HUN KHIRHA HEALTH DEPT. ENKAWL TURA PATHIAN BEL RUAT DR.THANGTEA

Kum 2019 aṭanga khawvela natna hrik vak chak leh darhzau ber, khawvel mipui pawhin an thihpui tam ber, ram ropui ber leh ramte ber pawh thliar lo; mi hausa leh rethei, mifing leh mawl, kum upa ber leh naupang pawh thliar lova luh chilh mektu Novel Coronavirus (Covid-19) chuan India ramah a vanglai a chèn chho mek a, ni tin a vei thar leh thihpui tam ber ni a thleng mek zel. He chanchin ziah lai thleng hian Khawvelah mi 161,064,142 in a hri vei tawhin, mi 3,344,439-in an thihpui tawh a, dampui tawh mi 139,842,455 an awm. India ramah hri vei tawh mi 23,702,832 awmin, dampui tawh mi 19,728,436 an awm a, thihpui tawh zat mi 258, 315 an awm bawk. Mizoramah chuan mi 2033 enkawl mek awmin, dampui tawh mi 6120, vei tawh zawng zawng mi 8176 leh thihpui mi 23 kan awm mek a ni.

Khawvelin hunkhirh tak a hmachhawn mek a, India ram pawh Covid enkawlna leh a damdawi thlengin khawvel ram dangten min ṭanpui kan ngai ta hial bawk a ni. Mizoram pawh Covid Second Wave-ah meuh chuan tarlan tawh ang zat khian kan thihpuiin kan vei tawh a, a rapthlakin a pawi takzet a ni. Khawvel, India leh Mizoram sorkar lu a hai a, ṭapin kan rum mek a ni.

Hetih lai hian Mizoramin hun harsa kan tawh lai tak hian, kan thih leh damna lama min enkawltu department 'Health & Family Welfare' changtu Minister chak leh viak ṭha, Dr.R.Lalthangliana kan nei hi 'Pathian bel ruat ngei a ni e' kan ti lo thei lo vang. Health Minister a nih theihna tura amah thlang tlingtu a bial mipui te, a hnung zuitu te, MNF Party mipui leh Health Minister atana ruattu Chief Minister thleng pawh hian 'Pathian hnathawh vek a ni' tih pawh a chiang hle a ni.

India ram leh kan ṭhenawm State dangte dinhmun en hian Mizoram chu ziaawm tak kan la ni a, tha thlah lovin tun aia ṭan kan lak mar pát erawh a la ngai zel tho ang. Hetia India rama a ziaawm ber kan la nihna chhan hi nikum Covid First Wave-in India ram a lo thlen ṭan tirh lai khan Health Minister Dr.Thangtea kaihhruaina hnuaiah March thla tir khan lo invenlawkna tur ngaihtuahin Meeting an lo nei daih tawh a, Lockdown pawh India ramah Mizoram hi a tihmasa ber kan ni nghe nghe.

Nikum March thla daih tawha Dr. Thangtea thusawi TV lama lo lang ka la hriat reng chu, "He Virus hi khawvelah a darh chak si a, India ram pawh a rawn lut ṭan ta a. He kan doral hi mit lawngin a hmuh theih si loh a, engtianga lo hmachhawn tur nge tih hriat a har a, Sipai tha chakna hmanga Bomb leh Silaia lo hmachhawn chi lah a ni si lo. Kan invenna tura tih theih awmchhun chu, he hri hi mihring leh mihring inkhawih, intawhchilh leh inhnim hnaih avanga kai kan nih avangin Lockdown hi kan kalpui ta mai a, kan la hriat ngaih loh hri a nih avangin kan inzir chawp mek chauh a ni a. Lo inven nan Airport pawh India ramah a khar hmasa ber kan ni. Ralkhel dar kan vaw ta e," a tih kha a ni.

A ni tak a, khawvel sorkar hausa ber ber pawhin he hripui lo invenlawk dan hi an hre lo a, damdawi lama mithiam berte ngaihtuahna pawh a buai takzet a ni. Mizoram hi ram te takte kilkhawr tak ni mah ila; kan khaw hawi a zau ve ṭan a, khawvel hmun tinrengah kan indap chhuak ve ta a. Hripui avangin khawvel hmun hrang hranga chengte'n anmahni ram an pan rualin, khawvel hmun danga awm leh India ram State danga awm Mizo-ten mahni ram kan pan sang sang a. Chutah meuh chuan kan beisei leh rin phak bakin hri vei kan pung chho ta a. Sorkar tan pawh a mangan thlak hle a, Health Minister ngat phei hi chu a lu a haiin ngaihtuahna a seng nasa hle ang tih a hriat a ni.

ZONET-ten Health Minister an kawmnaah khan, "Hripui len lai taka Health Minister i ni hi vanduai i inti em?" tih zawhna, Dr. Thangtea chhanna kha a ri a mawi hle mai, "Vanduaiah ka inngai lo a, chona lian takah ka ngai zawk a ni" a tih kha.

Mi tam zawk chuan Dr. R.Lalthangliana'n he hripui avanga ngaihtuahna a sen nasatzia leh a hahzia hi kan hriatpui kher awm lo ve. Hripui len ṭan tirh aṭang khan zan tin dar 12 hmain a la mu ngai meuh lo. A kaihhruaina hnuaiah 'State Level Committee on Covid-19' hi kum khat chuang kar tin deuhthaw meeting a neihpui tawh a, kar khata vawi hnih thum meeting neihpui chang pawh a nei. Health Department bik Official Meeting a neihpui hi a tam hle bawk. A hova Meeting neihnaah reng reng hian hna pending a awm ve ngai lo a, tihtur leh hmachhawp chu an ti nghal zel a ni. Dr.Thangtea chuan, "Covid chungchangah kher chuan kan thurelte hi naktuka tih atan khek chi a ni lo a, rel zawh ruala tih nghal zung zung ngai a nih avangin kan ti nghal zel ṭhin," tih thu a sawi pawh chanchinbuah kan hmuh tawh kha.

International Boundary leh State Boundary hrang hrang Mizoram chhim lam leh khaw chhak lamah te, Vairengte leh Kanhmun lama Duty Task Force-te, Police leh Health Care lama thawkte pawh vawi eng emaw zat an Duty-na hmunah kal chilhin a tlawh chhuak fo bawk a, an dinhmun a enfiahpui zel a, mamawh hrang hrang an sawite chu ngaihthlaksakin Silpauline, Damdawi hrang hrang, Face Mask, Hand Sanitizer leh sum fai a pe ṭhin a ni. ZMC, Aizawl, Lengpui leh hmun hrang hranga Covid Care Centre (CCC), Community Covid Care Centre (4C/CCCC) te chu a hmunah kal chilhin vawi tam tak damlo leh thawktute tan ei tur te, damdawi, hmanrua leh sum fai pein a tlawh chhuak fo tawh a ni. ZMC leh BSUP Durtlang lamah tum eng emaw zat Duty leh damlote tan thlai leh thei ei tur a pe tawh ṭhin bawk a ni.

Dr. Thangtea hian Leadership a nei ṭha a, a kaihhruaina hnuaiah chuan tunhmaa Government Hospital leh Non-Government Hospital (Private Hospital) inkara neuh neuh awm ṭhinte kha, tunah chuan Covid donaah an ṭangrual hle a, NGO leh kohhran thlengin thawhnona a ṭha a, an ke pen a rual a ni. A leadership-na hnuaiah hian Health, Home, DM & R, DC-te thlengin phei khai rual takin Covid donaah theihtawp an chhuahho a, thawhhona ṭha tak hian rah ṭha pawh a la chhuah thuai i beisei ang u.

Dr. Thangtea hian Covid do hmalakna chungchangah Union Minister hrang hrang te, Central Ministry hrang hrang hnenah Telephone-in Mizoram mamawh hrang hrangte a thlen zung zung a, DO Letter pawh a thawn nghal zung zung a, a remhriatna leh taimak rah Mizoramin kan tel mek zel a ni. Covid-19 vaccine pawh khaihlak awm lovin pek chhunzawm zel a ni a. Kum 18-44 inkarte tana Vaccine pek tur mamawh pawh 1st leh 2nd dose atan 10.22 lakhs dose vel a ni a, hei hi ṭum khatah an rawn pek nghal theih loh avangin a thawh khatna atan 16,340 dose an rawn ruahman a, hemi man bik tur pawh hi Dr. Thangtea hmalaknain pek fel a ni tawh. Tin, Covid Care Centre hrang hranga enkawl mekte tan ni tin cheng nuai 8 vel sen a ngai a, thla khatah cheng nuai 230/- vel zel sen a ngai tih hriain, i ṭangrual ang u.

Dr. Thangtea hi a hmaa tihtur awm reng reng khekkhal ve ngai lo, eng thil pawh ni se, tifel nghal zung zung a, a tawp thlenpui zel mi a ni a. Thil reng reng a thim zawnga hmathlir nei ve ngai lo, a boruak eng zawng zela thlir ṭhin mi a ni. Hun harsa leh khirhkhan ber kan tawh laiin kan damna tura hnathawktu pawimawh ber 'Health Department' a enkawl hi Pathian remruat a ni. Mi dang kan selna ni lovin, tute emaw hun laia Health Minister-te khan tun ang hunah hian Health Department hi enkawl ve ta se, eng nge min thlenpui ang tih pawh ngaihtuah ngam a ni lo. Dr.Thangtea hi Health Department enkawl tur hian a in-fit tawk a, ṭhahnem pawh a la ngai ber a, department chhung a hre chiangin mawng vawm ba ang maiin hna pawh a thawk nasa, Health Department enkawl tur hian a aia ṭha tur midang an awm tawh chuang lo (second to none) a ni e.

Hripui avangin khawvel ram tin kan buai a, Mizoram sorkar, kohhran, Task Force-ten theihtawp an chhuah reng a, Health Minister pawhin a mawng a hung hman lo. Tun hi fak tlak chu infak maina hun a ni tawh. Mihringte hi tlin lohna lai inzawn sak a, inteh inteh chuan tumah tling zo an awm lo. Sorkar emaw, Task Force emaw, a bikin Health Minister-te pawh hi, mahni Party hamthat nan hman tuma an ke pensual lo chan phet kan tumte hi sim tawh zawk ang u. Tun hi Party party sawi lova, a hnam anga ṭanrual hun a ni e. Health Minister tan te, Healh Department leh Police ho tan te, sorkar department hrang hranga thawktute leh Task Foce-te tan bang lovin i ṭawngṭaisak mawlh mawlh zawk ang u. Ram leh hnam anga kan ṭanrual tlat chuan he hripui hi Mizoten kan la hneh ngei ang tih ring tlat ang u.

Mr. Rina, Tuithiang