Mahni dawt sawi awih!

Thingtlang khaw pakhatah hian patling pui dawheh zet mai hi a awm a, "A mak khawp mai, keima dawt sawi hi a kual a kual a, a tawpah chuan keimah ber hian ka awi leh ṭhin," a ti e an tia lawm! Hetiang hian kan ram politician zingah dawt ngialngan sawi hreh lo, thudik hrula dawt phuahchawp, thudik ni si Mizo Pain puanzar loh atana an tih tur puanzar a, intih lar chak zek zekte hi kan nei ve nual a ni.

Internet lamah hian Troll an tih hi keini ang duang chuan kan tlai­khaw­hnu hriat ve chauh pek a. Indian politician te an han troll tak tak dan en hi chuan kan politician te hi chu an la vannei khawp mai. US President inthlang kha Mizote khan kan han atchilh nasa khawp a, Pathian tirh ni tlata kan ngaih a tel ve vang khan kan han bawl phuan chho a, chuta kan hmuh ve chu USA ah hlei hlei khuan an politician te hi an lo troll nasa hi a lo ni.

Mizorama kan poli­tician ṭhenkhat hi troll ve tak tak ila an tlin ngut ang em? tih hi zawhna awm thei a ni. Entirna han siam ta ila, Congress zu zawrh laia Rangvamual lam kher khera zu zawrhna kudam lian nei politician chhungkua an awmte kha thil remchang lutuk mai a ni a, cartoon hmangin a nih loh pawhin graphic nen troll theih a ni. MNF Minister pakhat bike a office kal, taxi a office kal lai thla an lo la fuh chat chat te kha han troll ve tak tak se an tlin rei ngun ang em? tih zawhna a awm leh thei bawk a, Krisman ruaiṭheh fatute pawh kha an sim zo ta nge an ruat nawn ta lo? tihte pawh hriat chakawm zinga mi a ni.

Dawt chiang tak ni thei tur, an thusawi lai video pawh la awmte hi engtin nge kan tih dawn le? A sawitu hian a awih leh awih loh chu a hriat theih lova, an party mi ṭhenkhat hi chuan an awih ve leh tlat lawi si a ni . Video tih pawh khi a buaithlak khawp mai, Assembly rorelna in sangah khan video a awm khan, "Ziakin a awm em?" an han ti a, ziaka a awm khan, "Voice record i nei em?' an ti leh daih bawk si. Mahni dawt sawi hi nakinah kan la awih ve riau riau ang tih ka hlau.

Malsawmtluanga (MST)