MI FATE LEH COVID-19

May ni 13,2021 (Ningani) khan Chhattisgarh sorkar chuan Assembly building thar sakna tur tender a tihchhuah a cancel bakah Minister chenna leh MLA hostel a sak mek pawh tiam chin awm lovin a titawp vek bawk. A chhan chu hri dona atana state-in a sum neih angte hman a ṭul vang tih Chhattisgarh Chief minister Bhupesh Baghel chuan a sawi.

Chhattisgarh state mipuite himna chu an ngaih pawimawh ber a ni tih sawiin, hri len hmaa Assembly building thar sakna tur lungphum te, Raj Bhavan, Chief minister residence, minister-te in tur leh MLA hostel bakah circuit house thar tur chu sak hna ṭan tawh ni mah se, mipuite himna ngaihtuah hmasak an ngai, a ti a, hemi atan hian sum tam zawk mamawh a nih avang leh inrenchemna kalpui a, sorkar sum neihte chu hri dona atan leh hri leng vanga harsatna tawkte chhawmdawlna atan dah hmasak a ni. State-in dinhmun harsa tak a hmachhawn laia kan sum leh thil neih dangte building thar sakna atana hman chu mipui dinhmun himna hlamchhiahna a nih avangin Sorkarin tender a chhuahte hi cancel a nih bakah hnathawh kal mekte pawh tihtawp a ni, a ti bawk.

Mizoramah chuan sorkar hnathawk, mimal, NGO leh Kohhran ten Cocid-19 dona tur sum an thawh chur chur a, chutih laiin Sorkar chuan duhsak zawngte hausak belhna tur PAHOSS hnuaiah pawisa vaibelchhe tel a sem a, Rawmi (Botanical name–Dendrocalamus sikkimensis) chi supply-tu tur tender chhuah mek bawk.

May ni 5.2021 (Nilaini) khan Mizoram sorkar sum dinhmun a that loh vangin Mizoram sorkar chuan FMGR&W (Federation of Mizoram Government Employees & Worker) te hnenah an ni khat hlawh a dilna Vanapa Hall-ah FMGR&W in an ngaihtuah ni tak khan, SEDP hnuaia cheng nuai 63 senna tur, "Construction of Motorable Slab with Railing near Luangmual Hall" siamna tur chu Chief minister Pu Zoramthanga'n a lo approved ve daih thung.

Hetianga sorkarin Lockdown min puankhum leh ngawt ang hi chu ni tin inhlawhfaa ei zawng tan chuan a nghawng a na em em a ni tih hria in, Delhi sorkar khu chuan inhlawhfa Migrant Worker leh Labour te Labour Welfare Board-a in register-te chu lockdown a puan pawh khan an state chhuahsan lo tura a hriattir bakah, Lockdown chhung chu ni tin inhlawhfa chhungkaw tinte tan hian chenna, tui in tur, chawhmeh leh Buhfai a pek bakah thla tin Rs.5000 a pe mek bawk.

Tin, Labour Welfare Board-a in register lote pawh a thara tih phal a nih bakah registration thi tawhte pawh tih nun leh a phalsak vek bawk. Hei hi a ni, ram mipui himna leh harsatna sutkian tuma mite hmalakna chu.

Kan ramah chuan mahni Party mi leh sa Social Media-a thil post ṭhinte thlenga sorkar beih an tawk titih a. India ram state tam takin ram tana an pawimawhna an hriat em avangin Thutharthehdarhtu (Journalist) te chu Frontline Worker-ah an puang a, duat theihna kawng tinrengah an duatin an zah thiam em em a, an hriselna leh himna kha ram tan a pawimawh avangin an dah pawimawh em em vek mai. Hetih lai hian Mizoramah chuan Covid-19 Vaccine la tur pawha an dil chawp a ngaih bakah Chanchinbua fakna (Advertistment) te pawh tihtawp sak lailawk hialte an nih bakah sorkar hmakhalha thuthar thehdarhah hialte a sorkar zawk zawkin a ngai ta dah a, chutih laiin a Copy pawh hmuh tur awm lo Covid-19 chungchanga mipuite zirtirna nia sawi Pamphlet siamna atan nuai 10 dawn a seng leh si a ni.

Heng zawng zawng ka ngaihtuah hian, tunlai hla pakhat, 'Mahse kan tan, Vana rah ang, Engtikah mah kan neih ve loh tur' tih hi ka rilruah a awm ta reng a.

C.Lalrochhara