CENTRAL-A BJP, CONGRESS EMAW RULLING PARTY NIH KHER A NGAI LO

Mizorama political party ding hmasa ber Mizo Union hruaituten 1974-a Congress party-a an inchhûn luh khân a chhan hetiang hian an sawi a, “India rama kan awm a nih chuan regional party anga din ai chuan, anmahni party-a ram rawngbawl chu hmasawnna leh kawng tinrenga Mizoramin kan ṭhatpuina tur a nih dawn avangin, Congress party-a inchhun fin hi Mizoram tân ṭha tura ngaiin thu tlukna kan siam a ni,” tiin. He an thusawi hi thil dik tak leh pawmawm tak nia ram mipuite pawhin kan rin avangin central zêm zen nge nge tih leh rulling party nge nge i vote ang u tih âu hla zawmin chung party-te chu kan thlang tling tawh bawk ṭhin.

Mahse, Kejriwal-a party A.A.P-in Delhi U.T-a sorkarna 2015 aṭanga vawiin thlenga ram leh mipui tân hna an thawh dan hian, central-a BJP emaw Congress emaw rulling party aṭang chauhva ram leh mipui tâna hmasawnna leh changkanna thlen theih a nih bik lohzia A.A.P party sorkar Kejriwal-a leh a hote hian an lan chiantir hle, chu chu tawi tea tarlan kan tum chu a ni.

Pu Kejriwal-a sorkar hian hna hmasaa a neih chu mahni kawtkaia office hrang hrang dawr theihna (Doorstep Delivery of Services) a siam a, mi tupawhin entir nan, driving licence, Birth certificate etc. a mamawh chuan mahnia sum leh tha senga office-a kal lovin, ama In aṭangin sorkarin call centre a siamah phone-in a thil mamawhte a hrilh ang a, call centre nghaktu chuan a thil mamawh hmuhna turin thil ṭulte Eg: Adhar card , voter I.D etc. nei kim turin a hrilh ang a, a diltu chuan thil ṭul zawng zawng a neih kim hunah call centre chu be lehin, anni chuan diltu inah kalin chung certificate leh a ṭul ang ang an la ang a, engkim an peih fel hnuah dâkah thawnin diltu chuan ama kawtkaiah ngei certificate etc. chu a lo dawng tawh mai dawn a ni, hemi atan hian Rs. 50/- a chawi ve ang.

Hetiang ti tur hian call centre-a duty tur leh a ṭul anga thawktu ṭhalai tam tak mamawh a rawih an ngaih avangin ṭhalai hna nei lovin hna an neih phah ṭeuh bawk, office dawr tur hian sum leh hun tam tak kan seng ṭhin a, vai ramah ngat phei chuan thawktuten thamna an phut deuh zel bawk a, hun tam tak sen ral a ngai bawk ṭhin.

Kejriwal-a’n hetiang ruahmanna a siam hian Delhi mipuite chu a ti lawm em em a. India ram state zawng zawng zingah Delhi sorkar chauh hian he scheme hi siamin a ti hlawhtling a, Mizoram sorkar pawh hian ti ve se, ram mipui kan va lawm dawn êm.

Pu Kejriwal-a’n a ngaih pawimawh ber, central BJP-in party rilru dik lo tak an put avanga vawiin thlenga hlawhtling thei lo chu, kawtkaia mipuiten ration an dawng thei lo hi a ni. A.A.P sorkar chuan party induhsak avanga retailer leh department eiruk theihna awm nuai bo nan, kawtkaia ration sem hi a ngaih pawimawh ber a nih laiin central-a sorkar mek BJP thupek angin Delhi Lt. Governor-in Kejriwal-a ruahmanna chu a pawmpui duh lova, hemi avanga Pu Kejriwal-a thinrim, kum 2018 budget session-a a au chhuak chu Kristian Chief Minister te aw râwl ni awm zawk a ni, “He ruahmanna ṭha tak Lt. Governor-in a lo hnawl avang hian Delhi mipuite’n kan ngaidam dawn lova, chung lam pawh khian a ngaidam lovang, a thih hnuah rorêltuin a thlarau hetiang hian a lo chhuahchhal ngei ang, Engvangin nge Arvid Kejriwal-a’n mi retheite tana ṭha tak tur ruahmanna a siam lai khan, i lo pawmsak duh loh, Lt. Governor thlarau hian a chhan ve ngei a ngai ang,” tiin.

A.A.P sorkarin ram leh a mipuite ṭhatna tur a ruahman zawng zawng deuhthaw central BJP-in Lt. Governor chu pawmsak lo leh ti khawtlai tura a tih ṭhin avangin June 2018-ah C.M leh a cabinet-te Governor in kawtah kar khat chuang chaw an nghei a, minister hrisel lo deuhte chu an chawnghei avang khan damdawi inah dah luh hial an ngai a ni. Chief Minister leh minister, mipuite hamṭhat duh avanga chaw nghei khawi State-ah mah sawi tur an la awm lo, State dang politician hotute chuan an mipuite fuihpawrhin buainate an siamtir zawk ṭhin a, thihna hial pawh a thleng tawh ṭhin.

Chaw nghei mai duh tawk lovin India ram rorelna sâng ber, Supreme Court-ah zualkovin, Supreme Court chuan heng thil pathum (1) Police (2) Public order (3) Ram leilung chungchang thu tih lohah chuan Delhi sorkar hian Lt.Governor hnena pawmpuina dil kher ngai lovin thu tlukna a siam thei tawh ang tiin Kejriwal-a te thiam a chantir a, hemi hnu hian hmuh theih leh hriat theihin developement chu kawng hrang hrangah a zuanin a zuang a ni ber.

Ration kawtkaia lak theih tura Kejriwal sorkarin kalpui an tum mêk laiin March 24, 2020-ah BJP sorkarin Rajya Sabha-ah bill passin Government of National Capital Territory of Delhi Amendment Act (GMCT) tih niin dân puitlingah a siam nghal a. He dân hian Lt. Governor chu Chief Minister leh Cabinet aiin dahsan a ni ta zawk a, 2018-a Supreme Court-in thutlukna a lo siam tawh leh India Constitution Article 239-nain Delhi Legislature leh sorkar thuneihna a pêkte tih danglamsakna a nih avangin tunah hian Supreme Court-ah an zualko leh mêk a ni.

Delhi sorkar ang hian Mizoram Chief Minister chuan, harsatna a tawh awm mipuiin kan hre lo. MNF party phei chuan, hmasawnna nasa zawk Mizoramin kan neihna tur nia ringin NDA a zawm ve ta zawk a. BJP sorkarin eng ang pawhin min duhsak mah se, a hmangtu rilru kan dik leh si loh chuan ram tan, mipui tan a chhenfakawm chuang lovang.

Central-in duhsak lovin, an hmalakna ṭha tak takte dansak zel tum mah se, beidawng mai lova ram leh mipuite tana theihtawp chhuahtu Pu Arvind Kejriwal-a leh a hote an hlawhtlin theih aṭang hian kan hruaitu hmasaten Central zêm zen, Central fatlum leh rulling party aṭang chauhva ram leh khawtlang hmasawnna thleng thei nia min lo zirtir ṭhin chu Pu Arvind Kejriwal-a hian a dik lo tih min hriattir chiang hle.

MC. Lalrinthanga