LLTF lama short cut mai tur
Local Level Task Force lama pawisa pek hi a mamawh miharsate a thleng nghal a, Chief Minister Relief Fund lama pek chu khawl leina leh department pawimawhah te an hmang kual a, direct taka mipui ṭanpui duh tan LLTF lama pek hi ka support a ni.
Sorkar hian sorkar pawisa aṭanga a lei awm hliah hliah a awm a, chumi zingah chuan TrueNAT khawl Covid-19 hrik endikna atana an hman pawh hi a tel a, hei hi chu mipui pawisa aṭanga lei chi a ni lo. Mahse Mizoram sorkar chuan TrueNAT khawl leina atan leh a tih changtlunna atan cheng vaibelchhe 3 chuang fe mai Chief Minister Relief Fund a pawisa tling khawm aṭangin a pawt peng a, hei hi mipuiin pawisa an thawh na chhan a nih vak a rinawm lo. 'Relief fund' a nih angin chhawmdawlna tur pawisa mamawh huna hman tur hi chu sorkar Hospital lama hman tur khawl leina atana hman loh tur chi a ni zawk ang.
Khawl hi chu sorkar pawisa awm sa aṭanga lei chi a ni a, mipui pawisa Covid-19 avanga harsatna tawkte chhawmdawlna (relief) atana an thawh hi chu TrueNAT atana hman hi a inhmeh vak lo. A leina atana senso hi Rs 2,01,15,000 zet a ni a, hei bakah hian a ken tel mamawh (equipments, etc.) leina atan Rs 1,18,68,830 hman a nih thu a inziak tel bawk a ni, sorkar thu chhuah lamah hian - hei hi chu sorkar pawisa liau liauva lei chi tak a ni si.
Chief Minister Relief Fund a tling khawm pawisa an hmanna lar tak leh chu Covid-19 awareness pamphlet print na senso, 3 lakh Copies @Rs. 3/copy Rs 9,00,020 hi a ni leh bawk. Cheng nuai 9 tawp mai an hman ralna en hian LLTF hnena pawisa pek mai hi a awl ve tawh bawk a, hei bakah hian Zoram Medical College-a Covid-19 Hospital dinna leh a kaihhnawih thil leina Rs 84,78,395 tih a ni leh bawk.
Sorkar Hospital mamawh hi chu sorkar sum aṭanga leiin hmang zawk mai se mipui pawisa thawh khawm liau liau cheng nuai 84 hman hi chu mipuiin relief fund atana an thawh sorkar Hospital atana "pawh pên" a ni zawk a ni.
Pawisa nei tán chuan sorkar puihnâ sum hi sorkar ṭanpuina sum bawm Chief Minister Relief Fund lamah pêk zel theih a ni thova, mi rethei harsa lockdown laia mite puihna chu LLTF lama pek hian a short cut a, veng chhung mi rethei zawkte hnen pawh a thleng awlsam zawk dâwn a ni.
Laldinpuia