I BUAI PHILI LO ANG U

Doctor-te meuh pawh an tluk a, thawk harsa puitu oxygen pawh a kangchah a, hripui leng velin nunna a suat phuk phuk karah hian, "Keiin khawvel ka ngam ta" titu chuan, "Thlamuang takin awm rawh u" min la ti zel asin.

KA THI MAI DAWN
Engtizia nge hri vei avanga hlauthawnga mahni nunna lak duh hial thinlungte kan put tak?

Insawithaihna hian fimkhurna piah a kal thlenpui meuh chuan, hlauhthawnna thlarauvin a nangching a, nun philina ruamah a keuh tlu a, chu chuan rilru buai avanga mahni nun ngei lak chakna a hring thei.

KHAWL THLUAK NEI LO
Natna hrik hmuh theihna khawl pawh hian hmuh dik loh a neih ve theih tho avangin, hrik pai ngei nia symptom lang pawh, khawlin a hrik a hmuhsak tlat si loh chuan, a nghawng chu nasa tak a ni, nunna hial channa a thlen theih laiin, natna nei lo pawh, hrik pai nia a hmuh tlat si chuan, hrik pai miah lo kha hrik pai anga sawngbawl a ngai a, nimina mi zinga tlangnel taka boruak fim hip khan, +ve a ni tih puan a nih meuh chuan, rilru ngui leh chauva awmin, mipui thinhrik khawvela indah hran a ngai a. Amah mai ni lo, a chhungte leh a kalna zawng zawng kan chhui zui dan hian, hrik enna khawl dik lo thei hi kan hman thiam loh avanga harsatna kan siam chawp hi a tam tawh mai thei. Mi pakhat hrik pai a hmuh chhuah hian mi sawm rual zet a nghawng buai nghal a, ami nghawngte an chhui zui zelnaah hrik pai lo bawk hrik pai anga a hmuh leh si chuan, nghawng dang tam tak a hring leh a, mahse natna lang chhuak tur awm miah lo, buai taka kan phurh khawm, hrik pai lo anga khawlin a hmuh hun nghak, a hmuh -ve hnua damtea mahni in luma kir leh ta an tam mai.

MAHNI IN LUMAH
Buai phili lova mahni ina inenkawl dam theih ngei pawh, sum tam tak senga enkawl dam kher lova, a aia awlsam zawk tihdan a awm ngei ang. Kan insawngbawl dan dik loh avanga kan inhnawih pherh tak zawk pawh a awm awm asin.

Vai ramah pawh kan Missionary tam tak, natna hrik kai ngei nia inhria, mahse an awmnain a zir loh avanga sawi chhuak ngam lo, mahni ina theih ang tawka inenkawla dam ve leh ta mai an awm nawk asin.

Fimkhurna hi philina nen kan kalpui chuan, rorelna fel aiin buarchuarnaah kan inpawt hnawk nuai thei.

KAN LA VANNEI ALAWM
Keini zawng kan chan bik hi kan vannei hle tih hla ang maiin, vai ho anga sakhaw biakna atthlaka inhnawih pherhna kan nei ve lo, kan tam tlurh ve lo bawk. Mitthi kan neihte ngei pawh hri vei hmaa dam sen ṭul ang chi kha ni lo vin, natna lo nei sa deuh vek an ni. Kan pal tlang tawh hi ngun takin chhui let ila, han phili vakna tur a la awm lo. A ralṭi zawngin kan chetpui mai zawk a ni.

A REH MAI LO THEI TLAT
He hripui hi engtikah nge a reh ṭhak ang tih sawi lawk theih a ni lo, vaccine lah chuan min veng lova, na lutuk lova kan awm theihna tur a ni zawk an ti bawk si. Natna chi khat, khawvela cham ve reng tawh tur a nih phei chuan, a phili lo zawnga kal dan kan zir a ngai hle dawn a ni.

A phili zawnga kan kalpui hian, natna hrik kai lo, ralkhel takin kan siam an awm thei a, ṭul lova sum senna pawh a awm nual tawh ang. Kan phili avanga mi vanduaina lo hlawkpui an awm laiin, khawpuia ni tin inhlawhfate erawh chuan an tuar hle thung.

Phili lovin, rilru fim takin, he hripui leng vel hi i hmachhawn zawk ang u.

KAN ṬIH MAH MAH LO MAW?
Khaw pakhata naupang kum 5 mi, covid +ve chu, an inhnuaia khawsa turin, amahin an chhuktir lai thlalak, whatsapp lamah kan lo hmu a, min dek zawk mai a. Amaherawhchu, in hnuaiah hian a pain ka khawsakpui a, amaha a chhuk lai thla an lo laksak a nih zawk thu kan hre leh a. Rilru a hahdam deuh.

Engpawhnise, hmanah khan naupang pakhat, a +ve avanga ZMC a phurh phei tur, an in aṭanga Ambulance a pan lai, amah chauhva an kaltir lai video hmuh tur a awm tawh. Naupang thinlunga kan tuh kha a rapthlak viau zawk lo maw? A bul velah natna hrik hi a leng chum chum bik em ni? Mahni inveng ran chungin a awmna turah thlamuang takin kan dah zawk tur a ni dawn lawm ni?

He hri hi inkai theih mah ni se, a kai apiang heti em ema ka ṭih mai hi a dik dawn em ni? Fimkhur takin a inṭanpui theih tho asin. Heti em ema he hri leng hi hlauh tur a ni lo asin. Hri veite hnenah rilru lam fel lohna ka tuh palh hlauh ang e. A hrik kai apiang thihna em a nih loh hi maw le.

VAIRENGTE-A +VE DAHNA KHU
Ka unaunu Nutein FB-a a rawn post pawh hian ngaihtuah a va tithui ve le.

"Vairengte Screening point ah chuan positive an hmuhchhuahte hi point thlang lawk, duty post hlui ni awm tak, room hnawk rekruk, rimchhe ṭawp zetah an dahlut nghal a. Mit ngeia hmutu ka ni a, an lainatawm deuh chu a ni. Positive te hi fimkhur thu hlaah an awm hran chu a ṭul ngei a, mahse dam pangngai tan pawha awmna chi loh khawpa hmun ṭawp takah kan indah ringawt mai hi chu a hrehawm ngei mai. Misual thiam loh chang, an sual vanga hrehawm taka awmtirte pawh an ang deuh roh a, chhungte tan chuan lai a na duh deuh.

Positive te hi positive an ni tih an hriat rual hian an rilru nasa takin a shock a, an hnual rawih rawih a, nutling tan pawh mittui a hnai nghal mai. An rilru chutianga a hnual lai tak hian an taksa hahchawlhna tur leh rilru tihzangkhaina tur an mamawh em em a; thawklehkhatah traumatic disorder an nei nghal a, thlamuan an ngai, hnem mawlh mawlh an ṭul tehreng nen Vairengte screening point-a positive te dahna hi chu a hrehawm lulai deuh a ni. Ei tur chu an pe ngei a, thil eina tur hmuna mawi lo khawpa ṭawp ni nen, an rilru thlaphang nen an ei tur dawn ei tum awm ta lo chu chaw hing rim a nam tuau mai a, a bal hnawk em em mai bawk si. A hmun ngai tho pawh hi ni tin sanitize in ṭhutna turte leh mut zal theihna tura siamrem hret dante hi awm se aw.

Hemi hmuna an dah chhan chu Covid care center-a awm turin ambulance an lo nghahtir a. Ṭhenkhat chu zing dar 7 aṭanga awmin zan dar 8-ah ambulance-in Kolasib aṭangin a rawn lam chauh mai si a. Nilenga rilru hrehawm leh thlaphang taka awmna atan chuan a hrehawm lulai deuhin a lang. Thuneitu lam hian hma la se ka va ti em ve aw.

Lalrinliana Colney