Sorkar tan a hmanhmawh thlak tawh

MNF in sorkarna an han siam a, Chief Minister Pu Zoramthanga sawi dan takin inthlang reng rengin an khawsa a. Election Model Code of Conduct in a phuar avangin duh angin hna an thawk thei bawk si lova, chumi hnuah hna an han thawk ve hman dawn deuh dek dek a, Covid hripuiin khawvel a tuam leh ta si. An sorkar hun chhung hi an la hmang ṭangkai hlei thei tlat lo.

MNF hian an sorkar hma khan mipuiah in zawrhna langsar tak an neih chu, cheng nuai 3 in dawng ang, tih a ni. SEDP aṭangin nuai 3 sem an tum tih chu video lar takah hian chiang takin hmuh hmaih rual lovin mi tinin an phone ah an la kawl ṭha khiau a ni.

Cheng nuai 3 hi MNF vote tu chhung tinin an dawng dawn pawh ti lovin NLUP dawng tawh zawng zawng pawhin an dawng vek dawn tih kha sawi a ni a, he mi tur hian kum hnih ṭha zen zawn bak an nei ta lova, Election MCC in a phuar hmaa mawng vawm ba ang maia an chet a ngai ta a ni.

Pu Zoramthanga pawlte hian Aizawl khawpui hi Traffic Jam (TJ) awm lohna khaw puiah siam an tum bawk a, kawng chhawng siam an tum tel bawk a, chumi tur chuan hun an nei tlem tawh hle mai. TJ awm lohna state capital awm chhun nih theih hi mipui pawh hian an la beisei a nih a rinawmna chu, AMC inthlanah khan MNF bawk an han thlang tling leh a, chuvangin he mi hna hi an thawh vat vat a ngai ta a ni.

Thil pakhat dang leh hmanhmawh thlak deuh mai chu Vai buhfai ei tawh loh hi a ni. Hei hi eng tik aṭangin nge kal pui a nih theih dawn tih hi Tlumtea thlirin thingtlang lonei mite chuan an thlir dawn a ni. Buhfai manah FCI lamah hian kan pe chhuak hnem si a, Vai buhfai kan ei dawn loh chuan Zo buh, tlangram buh hi kan ei dawn a nih hmel ber.

Nakkum lamah chuan Mizoram mipui kham khawp buh tuh ngei ngei a ngai tawh a ni.

Vanlalmuana