Chief Minister ni ila chuan

Tun hma kum sawmthum emaw tal khan Chief Minister lo ni ta ila, kan ram dinhmun chu hetiang hi a ni tawh ang. Hetianga kan awm theih tur chhan chu PAWISA A HMAN LOHNA TURA HMANG LOVA, A HMANNA TUR TAKA KAN HMAN vang a ni ang.

1. Tuiina a châwm theih ram zâwl ṭha zawng zawng chu leilet leh thlai chin nan kan hmang ang a. Ihê lovin EI LEH BARAH KAN INTODELH var var tawh ang.

2. Hetiang tih nana hman bâk ram ṭha la awm te chu suma chantir theih (cash/commercial crops) thlai leh thei chin nan kan hmang ang.

3. Hetianga kan tih chuan kan thingtlang unaute chu anmahni awmna khua ṭheuha EIZAWNNA NGHET nei an ni ang.

4. Chutianga an awm chuan anmahni khua ṭheuhah Pathianin a anpuia a siamte an nih avanga ZAHAWMNA an neih humhalhin an pian leh murna khua an ngainat em em-ah an ṭhenrual ṭhate nen lungawi takin an chêng ang a; pi leh pute huna ZONUNMAWI dik tak kha an nunpui leh ang.

5. Chuti a nih chuan inhlawhfa chawp tura Aizawl leh khawpui dangte-a lo pêm duh an awm lo vang a. Aizawl khawpui hi a tira an lo ruahman anga mi singsarih/singriat vel awmna a ni ang a. Tui indaih loh leh kawlphetha indaih loh a awm lo ang a; Traffic Problem pawh a awm lo vang. Chin ṭha lo, Drug, Zu, HIV/AIDS tituten zalen taka an khawsak theihna a ni lo vang.

6. Kuthnathawktuten leilet leh huan nghet siam nana an ram hman chu kan ram hmun za-a ṭhena hmun sawmli (40%) vel a ni ang a. A bâk chu thingzai (timber) leh ramngaw hausakna dang sum lakluhna ṭha tak awmna hmun a ni ang a. Supreme Court Order — WP (C) No.202/1995 of 12/12/1996 angin ramngaw hausakna awmze neia chhawr ṭangkai turin Working Plan siam chu tihmakmawh leh tih hmasaka neih a ni ang. Kan ram hi ramhmul damdawi atana hman theih hnimhnah tamna ber pawl a nih hriain, chu chu sum lakluhna ṭha ber pakhata neih a ni ang.

7. Kan ram ṭheuhte chu neitu kan nihna ngeiin ṭha takin kan enkawl ang a. Ramngawte chu sawrkarin ṭha takin a enkawl bawk ang a. Tun hma zawng aiin tuihna te kan nei ṭha leh ang a. Kangmei pawh a chhuak zen zen lo vang. Kuthlei vanga ram tikang an awm chuan anmahni leh mi dangte pawhin an tih leh ngai miah tawh loh khawpa nâin hremna kan pe ang. Dan bawhchhetu chu Party worker a ni emaw, makpa monu a ni emaw ngaihhnathiamna awm miah lova hrem zel a ni ang.

8. Power Project te chu manṭang ei ching kan awm ve dawn loh avangin, Construction stage, Compensation stage tih angrenga ei ral an ni lo vang a. Kan hman khawp na na na chu hnianghnar takin kan nei ang a. Awlsam takin Paper Mills kan din ang a, kan sum hnar ṭha tak a ni ang. Siamtuina kan ram leilung, sik leh sa mila min pêkte hi lawm takin kan hmang ṭangkai ang a, Foreign Mau/Rua tih angreng chu sawirîk pawh a ni ngai tawh lo vang.

9. Thil tih tur apiang chu ṭha taka tih ṭhin a ni ang a. Tum anga tih theih lohte a awm a nih chuan a chhan dik tak sawi a ni mai ang a, dawtsawina remchanga hman a ni ngai lo vang.

10. Rinawmna, Dikna, Taihmakna leh Huaisenna chu kan thupui a ni ang a. Thatchhiat Theology leh A Thlawna Thilpek Kalphung te chu thlan khur thûk taka phum bo an ni tawh ang.

Central Sawrkar aṭanga pawisa kan dawn hi a hmanna tur takah hmang ila chuan khing kan sawi zawng zawng khi kan neiin kan nihna a ni vek tawh ang. Chuti chung pawha chawmhlawm titiha kan la awm rengna chhan chu ram leh hnam aia mahni inhmangaih zawk hruaitu inti kan neih zawm zut vang a ni. He thuziaktu hi chu pawisa a hmanna tur taka hmang ṭhin a nih avangin leh dan bawhchhetute chu an phû tâwk hremna pe zêl ṭhin a nih avangin hetiang thu hi huai takin a rawn sawi ngam a ni e.

Hetiang hruaitute hi ram leh hnam tana suamhmang rukru aia ram leh hnam pawisawitu an ni a. Hlawh nei lova PENSION-a kal hlentir tur an ni.

M. Lalmanzuala