WHO RUN THIS GOVERNMENT?

Tunlai chu kan ram kalphung hi ka thlir ve mai mai a. Kan ram roreltu, kan hotute hian mipui min hruai dan en hian, “He sorkar hi tu enkawl nge maw ni le?” tih mai tur nite hian ka hria. Han ngaituah chiang ta ila, hmanni lawkah Central YMA in inhlawhfa, theka rate an siam a. CYMA hian thil man rate siam turin thuneihna an nei em ni le? A nihna takah chuan thekaa hnathawh hmang hian Zoram mipui sum min eisak nasa lutuk a, chumi chhanna atan chuan CYMA a lo pen chhuak a ni ber. Amaherawchu, a nihna takah chuan sorkar tan chuan thil mualphothlak tawpkhawk a niin a lang. Mizoram sorkar hian theka vanga kan buaina leh harsatna hi ngaihsak thlawt lo tihna a ni a, loh theih lohvin CYMA hial a inrawlh ta chu a ni a. Mizoram sorkar hei ve deng duangah hian theka rate siam thei tur thuneihna nei hi an awm miah lo tihna em ni dawn? Khawiah nge sorkar hi a awm le? Tlawmngai pawlte'n sorkar tih awm tak an ti fo mai hi sorkar tan hian thil zahtlak tak, tlawmthlak tak a ni lo em ni? He sorkar hi tu enkawl nge? Khawiah nge kan sorkara mawhphurhtute hi an awm le? Khawiah nge kan ram hruaitute hi an awm zawk vek ni?

Hmanni khan hri dona kawngah sorkar hnathawkte'n an ni khat hlawh thawh turin an rel a. A nihna taka chuan sorkar hian pawisa a nei tawk lo va, a mangang a, a hnathawkte hlawh hi a dil a ni ber e. Sorkar hnathawk tan chuan ni khat hlawh lek zawng thil harsa chu a ni hauh lovang. Mahse, kan sorkar kalphung en hian sorkara sum chhun luh hi thil chakawm lo tak a niin a lang. Inrenchem tum lo, nuam tawl sorkar emaw tih mai tur a ni. He sorkar hian sum hmanna tur hi a zawnin an zawng emaw tih tur khawpa sum ren lo hnena sum chhun luh hi thil chakawm a ni lovang.

Tunah pawh thil ṭul em em lo hi an ti nasa khawp mai a. Board 14 an din a, heng board chairman te hi MoS rank ka pe e an ti a, a enkawlna vela sorkar sum sen ral hnem turzia hi. Nikum hripui do lai khan an inren ve deuh ang chu tih nak alaiin, hri leng dona atana lo inbuatsaih ai khan party mi leh sate tan hnathawh tur, contact tam tak an sem chhuak ham ham a, sum hmanna tur lian tham leh induhsakna tur thil PAHOSS an ti a, nuai 200 tel telin an invawm el el mai a, a ṭul em em pawh ni lo Adviser to CM an ti a, heng zawng zawngah hian sum leh pai kalral hi a va'n tam tak em. Inrem zir lo pui hi a thanatthlak khawp ang le.

A dik tak chuan nikum lam khan Minister-te khan zin veivahte kha an insum miah lo emaw ni tih tur a ni. Mizoram chhungah eng emaw thil thleng hlek se; ruling MLA rual kha a huho khan an zin dual dual a, nuam an tawl ta mai emaw tih tur an ni. An chetvelna leh an ṭhuihruaite chet velnate hian sum eng zat tak hmang ral ang maw le? Chutiang taka an chet hnuah chuan sum indaih loh chhuanlamin an hnathawkte sum an la dil leh chu a ni a, pek chu a va'n chakawm dawn loh tak em. He sorkar hian enkawltu mumal tak a nei lo ta emaw tih mai tur a ni ṭhin.

Hripui dona turin inbuatsaihna a ṭha tawk lo, a ṭhente phei chuan tuna ventilator leh ambulance vel pawh hi mi min pekkhawm (central leh company CSR) a ni hlawm ang deuhte'n an sawi a, tak tak ni maw? Tunah pawh oxygen concentrator chu Ireland leh Taiwan aṭangin kan dawng leh a ni awm a. Tunah sorkar hnathawkte pekkhawm leh CM relief fund lutte nen, pekkhawmin hri hi kan lo do ve hram hram emaw ni le? Dan leh dun ni se, lockdown order/SOP chi hrang hrang insaikalh nuk mai an han chhuah a. VLTF/LLTF lamin an lekkawh buaithlak khawpa zingin order an chhuah vel thul nen. He sorkar kalphung hi hriatthiam a har ṭhin khawp mai. He sorkar hi tu enkawl nge maw ni tih mai hi a awl ṭhin a ni.

Nikum lam khan hripui leng karah khan sorkar khan phul lem phahte kha a tuipui viau mai a. Hripui do buaia kan buai lai khan phul lem phahte khan buaipui hmanhawh viau kha a ni a, tunah hri donaah hian khangte kha a ṭangkai phak ang emaw? Sorkar scheme pakhat phei chu 90% chuang sport lam tihchangtlung nan a lo pawt pengte kha a ni awm a, tunah hripui dona atan hian a ṭangkai zui tak ang maw? Hripui do hi kan la thutak vak lo nge ni, a aia thil buaipui leh hmanhmawh pui kan ngah hmel em mai. He kan ram hi chu a mak tih loh rual a ni lo ve.

Kan che hleka kan buai em em zel a. Bawlhlawh paih danah kan buai a, mipui lamah thil chi li velin min thliartir a. Tuirialah hmun hnihah an lo paih leh vel mai mai a. Hengte hi mipui min hmuhsitna emaw ni dawn ni? Tui ni se kan harsa em em vek a, power man an ba ṭeuh an ti leh tawh a, he ram hi engtia min kalpui nge maw an tum ni le? Nuai thum min tiam an la sem lova, Traffic Jam free khawpuia siam an tum an la tihlawhtling lova, vai buhfai ei loh te pawh kan la thleng lo chu a ni a, kawngchhawng lah a ban pakhat pawh an la phun bawk si lo va. Chung zawng zawng ai chuan tul lo deuhin, sum hek sak turin district thar an hawng vak vak a, mau hlir min sawi mawipui a, chakai farm tih velah min kualpui ta daih chu a ni a. He sorkar hi tu enkawl nge ni a? Engtia min kalpui zel nge maw an tum ni dawn ni?

L John