KAN CHHE VEK LO A NIA

Ṭhenkhat hian kan duhthawh luatah Mizo zingah rinawmna a bo zo, mi rinawm an awm tawh lo, tlawmngaihna pawh a dal zo tawh an ti thin. A dikna chen pawh a awm ang. Mahse, ka’n ti teh ang. Mi ṭhenkhat lo rinawm lo deuhte hi kan hnam pum ze enna an tling lova, tlawmngaihna a bo leh bo loh chu hun harsa kan tawn chiahin a lang ṭhin. Khawvel changkang zelah kan tlawmngaih dan a danglam ta bawk.

A tichiangtu atan, kei pa taptawm, Parvachawm bak Mizoram pawn la rap lo hian ka thil hriat leh tawn ve 3 chauh ka’n tarlang ang e.

Auto-Rickshaw
A kum ka chiang ta chiah lo, kum 2013 ni tain ka hria. Ni khat chu ruihhloin a tihbuai nasat ve tak pakhat Camping lut tur hian khawvel thlah na’n tiin Parvon a lo ‘hit’ tam deuh a, office pakhat Bathroom-ah a thal. A tlukna lamah a Awr (khabe hnuai) a sawh thler duai mai a, a damdawi tih kha nachhawkna a nih miau avangin a harh hnuah pawh na a hre lo.

Tunge a nih ka hre lo nain Damdawi Inah ṭhuitir vat a ngai tih hriain Auto Rickshaw-in Lunglei Civil Hospital-ah ka tlan luhpui. Damdawi In khumah a mu a, na hre hek lo le, Centre Fresh a ṭhial a, a ṭhial zawng lah chuan a khabe hnuai thler chu a inhawng huau huau zel mai a, a râpawm duh hle.

Tihfel ngai kan tihfel hnu; an ṭhui hma hlekin Auto Rickshaw khalhtu khan damdawi inah chuan min rawn zawng nal nal a, “Hei ka Rickshaw-ah khan in phone in theihnghilh a” tiin mobile phone 2 a rawn dah!! Kan buai a leiah phone kan thlauh tih reng kan hre tawh lo.

Pension
Sawrkar hnathawk an hnaa rinawm tak tak hi an tam khawp mai. Chung zinga pakhat chu Gov’t Haulawng High School zirtirtu Pu Sailoliana Sailo hi a ni. Ani hi English teacher niin December 31, 2020 tawp lam khan a pension.

An school-a zirtirtu pakhat chu hmun dangah an transfer-a, a hmunruak an hnawhkhah mai si loh avangin zirtirtu hmunruak 2 a awm ta a, an indaih lo zual hle dawn tih a hria.

Tichuan, a pension hnuah pawh a pension hma ang chiahin class a lak chhunzawm a, a ṭhahnem ngai ber berah ṭangin extra class thlengin a la! A thawhpui ṭhahnem ngai zualten subject dang zirtir na’na a period an dil pawhin a phal lo. Eizawnna’n chauha zirtirtu hna thawk a ni ve tlat lo a ni.

Kumin April thlaa Matric exam hma zawng class a lak chhunzawm hnuah zirtirtu hmunruak hi hnawhkhah a nih tak avangin class hi a lak chhunzawm ta lo a ni. Hlawh nei lova ni khat class lak pawh a peihawm loh tehlul nen.

ATM
Kum 2018 khan Lunglei Three Gate-a ATM Booth-ah thil tihsual palh lian tak a awm. ATM enkawltute zinga pakhat chuan Rs. 500 note dahna turah Rs. 2,000 note tel a lo dah palh. ATM lahin mihring angin eng note nge tih hre ve tawh hek lo le, Rs. 500 lakchhuah tuma an hmeh khan Rs. 2,000 a chhuak ta zel a, pawisa tam thamah phei chuan a tam duh hle ang.

An tum aia tam daih an lak theih avanga mi thenkhat ATM Booth-a an kal nawn lai chuan hmeichhe pakhat chuan a dik lo tih hriain Bank-ah a va complain (He hmeichhia hi nu nge nula tih ka hre lo nain chhungpuinu atan a rintlak hle ang tih erawh ka chiang ngam). Ama zarah ATM-a an tihsual palh chu Bank-in an hrechhuak a, sum tam tak bothlau tur an hum phah ta a ni.

He ATM Booth-a a awm lohna tur zawka pawisa note an dah palh avang hian Rs. 1,000,000 (Nuai 10) lai chu dik lo takin lakchhuah a ni hman a, tunah erawh an hmu lêt leh vek tawh.

Pawisa latute zinga ṭhenkhat erawh an rinawm bîk lo. ATM atangin pawisa an la ngei a ni tih an chhuichhuah hnuah pawh an ṭang kawh tlat a, an account atanga pawisa ‘cu’t mai tur nei lote chu an account-a pawisa a luh ve leha in ‘cut’ turin chhinchhiah an ni bawk.

Vai khualzin pakhat chuan he ATM Booth atang hian pawisa a la chhuak ve a, ani pawh hi a rinawm khawp mai. Haw pah a nih avangin a pekir hman tawh lo. A beih ngial hnuah ATM-a thawk pakhat number a nei a, rawn be bawpin a pawisa lakchhuah tur bak a lakchhuah zawng hi a pe let leh vek.

Nang ni ve ta la engtin nge i tih ang?

Lawmkima Hmar