RETHEIHNA
Retheihna hi chhungkaw dinhmunin a zir tawk loh vang te, taksa hriselnain a zir loh vang leh thatchhiat dawngdah vanga lo awm thei a nihna lai a awm ang. Chutih laiin ram inrelbawlna (Politics) fuh tawk loh chuan retheih hi a zual leh zual bawk a ni.
Mizoram mihring nuai sawm leh pahnih erh awrh vel lek chennaah hian kan mihausate leh kan politician tam zawkte hi chuan 'retheihna' hi a hming chu an hre lar hle in a rinawm. Chutih rual chuan retheite retheihna thûkzia erawh an hriatthiampui kher lovang.
Kan ram politics kalphung hi mawlmang taka han chhut pawhin, sem leh dawn policy deuh vek hi a ni mai a, hei hian miretheite retheihna hi a um bo theiin kan ring takzet em? Kei chuan ka ring hauh lo.
Kum nga chhunga cheng nuai khat emaw cheng nuai thum emaw dawn ai chuan, kuthnathawktute leh mipui mimirin nitina kan kuthnathawh rah seng a, kan thlai tharte man man zawka hralh theihna market ṭha hi kumtin awm ta zawk se, sorkar aṭanga cheng nuai khat/nuai thum lo sakuh sêr nghah tlawk tlawk ai chuan kan ṭhatpui zawk daihin ka ring.
Tun dinhmuna Mizoram mipui tam zawk dinhmun hi chhe tak a ni, a nihna takah chuan damloh leh hrisel loh te hi a cho awm loh lehzual ngawih ngawih a ni.
Tun ang renga kan ram inrelbawlna hi a kal chuan, retheihna hi tun aia nasain a lo pung ang a, ruk ruk a hluar tual tual ang a, a chhe zawnga kan kal zel phei chuan insuam leh tualthah hialna pawh kan la tawng ang tih hi a hlauhawmin ka hre fo ṭhin.
State ralmuang kan nihna hum zo lo hian, miretheite retheihna hian hel pawl a hring chhuak mai ang tih pawh ka hlau fo a ni. Tun ang ngawt lo deuh, system thar hi neih a hun ngawt mai.
Tunlai lockdown boruakah hian, kan dinhmun a rawn lang fiah lehzual niin a hriat theih a, khawpui leh thingtlang lam mi tam zawkte hi chu kan khua leh vênga kâmdingte behchhana nitin eikhawp hmu hram hram kan ni, chu chu engnge a chhan? Tun hma aṭanga kan ram politics inrelbawlna fuh tawk lovin a nghawng kal zel a tih theih hial ang chu.
Kan huan thlai leh kan kuthnathawh hian lukhawng a la nei nêp deuh em a tin ni. Mizoram a ni hlauh zawk a, kan Mizona leh kan Kristianna pâr chhuak avangin ṭhenawm khawveng kan la indawmkang tawn hram hram a nih hi.
Kan sorkar (tun dinhmun bik kan tihna ni lovin) sum che vel hian, a thlenna tur dik tak a thleng chat chat em? A kalna turah a kal zêl em? Chutiang chuan kalin, thleng zat zat ni sela, Mizorama a mi chengre retheihna tun ang hi a ni kher ang em? tihte hian rilru a luah lian ṭhin khawp a ni.
Miretheite retheihna leh kan rûmna tam tak hi kan inthlahdah leh dawngdah vang a ni vek kher lovang, eng emaw siamṭhat ngai lai hi chu a awm ngeiin a rinawm.
Nehemia anga a mite rûmna ngaihsak a, a chhe lai siamṭhat a, dikna leh rinawmna nunpui mi hi kan mamawh takzet a ni.
MC. Lalthianghlima, Cherhlun Camp: Khatla South