Assembly Speaker Bangla thil thleng bawk

April 5, 2021 khan Vanglaini chanchinbu lamah Pu C Lalremmawia khan 'MNF Press Release leh Assembly Speaker Banglaa thil thleng kha' tih thupui hmangin zawhna a rawn zawt pahin a ngaihdan a rawn sawi a. kha kha tun thleng hian dawt nge thutak? tih hi Mizoram mipui hian kan la hre lova, thudik hriat hi kan chanpual a ni a, zawh belh hi a ṭul hle bawk a ni.

MNFofficial Press Release Media & Pub­licity Dept-in Memo No.MNF/Media/02/2021/211 Dt. 25.03.2021 hmanga an thu chhuah a rawn thur chhuah kha zir nawn tham a awm tlat mai a, "Tunah hetia department officer-ten sum chuangtlai bel ral nana hmun hlu tak tichhe zawnga hma an la hi MNF chuan ṭha a ti lo," tih hi kan Chief Minister tan mualphona a ni tlat.

Mizoramah pawisa vanzia an sawi laiin PWD hian pawisa chuangtlai an lo nei bik tlat hi a changtu Minister tihmualpho tumna a ang a, mahse chu chu huata lak dawnin MNF thuchhuah a lo ni ve leh chiah si a. PWD in sum chuangtlai nei anga an ziak hi thu uar an tumna nge sum chuangtlai hi an lo nei tak tak? tih hi sawifiah hmasak a ngai a ni.

He thu lo irh chhuah­na chu Cong­ress lam Press Release chhanna kha a ni phawt mai. Congress hian Assembly Speaker Bangla lamah hian silai chelek a nih thute an ziak a, Speaker hian PWD hotu lian deuh chin chu ko khawmin an hnathawh chungchangah a lung­awi loh avangin na takin a ṭawng chhuakin spistol te pawh a chelek hial a, nimahsela vanneihthlak takin a tlawlh hlauh niin an rawn sawi a, a finfiahna (video) a awm loh avangin dawt nge thutak? tih a chiang thei ta lo.

Congress puhna hi thil phuahchawp a ni lovang tih rin theih turin MNF chuan March 25 ah thu an rawn chhuah ve ta a. Chu thuchhuahah chuan, "Mizoram Legislative Assembly Speaker Pu Lalrinliana Sailo-in sawrkar hmun hlu tak... sawrkar hnathawkten a tichhe zawnga kut an thlak mek na taka a humhalh ngam hi chhuanawm kan ti a, huaisen pawh kan ti," tiin an rawn chhan a. Mizoram sorkar hmun pawimawh sorkar hnathawkte laka hum­halh ngai a awm tih a chiang leh phawt mai a, "Huaisen pawh kan ni," a tih kher avang hian huaisen tur chuan inkokhawm satliah an nih loh hmel hle lo maw? tih zawhna a lo piang leh ta a ni.

MNF Press Release-ah tho hian, "Speaker thu hi ngai pawimawh duh chuang loa an tihluih zel avangin, Mizoram tana hmun hlu humhalh a ṭul a tih mai bakah, Speaker zahawmna humhim a ṭul bawka a hriat avangin, officer-te hi koin a na takin a sawi ta a ni," tih a lo lang.

Heng thilte hi eng vanga na taka sawi ngai nge a nih? tih leh eng chiah hi nge na taka an lo sawi? tih hi Mizoram mipui hian hriat an phu a ni.

RK Lalchhandama