speciality hian a thlawna mi retheite enkawlna tur bituk zat a enkawl duh loh avang leh mipuite hamṭhatna tura a sorkar nena an inremsiamna a tihhlawhtlin loh avangin an licence a cancel-sak hmak a ni.

Hetia damdawi in a khar rup hian sawisel a tawk nasa hle a, private hospital neitu ṭangrual aiawhte leh India rama doctor insuihkhawm pawl hrang hrangin Pu Kejriwal-a chu an beih rawn nasa hle a. BJP leh Congress party pawhin sawisel nan tak an hmang a, Pu Kejriwal-a’n a chhan lêtna thu chu hetiang hi a ni, “Sorkar nena kan inremsiamna anga tihlawhtling duh lo leh inthlahdah avanga damloin a tawrhna damdawiin licence ka cancel-sak a, chu kan thil tih avang chuan doctor rual leh mi thiltithei leh BJP party te chuan private hospital ṭan zawngin nasa takin min bei a, hetianga hnathawk ṭha duh lo leh inthlahdah avanga mi nung reng mitthi anga puangtu leh mipui rawngbawlna aia sum hmu lian zawkte licence hi cancel a ni a, damdawi in dang pawh chutiang an awm a nih chuan an licence kan cancel zel ang, ka sorkar hi Delhi mipuite tana ṭha ber tur ang zelin kan kal ang. BJP party angin ti duh ila chu damdawi in licence hi ka cancel lovang a, damdawi in thuneitute'n lawmthu sawi nan vaibelchhe tam tak min pe ang, mahse, chu chu kei leh ka party-in kan ti duh lova, ti duh ni ila ka nu leh pa, ka nupui leh ka fate eng tin nge ka hmuh ngam ang,” tiin a sawi. Hei hian Pu Kejriwal-a nu leh pa leh a nupui leh fate rilru put zia a tilang chiang hle bawk, chhungkaw entawn tlak an va ni tehlul em.

Kum 2014 inthlan dawn khan Pu Kejriwal-a party AAP hian an manifesto-ah thutiam tam tak Delhi mipuite an tiam ve a, thlantlin an ni a, an intiamna ang ngei chuan an manifesto za-ah za deuhthaw an tihlawhtling a, kum 2020 inthlan dawnah erawh chuan “Kum 5 liam taa kan hnathawh kha ṭha in tih chuan min vote ula, in tih loh chuan min vote duh suh u,” tiin mipui hnenah a campaign ngat ngam a, mipuiin an duh a ni tih lantirin seat 70-ah 62 lain Kejriwal-a leh a hote chuan hnehna an chang leh ta a ni.

Pu Kejriwal-a hi ram leh mipui rawngbawltu dik tak chu a ni.

M.C. Lalrinthanga