Pu Lalduhoma thihna hnehin a tho

Khawvel sual tlan turin Lal Isua a lo kal a, lehkha ziaktute leh Farisai hote thil tih dik loh huai takin a sawisel a. Amah chu huain, 'Isua hian kan Juda dan a bawhchhia a ni,' tiin Pilata hnenah an hêk a. Chu avang chuan Isua chu Kraws-ah khengbetin, an tihlum ta a nih kha. Lal Isua'n, Misualte kutah mantirin ka awm ang a, Kraws-ah khenbeha awmin, ni thum ni-ah ka tho leh ang," a tih avangin Juda ho khan a thawh leh tak tak an hlau a, a thlan an ventir a nih kha. Mahse, thihnain a chelh theih loh Pathian Fapa chu a tho leh ta si!

Chutiang deuh chuan Pu Lalduhoma hian Mizoram retheihna lak ata min chhan chhuak turin 'Kalphung Thar' a ngai a ni tiin a thawhpuiten nen ke an rawn pên chhuak ta a. Kan CM zahawm tak Pu Zoramthanga leh a thawhpuite thil tih dik lo chu rorelna hmunah sawiin, siamṭha a ti ṭhin a. Chu chu huain Speaker hnenah Pu Duhoma, ZPM MLA ni mek chu India dan a bawhchhia tiin CM Pu Zoramthanga zirtir mi 12-te chuan an hêk ta a.

Speaker Pu Lalrinliana Sailo chuan ngaihtuahin, thiam lohna nei hauh lo chu thiam loh chantirin, MLA a nihna ata bànin, a hnawtchhuak ta a. An khengbet ta a nih kha. Pu Lalduhoma khan ban a nih khan amah beitute bei let loin, "Ka bial mipuite court-ah ka kal ang a, anmahni zarah he rorelna hmunah hian ka lo kir leh dawn a ni," tih a sawi a.

Serchhip bial chuan by-election an hmachhawn a ngai ta. Mipui zarah MLA a nih leh tur thu Pu Duhoma'n a sawi avang khan CM Pu Zortamthanga chuan a khawnbâwl upa ho leh sipai ṭha commando rual chu iptepui puar nelh nawlh ahtirin thlân veng turin a tir chho ta a.

Mahse, Lalpa'n Serchhip mipuite hmangin DIKNA chu a tungding leh ta si. MLA ni leh tur leh Kalphung Thar policy tihlawhtling turin hnehna ropui a chantir leh ta a ni. He hnehna hi ZPM party bil chanka ni mai loin, Pathian ropuina leh hnehna lantirna a ni zawk.

Serchhip by-election result hian Mizoram politics-ah rahbi thar lawmawm tak a thlen a, chungte chu:

1. Tun hma aṭanga party ruihchilh avanga kan bansan theih loh mi ṭha kan thlan theih lohnate kan bansan ngam.

2. Sum hmanga inleina, tun thleng pawha sawrkar laipui pawhin a buaipui em em chuan awmzia a nei lo, mipuiin an hnâwl ngam.

3. Ruling party nih vanga development hmanga inthlêmna leh invauna a hlawhchham.

4. Ṭhangtharte rilruah party ruihchilhna lam kalsanin, ram siamṭhat tumna lamah huaisen takin an vote ngam.

5. MPF ten Mizoram politics kal dik lo siamṭhat tumna uhn eng emaw aṭanga min zirtir leh kaihhruaina tihhlawhtlinin a awm mek a. Pathian mite ṭawngṭaina tihhlawhtlinin a awm bawk.

A tawp berah chuan, Serchhip bial mipuite'n party ruihchilh lova a chunga kan tarlante tihlawhtlinga vote an thlak ngam hi a lawmawm tak zet a ni.

H. Sangliana, Bethlehem Vengthlang