MNF SORKAR VEHBUR KHAWN SORKAR

MNF sorkar chuan sum renchem a tum loh avang leh sum neih sa a enkawl thiam loh luat avangin an sorkar term khat chhungin sorkar hnathawkte hlawh a ṭum hnihna atan puksak a leh dawn ta hi a lungchhiat thlak takzet a ni.

MNF sorkar hian engkimah chhuanlam atan Hripui a hmang vek a, Hripui vangin sorkarin sum a harsa, hmasawnna hna a thawhtheih loh, in dem hun a ni lo, tanrual hun a ni, tih hi ruling MLA ten Assembly ah an pu ber hovin an sawi chhunzawm zat a ni ber. Mipui te pawhin he thu mangkhawng hi rilru thianghlim takin kan zawm a, mimal, Kohhran, sorkar hnathawk leh NGO thlengin nau sawngnawi ang maia awmhmuna ka lo an chiah hnaa nei sorkar chu Chaw kan fah a ni ber.

A nihna takah chuan Hripui avang hian Kawngchhawng pawh kan neih loh phah han ti ngawt dawn ila, kan hmalak hnua hma la, kawngchhawng siamna tur hmun kawk kual lem lo State dang zawng zawng chuan nikum khan hmalakna tura an ruahman te an hlen vek thei tho mai a. Nikuma Delhi sirkar pawhin Traffic Jam tih zia awmna tura Seelampur-Shastri Park flyover pui lutuk an dawh te pawh nikum tho October 24 khan an hawng leh der tawh. Chutiangin kan kawmthlang lawk Assam sorkarin Guwahati-ah Ganeshguri flyover March 6, 2019 atanga hma an lak tan chu October 22, 2020 Ningani khan an hawng leh tawh a, lirthei an tlan leh zur zur tawh. Traffice Jam (TJ) awm lohna khawpui awmchhun nih chaka kan thawk dep dep laiin Aizawl khawpui pawn, Traffic Jam reng reng awm ve lohna hmun Lengpui Airport lamah Kawngchhawng chu dawh tur a lo ni zawk leh si a ni awm e. Kan beisei ber kawngchhawng a taka kan hmuh hnain Ropeway, Cable Car, tunah Aizawl khawpui hnuai leiverh min tih san leh tawh a. Mi fate hmalakna hi keini tan chuan vana rah ang, engtikah mah kan neih ve loh tur tih ang mai a ni zo.

MNF sorkar hian sum harsatna hi Covid19 vang a ni tiin mipuiah thiamchan hi a tum lian tak niin a lang bawk. Tin, MNF sorkarin an sawi anga hripui leng avanga sum harsatna a thleng a nih pawhin sum neih sa renchem erawh a tum chuang loa, a pawisa chuang lo tih erawh a chiang em em thung.

MLA 12 in ram tana an thawhpui, mipuiin an thlan MLA an hek a, an paihthlak avanga inthlan nawn a ngaih phah a. He bye-election avang ringawt pawh hian engzat tak hmasawnna hnathawhna tur sorkar sum hi luangral ang maw. Hemi te chauhah pawh hian sum ren lam hi MNF sorkar hian an hawi loa, an pawisa lo tih hi a chiang nghal em em a ni.

Hripui avangin ram mipuiin harsatna lian tak kan tuar a, sorkar meuhin sum a harsat a, pawisa a khawn laiin mipui phur tirit zual turin Power hman man MNF Sorkarin 41.92% a tihsan a rawt a, he rawtna ang hian tlang se chu eng hman man hi unit 1 ah Rs 8.26 a ni ang.

Tuna kan Chief Minister in Election laia an tihtura a sawi, sorkar tuk lawka a kawh kual, India ram khawpui zingah Aizawl khawpui chu Traffic Jam (TJ) tih rehna tur kawngchhawng tihpuitlin tum ta lovin, kawngchhawng hawisanin Febuary ni 6, 2019-ah sum tam tak senralna tur, engti kawng maha Traffic Jam reh phahna ni miah lo tur, mi hausa te hausak belhna tur leh duhsak zawngte a vur belhna Parking House Support Scheme (PAHOSS) a tlangzarh daih a. He PAHOSS atan hian State sum 2019-2020 ah Vbch 60 leh 2020-2021 ah Vbch 10 10 senral a ni tawh a ni.

MNF Sorkar hian sum a ren loh zia leh mipui a pawisak loh zia chu MLA hlawh a tih pun nghal atang pawh hian a chiang awm e. He hlawh tihpun hian mipui pawm a hlawh lo hle a. Mahse mipuiin tihtheih an nei tlem hle. MLA hlawh tihpun chungchang dodaltu awmchhun ZPM thlawp MLA te lahin hlawh tihpun chu dodal siin a pung erawh an lak vek bakah an 2018 MLA election Campaign laia MLA Car leina senso tam, mipui phur a rit, keini chuan kan do dawn, kan ti hniam dawn titute pawhin Car leina tur nuai 8 atanga nuai 2-a an tihpun nuai 10 chu hlim leh phur takin an la vek bawk a, Car manto tak tak an nei vek bawk. Hei hi em ni mipuia an in zawrhna kalphung thar chu ni ta le? Kalphung thar mipuia zuartute hian an duh an hmuh meuh chuan pawisak an lo nei chuang hlek lo niin a lang.

Sorkar kal tawhten an tih ngai miah loh MNF sorkarin hautak zeta mipui sum kalralna tur phuahchawp takin board thar 14 a din ngawt a. Board pakhat-ah Staffs 4 zel an awm a. Board Vice Chairman in Rs. 40, 000/-, LDC pahnihin Rs. 34, 575/-, IV Grade pahnihin Rs. 25, 290/- an hlawh. Board pakhat enkawl nan thlatin Rs. 159, 730/- sen ral ziah a ni a, Board 14 enkawlna atan thlatin Rs. 2, 236, 220/- sen niin, kum khatah heng board phuahchawp tak 14 te enkawl nan hian Mizoram mipui sum Rs. 26, 834, 640/- teh meuh Mizoram mipui sum a luangral ziah ni tihna a ni. Sorkar hian sum a haraa takmeuh a nih chuan heng a tel lova awm theih, thlatin leh kum khat chhunga sorkar sum tam tak kal ralna board phuahchawp tak te, duhsak zawng rih vanga ram leh hnam tana hmasawnna ni pawh lang lo CM adviser ruat belh chawp te hi a thiat vek ngam tur a ni ang.

Tin, sorkar flagship Mau chi supply na atan cheng Nuaih 90 dah hran a ni bawk a, a supply tu tur (mipui rin lawk sa) pawh thlan fel a nih tawh nghe nghe a. Kan ram mau te hnualsuat meuha sorkarin a buaipui Mau chin hi mi 'Monu damlo' tih vel mai mai vangin a zuihral em lo vang chu maw.

MNF sorkar sum ren lih zia leh enkawl thiam lo zia chu hlawh tam tak la sa reng officer te chu an mamawh miah loh Laptop a lei sak ringawt bawk. Kha latop kha eng ang takin nge an hman tangkai zui tih te, laptop annneih hnu khan sorkar hmalakna a chak sawt em tihte hi sawi kher loh phei chuan mipuite hian kan hre lo chhiava a ni.

MNF sorkar sum enkawl thiam loh zarah tunah hian RBI atangin sum leh pai kan puk phah ta reng a, nikum 2020 chhung khan MNF sorkar hian Reserve Bank of India (RBI) aṭangin tum 10 chuang vaibelchhe zahnih chuang fe sum a puk hman leh tawh bawk. Hetiang a nih avang hian kan sorkar hi rei a kal reng theih a rinawm loh tih mithiamten an lo sawi lawk sa tawh a. Sum leh pai enkawl thiam loh vanga leiba tam tak kan neih belh leh tak nghek hnu hian sorkar hnathawkte hlawh puk leh phuahchawp taka vehbur khawn, in chawi tir tih vel hi chu Mizoram hian kan la hmachhawn dawn chauh a ni.

C. Lalrochhara