SPEAKER PRESS BRIEFING KHA – II
Hemi chungchang kan han post tawhah khan signal chiangkuan loh vanga hriat fuh loh ka neih avangin ka han thual leh a ni e.
1. Speaker a nihna-a Pu Lalduhoma MLA ni thei ngai tawh lo tura ban hlen thei ni-a a insawi mai te kha a huaisen thlak khawp mai. Supreme Court thu lo chuan tumah Election chuh thei lova hrem theih an ni lo si a ni.
2. Noida leh hmun dang danga officer in hmun nei a hriat thu a sawi te kha chu a chuangtlai lehzual khawp mai. A sawina hun leh hmun pawimawh tak kha a zah loh bâkah a chilper pawh kha a uiawm a ni. Noida-a in/ in hmun nei apiang chu corruption thila rinhlelh kai ni-a a sawina anga dawnsawn loh theih a ni lo va. Officer an ni emaw ni lo emaw, Noida-a in hmun neite khuan rawn khing ta se, a buai viau mai thei. Officer hna thiam, corruption laka fihlim a nih vanga Govt. of India Home Secretary a nih laia Politician, Bureaucrats and Criminals Nexus Committee Chairman, Pu N.N. Vohra, a hnu-a Jammu and Kashmir-a kum 10 chuang zet Governor ni ta pawh khan Noida-ah khuan in a nei a ni. Officer dang Noida-a in nei pawh tam tak an awm a, an corrupt vek hauh lo. He thuziaktu ngei pawh hi corruption laka fihlim bâka mimal thil dil ngai miah lo a nih vanga amah hre chiangtu Pu Surendra Nath-an Punjab Governor Adviser a nih laia, Ludhiana ‘commercial area’ hmun ṭha tak a pek, Gurgaon ‘commercial area’-a a ‘invest’ kual hnu-a cheng nuai 192-a hralh ta a ni. Hmun ṭha apianga in neite hi an corrupt fo lo tih hriat a ṭha.
3. Ralte Kawlni tlangval, V.L. Zaithanzama, a nu Sailo a nih vang ngawta Sailo Vuta thlah han tih piap piap mai te pawh kha, Sailo nih hi vantlang ngaihsan nia ngai ni-a sawi ni te khan a ngaih theih a, a zia lo khawp mai. Pu Lalthanhawla phei hi chuan, “Sailo-ah hian a ṭha mi leh a chhe mi kan awm,” a ti a. Sailo apiang hi inchhuang thei kan ni awm lo asin. Ani leh Ruata Sailo leh kei te hi a ṭha mi nge, a chhe mi kan nih va zawh tur emaw ni dawn le?
4. Social Media-a inhmang apiangte chu mi dukdak lo anga a han sawi mai te kha chu David Sailo khan a sawi chiang viau tawh a, sawi belh lo mai ila. Amah pawh hi a inlan ve fo awm asin!
Pathian hming lam tam ber kan ni chunga kan ram hi corruption kairualna ber leh natna ṭihbaiawm pui puiina a bawm nasat ber kan nih si thu hi kan sawi tam tawh hle. Thâwk a phita Pathian hming lam huai tak tak kan la tam em em zel mai hi lem kan chan nasatzia lan chiantirtu a nih avangin bansan a hun tawh viau mai.
M. Lalmanzuala