Kangṭhelh motor neih belh a ngai

Chhim lama kangmei a chhuah khan Lunglei khawpuiah khan kangṭhelh motor kha pahnih chiah a awm tih kha kan lo hre ṭheuh awm e. Chuti a nih si chuan Mizoram sorkar hian motor a lei leh hmasak ber chu kangṭhelh motor hi a ni ngei ngei tur a ni tawp mai - kangmei vanga chhiatna pumpelh kan duh a nih tak tak chuan.

Sorkar hian motor lei tawh loh tur an tiin ka lo hre ve a, mahse chanchinbu lamah khan tun term thar dawnah khan Minister te hman tur kha motor thar an lei suau tih kha a ni leh bawk si a, hei bakah hian sorkar officer motor thar tak tak a la awm leh zel bawk sia motor lei hi tih tawp a la ni lo a ni chek ang chu.

Heng motor kawltu zawng zawng zingah hian mamawh hunah pawh hman tur nei lo an awm lova, kangṭhelh motor chu mamawh hunah pawh hman tur kan nei lova sorkar a mualpho a nih kha.

Sorkar a mualpho tih hian tuna MNF sorkar aiin Congress sorkar kha a mualpho zawk nghe nghe a, a chhan chu kum 10 an sorkar chhung khan kangṭhelh motor lam an lo hlamchhiah deuh mah mah a ni. Home Minister hmasa tih sual hi Home Minister ni lai hian inzir chhuahna atan lo hmang tawh se, kangṭhelh motor indaih lo Police officer lian inah motor pahnih awm si hi chu siam rem ngei ngei a ngai tawh a ni.

Mizoram hian eng lirthei nge a mamawh ber tihin zawhna min zawt ta ula, tui semna tur motor pangngai leh kangṭhelhna tur motor hi a mamawh ber a, chu chu inngaihtuah buai lova lei nghal mai tur a ni.

Vanlalrema