Eng pawisa nge kan dawn hi?

Covid dona Vbc 13.8 kan dawng em? Eng sum nge ni reng reng? Mizoram sawrkar in sum hman sen loh a kawl em ni? Ruling VC/LC chu kan hlawkpui ta chiah em?

Central aṭanga kan sum hmuh te hi a lo kalna leh a hmanna tur kan sawi fo ṭhin a. AMC inthlan lai khan 15th finance commission in local body grant min pek tak dan leh hei bakah hian kumin aṭanga health grant min pek tawh tur thu te leh kum 5 chhunga kan hmuh tur te kan sawiin kan ziak tawh ṭhin a. Sawrkar thil tih emaw te kan ti leh fo ṭhin a. A nihna hi mipuiin kan hriat a ngaih avangin tlem han ziak leh ka duh a.

May 9 a kan dawn hi rural local body grant 1st installment a ni a, Vbc 69 kumin dawn beisei niin Vbc 13.8 hi an rawn chhuah hmasa a. Nikumah khan Vbc 23 first installment (a vaiin Vbc 93 a nih kha) kan dawng a. Hei hi state sawrkar in Mizoram finance commission hmasa ber recommendation zul zuiin VC 800 chuang hnenah an chanpual chu a sem a nih kha. Covid dona han tih hi a hming a mawi viau mai a. A nihna takah chuan VC te tana Grant min pek hi basic grant 50% hi Tied Grant niin tui in tur, ruahtui khawlna, ekin siam leh enkawlna leh khawtlang tihfaina (sanitation) atana hman tur a ni a. A zatve dang 50% erawh untied grant niin Covid dona atan pawh a hman theih tihna mai a ni a. Order ah hian release date aṭanga ni 10 chhungin state hian VC te hnenah a hlan chhang lo a nih chuan a pung nen a pek a ngaih tur thu a chuang leh bawk a ni.

Urban local body grant hi kumin Vbc 34 kan beisei a. Nikum khan Vbc 45 (?) kan hmu a. 19 May 20 ah first installment 11.25 Crore chu Local Council/AMC tan a lo thleng a. Kumin budget session 16th March 2021 ah khan ZPM MLA Pu C Lalsawivunga zawhna chu chhang in kan sawrkar hian ULB Grant nikum a a dawn tawh hi March ni 16 thleng khan a lo la pe chhuak lo a. A pung nen chuan a tam ve tawh khawp ang.

Nikum a kan chanpual hi March ni 31, 2021 khan Central in a vaiin min rawn pe ta a. Chuti a nih chuan Aizawl tan Vbc 34 leh thingtlang VC tana Vbc 70 (Vbc 23 1st Installment-ah pek chhuah a ni tawh a) chu kan sawrkar hian a la kawl tihna a ni a. Ni 10 chhunga pek chhuak tur hi a la pek chhuah loh avangin nitin Vbc 100 chuang pung nen hian a la pek ngei a ngai dawn tihna a ni a.

Ruling VC/ LC ṭhatzia sawi ṭhintute hian a ṭhatna chu an sum hmuh tur pawh an pute ruling vangin an sawichhuak ngam lo a. A thlenna tur mipuite pawh min hrilh ngam lo tihna a ni a. Ruling kher a ṭhatna chu kan man tawh ang chu maw?

Tin, kumin budget ah hian local body te health grant Vbc 30 chuang kan hmu dawn bawk a. Hei pawh hi VC/LC te hnen a pek chhuah leh bawk tur a ni a. Kum 5 chhungin he grant hi finance commission in Vbc 162 vel dawng turin a estimate a ni. Lo chhinchhiah kar tur. Hei bakah CM budget speech a heng LB grant te hi 60% tied anga inziak hi a dik lo a. 50% ve ve a sem tur a ni.

Rorelna tha kan beisei ṭhin a. A kalphung erawh kan inhrilh ngai lo a. Mizoram finance commission vawi­khatna a tawp a, vawihnihna vawiin thlengin kan la din lo a. Budget speech ah priority 5 zingah 2nd finance commission din thuai tura hmalak a tel nghe nghe a nih kha. Finance commission hian state leh local body te sum insem dan tur ang a March ni 31, 2024 a kan la sem loh chuan local body grant hi tih tawpah min vau nghe nghe a. Nikum March ni 31 a a thar hmang tawh tur tun thlengin commission ber din a la ni lo a ni.

A tawp berah chuan kan sawrkar hian sum hman sen loh a nei ni berin a lang.

Tbc Lalventluanga