Khawkhen kum pawh pawisa lo tûrin hma i la ang u

Tui 'tawmbûk' kan han tichhe zêl hi chu aw! Thing leh mau tihchereu tluk zeta ṭha lo lung lâk leh tui hnâra insak leh vûng chhuah vak vak hi kan tihtâwp a ṭûl ta. Loh theih loh ang chi entîr nân, Kawngpui sial etc. chu thu hran.

Tûn bâk hi chu tui hnâr tibawrhbâng zâwngin khaw tin hian hma la tawh lo ang u. Hmasâwnna lam thil kan tih dâwn rêng rêngin, tui hnâr a tichhe dâwn em tih hi ngaihtuah hmasa ber fo tawh ang u.

Ṭhangtharte hmakhua kan ngai a nih chuan, tui hna humhalh hi hna tûl ber (top priority) a ni e.

PHE Department hian khawl man to tak tak hmangin mipui in atân tui a pump ṭhin a. Tui ber a awm loh chuan khawlte hi hluihlawnah an chang mai ang tih hlauhthawn awm khawpin kan luipui, a tlântu nei ngah ber Tlawng meuh pawh a kâm lutuk tawh a, Aizawla khâwl pakhat (Phase-I) pawh chawlhtir hial a ni.

Chutih laiin Lung­lei-ah pawh nileng pump daih tui a awm lo. Ni khatah darkar 10 pump daih a awm hram hram a ni. Khaw ṭhenkhatah phei chuan tui pump tûr a awm lo hial mai.

Heng tarlan tlemte aṭang hian tui hna a lo pun lehzual theih nân kan thiam ang angin hmalak nghal a ngai tih ta. Ruah sur hmaa hma lo lâk lâwk chi leh ruah sur hnûa hma lâk dân tûr chi hrang hrang a awm ṭeuh va. Tun a pang hian hma i la nghâl ang u khai.

Ram tichhe zawnga hma latûte lakah tun aia khawnga kal pawh a ṭul ta.

Tin, Lui dung tina tui luang chak lutuk tûr vengtu 'Lung' te hi lak sawn loh nise, lui tin leh kawr tinte hetiang kawng hian i humhalh tel bawk ang u.

Hawh u, Mizoram hi ram nuam a lo nih leh theih nan i dinthar leh ang u.

Ngêntluanga