TLAWNG QUAVADIS

Tlawng hnar a kang avanga Lunglei lam unaute mangang au aw a lo ri a. Aizawl khawpui leh a chhehvel chawmtu Tlawnglui pawh kang mai hlauhawm khawpin a awm mek a. PHE Deptt hian Tlawnglui aṭang hian tui ni tin galon maktaduai sawm leh nuai riat an hip chhova an duhkhawp tui Aizawl khawpuiah hîp chhoh tur hi an neih loh chang a tam mai. Tunah hian tlawng hi tuallaichar ang maiin a khawro a. Hetiang renga tui hi a kam zel a nih chuan tun aṭanga kum sawmhnih dang lo kal leh turah Aizawl khawpui hian tuiah harsatna nasa tak kan tawk dawn a. Chutih hunah chuan chhungkawpa hi tui ṭîn khat inchuh avangin kan buai ang.

Mizorama tlawmngai pawl lian ber YMA chuan tuihna humhalh leh a awmsa tihpun kawngah theihtawpa hma lain YMA Branch hrang hrangte'n ramngaw humhalhin tuikhur hnar leh a bul velah thingṭiak leh changêlte phun belhin, hei hian tuihna kang zel tur a ven bakah tuihna a siam thar nasa hle. PHE Deptt hian tuihna humhalh leh a awmsa tihpun kawngah chak zawka hma lak a nih theih Central YMA chu thawhpuiah sawmin thawhhona thuthlung 2021 June thleng ziah a ni a, hei hi thil lawmawm tak a ni. Central YMA hian a hnuaia Group YMA leh Branch YMA ramngaw leh tuihna humhalh ṭhate hnenah lawmman General Conference-ah a hlan ṭhin bawk.

Heti tak maia tlawnglui kam ta hian ngaih a tiṭha lovin a chhan nia lang chu kan lui dung uaptu ber ramngaw kan suat nasa ta lutuk leh bawlhhlawh a paihna hmun tur ni lova kan paih avanga ram chereu zel hian tuihna thar awm zel tur a titlem a. Kan tui lakna ber tlawng kawng leh luikawr remchangah ni tin deuh thaw bawlhlawh leh leivung thar lam tak tak paih hmuh tur a awm deuh reng a, ran thi paihte pawh hmuh tur a awm leh zauh ṭhin, kan hre vek lo mai thei a, Tuikual lui hian Tuithum a fin a, Serlui leh Tuithum lui bakah luite leh kawr neuh neuh Tlawng fintu tam tak a awm a, heng luikawr leh luia ṭhal laia kan bawlhlawh paih thli kha fur ruahtui a tlak hunah Tlawngah bawk a luang lut leh a. Kan hriselna atan thil pawi tak thleng thei a nih avangin luikawr remchang leh tlawng kawnga bawlhlawh paih hi sim a hun khawp mai.

Aizawl khawpui leh a chhehvel chawmtu Tlawnglui leh a fintu luite hian duat tak leh hmangaih taka enkawltu an mamawh tak zet a. Hetiang renga kan luidung uaptu ramngaw kan tih chereu a, bawlhlawh paih nan kan hmang zel a nih chuan tuihna awmsa hian kang hun a nei dawn a. Chutiang hun a thlen loh nan sorkar hian Save Tlawnglui Co - Ordination Committee tlawmngai pawl hrang hrangte pawh an tel theihna tur PHE Deptt changtu Minister emaw Chief Secretary kaihhruaina hnuaiah din ni se, Tlawngluiin a paltlang District tinah committee hi District Bawrhsapte kaihruainain din ni bawk se. Tlawnglui chhan chhuak tur hian ṭanrual a hun ta hle mai.

Peter Chhakchhuak