Inlar khalh nghawng a na

Congress sawrkhar lai khan Minister pahnih khat lar vung deuh bik kha an awm ṭhina chumi direct taka nghawng a nih kher loh pawhin indirect taka a nghawng chu 2018 inthlan dawnah khan tla theia ngaih loh Congress MLA ṭhenkhat kha an chhuaka Congress an tla thum dawp. MNF sawrkhar hun a thleng ve leh a, a hma aia nasa zawk turin Minister ṭhenkhat lar ringawt khel an awm ve leha hei pawh hian nghawng ṭha lo a nei thei tih hriain Pu Hawla hote hre renga an kal loh chuan MNF MLA te hi an kim lo phung lovang tih a sawi theih tawh lova ni.

Indian politics hi han thlir vang vang ila, politician te hian party nghet hi an lo nei mang der lova, anmahni tana ṭha tur ah chuan an party anmahni siam lian tu leh a zar an zo nasat ber pawh an chhuah san hre der lo. Indian politician hlawhtling kan tih zingah hian party pahnih pathum nei tawh hi zuk awm thluaha mawle. Party an chhuahsan chhan chu inang lo mahse an tana ṭha tur ah chuan an chhuak hmiah hmiah mai a, tun hnaia inthlang zingah pawh Mizoram hriat turah chuan West Bengal Chief Minister Mamata Banerjee hi Congress aṭanga chhuakin TMC a dina TMC Chief Minister a ni a, Assam Chief Minister thar tur Himanta Biswa Sharma pawh hi Congress hruaitu hlun a ni chungin Congress hmelma lian ber BJP ah a lut BJP Chief Minister a ni daih dawn a ni.

MNF Minister zingah hian midangte aia thei bik leh duhsakna dawng nasa bik an awm chuan hnathawk nasa ve tho duhsakna dawng lova inhria Minister ṭhenkhat leh an hnuaia an kid General Secretary rual hian an tana ṭha tur ngaihtuah ran in an chhuak ve lovag tih tunge sawi thei ang le?, 'Tling leh pawh ni ila kan tan chance a awm lo duhsakna kan hmu phak lo,' tih mentality an put tawh chuan party chhung a khi ṭhin a ni. Party Office Bearers ni lai han in paih vawng vawng te pawh hi a na dawn a, tunah a sawhkhawk lang lo pawh ni se kum 2023 a hnaih chuan a lang chhuak thei a, sawrkharna siam leh tur hi chu a danglam chho thei tih hi hriat reng a ṭul a ni.

Lalremruata