VAIBELCHHE TAM LUANRALNA PAHOSS SCHEME

Tun hnai te ah Covid 19 doletna kawngah Sawrkar chuan sum indaih lohna vangin Sawrkar hnathawk inzawmkhawm pawl FMGEW te chu sum thawh turin a ṭahawh ta ringawt mai a. Hetih laia mi tamtak ten vaibelchhe tamtak luanralna an lo sawi lan chu PAHOSS scheme hi a ni.

PAHOSS scheme-in a tum ber pakhat chu traffic jam vanga kan harsatna tihkian a ni. Mi tamtakin garrage/parking lodge an neih theih chuan traffic jam a tiziaawm ang tih rinna vanga he schem hi lo piang ti ta ila a sual awm lo ve.

PAHOSS scheme-ah hian kan sawrkar chaktak hian vaibelchhe 62.51 hmanral turin a pawm tawh a, heta ṭang hian Nuai 1003.30 lai mai a pechhuak tawh a, Nuai 5000 chuang pekchhuah a la ngai a ni. He scheme hi a ṭul dan ang zel a la chhunzawm tur nia sawi a ni.

PAHOSS scheme-ah hian Sawrkar hian revenue a hmu let dawn lo nia sawi a ni bawk a, hetiang a nih chuan mi neinung te vur belhna scheme ti ila a sual lo ang. In leh lo nghet nei te insakna an va tumsak a, ṭhenawm khawveng ten motor dahna'n an hman chuan parking fee hi thlatin beneficiaries te hian an lalut dawn tihna a ni. Hetiang a nih chuan sawrkar hian an insakna leh an sum lakluhna tur a va tumsak tawp tihna a ni. Millenium Center parking lodge te hi kumtin sang tak taka tender koh a ni ṭhin a, AMC-ah poh chutiang bawkin. Sawrkar hian a sum neih ang ang hi revenue siamna atan a hmang ve dawn emaw tih laia semral zawnga kan kal zel a nih chuan kan pachhe zual zel dawn niin a lang.

He scheme hi a hlawhtling a nih chuan kum 2-3 hnu lamah hi chuan motor in­tlanchhawk hi a ngai tawh lo ang. 2018 election campaign laia Vanapa Hall-a Pu Zorama thusawi poh dream mai a ni tawh lo turah a ngaih theih tawh ang. Amaherawhchu, traffic jam a la ziaawm lo a nih chuan he scheme hlawhchhamzia tarlangtu a ni ang. Traffic jam awm lohna khawpui beiseina chu dream mai mai a nihzia kan hrechiang thung ang.

PAHOSS Scheme leh SP, Aizawl Traffic thuchhuah inkalh: Mizoram motor vehicle (Amendment) rules, 2010 vide notification No. D.26011/3/94-TRP Dt. 13.8.2010 angin lirthei register dawnin garrage neih vek tawh tur a ni a, he dan thar kenkawh a nih atanga lirthei registered hmasa ber, Aizawl District-ah chuan MZ-01-F-7188 hnulam a mi te chu lirthei registration tih dawnin garage neia an insawi avang chauha register sak an ni. Hetiang a nih chuan MZ-01-F-7188 hnu lam, kum 2010 hnu lama motor la thar te hian garrage an nei vek nia ngaih a nih laia PAHOSS scheme lo piang leh si hi sawrkar thu a inkalh tlat ni in a lang.

Transport Department lamin garrage nei chin chiah motor an registered si chuan PAHOSS scheme hi engvanga lo piangchhuak nge a nih? Garrage nei lo, kawngkama motor dah te traffic police, AMC leh local council ṭangrual ten surprise check an nei thut thut bawk a. Hetih laia mimal garrage siamna tur va tumsak tlat mai hi eng ruahmannna nge hriatthiam har tak a ni.

Public property atan hmang ta zawk ila: PAHOSS scheme atana vaibelchhe tamtak hi public property siamna atan hmang ta zawk ila tuna a kalpui ang ai hian sawrkar hian a hlawkpui zawk in traffic jam solve theih a ni zawkin a rinawm. Traffic jam-na hmun Aizawl hmun laili ah mimal ram pa 5-6 vel vaibelchhe 10 ṭheuh pohin lei se, Zodin cinema hall an leisak ang hian sawrkar hian parking lodge atan cheibawl mai se. A nih loh pawhin hmun laili laia sawrkar dept. office ṭhenkhat te hi capital complex-ah sawn ni se, an hmun luah mek hi parking lodge atan hmang se.

Eg. Babutlang, Zarkawt, Treasury sq., Bawngkawn, etc, ah te hian sawrkar ram a awm nualin a rinawm a, heng te hi parking lodge atan hmangin office hi complex-ah emaw, khawpui pawnah emaw sawn ni se kan zia phah zawk mai thei.

Tuna kan kalpui dan en hi chuan duhsak zawng te invurna atan kan hmang mai mai em aw tih a awl khawp mai. Aizawl khawpui lun laia traffic jam tihrehna atana Zemabawk Lungbial daiha Nuai 200 man va pek te hi kan tumram nen a inmil chiah em tih hi ngaihtuah tham a ni.

Motor neih belh lamah khuahkhirhna a awm lo a, garrage luah tur a tam poh leh motor a pung chak dawn tihna a ni mai. Traffic jam tih ziaawm na tura kan nghahhlelh ber kawngchhawng te lah chu a ban pakhat pawh phun a la ni bawk si lo nen tuna kan kalpui dan ang hi chuan Traffic Jam harsatna hian min kiansan mai hian rinawm loh e.

Lalnunmawia Pachuau