Rawngbawltu Inkharkhip

Mother Teressa khan ti hian a sawi e an ti a, “Ṭawng­ṭaipuina hmui aiin ṭanpuina kut a hlu zawk” tiin, hripui vanga kan khawsak dan lo danglam ta te, kan rilrua awn lam in thlak hret hret te hi tumah inhrilh nawn ngai lovin kan hria a. Sapṭawng Mizo ṭawng ang maia kan hman tak home quarantine, vaccine, lockdown, sample, frontline worker adt. Heng zingah hian frontline worker mipui aia tawng sanghnih vela kal hmasa te hi kan hlut hle a. Mahni sa himna pawh ngaipawimawh thei lovin midang himna atan a chhun a zanin an thawk chhuak a, an thawhrimna leh inpekna avangin ram mipui rilru pawh a muang em em a an thlazar hnuaiah hlauhna a kiam ṭhin a ni.

Hmatawng pawl te hi State sorkar hrang hrang te pawhin an ngai thutak hle a, hmun ṭhenkhat ah chuan chanchinbu mi thuthara min chawmtute pawh he huang chhungah hian rin luh an ni hial a ni. Hla in ”mihring mai pawhin min thlamuan thei” a tih ang deuhin kan lo in thlamuan tawn thei fu mai a, kan hmatawng pawl hriat lar em em task force te khawtlangah uluk taka mai a santiri hna an han thawk te hi mahni in lum aṭangin kan lo muang phah hle a ni. India ramah hian heng hmatawng pawl hi mi vaibelchhe chuang fe an awm turah ngai ila, Sorkar laipui remruatna in hri danna pawh mipui nawlpui in kan chim hmain pek an ni a, tumahin kan thik lova kan dah sang hle a ni.

Ni, hun harsa leh thim han tawh meuh hi chuan sum tel chhah pui pui in min hnem lova, lirthei ṭha pui pui in min ti lawm hek lo, chhungkaw ropuina te mimal ropuina te chhuan tur a awm lo a, a chuai zo ṭhin. He hun thim kara mihring lama min hnemtu lian chu kan aia pen hmasa hmatawng pawl te hi an ni.

Kan ram nuam tak kan ralmuanna hmunah pawh hripui vangin kan nun a danglam zova, tisa thlarauah kan chau rup rup a nih hi. Khawvel chanchin kan han hria a, khawi hmunah pawh ralmuanna aiin inpawngnekna in hmun a luah a. Thihna in mual tin a hrut chhuak a, thingtlang kilkhawr ber thlengin nun hi a rum a ni.

Kan sawi tak ang khan sorkar chuan mipui himna turin a kawtawpah tangin tha a chhuah a, kan ram chhungah himna kulhpui vuak darh anih loh nan tlawmngai pawl thlengin mipui hmaah kalin ke an pen a. Mi inpe te zarah nu nau thlabar tur hnuhsawnin an awm a, a ropui hle a ni. Tisa thila kan inthlamuan tawnna chuan tawp chin a nei ṭhin a, rilru chhungril thlamuanna erawh kan chang phalo niin a lang ṭhin.

Zofate vanneih na lian tak chu kohhran nung tak kan nei (ṭhin) hi a ni a, chu kohhran ah chuan Pathian thutak buaipuia hmanhlel rawngbawltu sang tam tak an awm a ni. Thlarau nun a mipui tana frontline worker tur chu kan haihchham lo, heng rawngbawltute hian thi leh thau pawlha tangin Pathian au ta se tunai hian kan tawrh te hi a nep mahna le! Mahse rawngbawlna chu fashion chikhat ang lekah kan chhuah mek chu a ni, hripui a rawn thawk a kan hriat ngai hauh loh inpawh loh tur thu kan han hria a kohhran mi te thlarau nun pawh a zuai chho chak hle a ni.

Mi ṭhahnemngai pahnih khatin nikum lam khan home crusade te media kaltlangin min neih pui a. Kan dup dul dul anih kha, chutih lain mipui innghahna ni reng kohhran a rawngbawltute chu a inkharkhip uar zawk ah kan ṭang emaw tih mai turin kohhran mite harsatna pawh pha lovin kan in kharkhip a. Social media lamah pawh rawngbawltute beiseina a ri ring hle.

Khawvelin hun thim a tawh lai hian Pathian hmanrua kohhran rawng­bawltu hlun te hi mipui thlamuan tura tawrh ngamna nen pen chhuah a hun ta. Mahni sa himna pawh ngaipawimawh thei lova khawvel frontline worker te an inpek lai hian chatuan daih kawng kawhhmuhtu Kohhran a rawngbawltute chu mawngvawm ba ang maia chet chhuah a hun ta, keini mi chaklo te hian kan lo thlir reng e.

Rosangzela, Venghnuai