Mipui relief na tur nge sorkar Relief na tur?

Chief Minister's Relief Fund sum hman dan hi mipuiin kan ngaihtuah vak loh laiin Congress Party khan nikum lam daih tawh khan an ngaimawh thu an sawi a. Party-party sawi lova ngaihtuah ve pawhin Mizorama mipui pawisa thawh khawm (ṭhenkhat chuan naupang khawl­bawm an chhu keh tihte kan hmu) sorkarin a hmanna han hmuh chian chuan mipui puihna ni lovin sorkar puihna lamah hman a lo tam hle a nih hi.

Mipui relief (chhawmdawl) na turin pawisa (fund) chu Chief Minister hnenah chhun khawm a ni ta a, chumi hmang chuan Chief Minister rem tih puina nen, Covid-19 avanga hnathawk thei lote leh chhuan chhamte leh mirethei harsa zualte an chhawmdawn dawnah mipuiin kan lo ngai a, mahsela chân loh khan­ah thil a lo chhuak a.

Civil Hospital atan leh a chhunga khawl dahna atan pawisa thawhkhawm chu hman a lo ni ta daih mai le!

Internet aṭanga zawna an sum hmanna ṭhenkhat chauh hi han hai chhuak ta ila. Truelab Quattro Realtime Quantitative Micro PCR Machine (Truenat) sawm (10) leina Rs 2,01,15,000 tih hnuah Truelab Quattro Realtime Quantitative Micro PCR Machine (Truenat) ken tel mamawh (equipments, etc.) leina Rs 1,18,68,830 tih a han awm leh a. Hei hi chu khawl leina a ni a, infrastructure chhunga rin luh tur a ni si a, mipui hi chuan 'relief' atan pawisa an thawh a, he khawl leina atana senso chin ringawt pawh hi thawhkhawm aṭangin Rs 3,19,83,830 a ni a, cheng maktaduai 31 a tling ta a ni.

Hei hi sorkar hian ama pawisa (budget) aṭangin lei mai se, mipui rethei zawk ṭanpuina atan hmang dawn ta ila, chhungkaw pakhatah Rs 2,000 zela sem pawhin chhung­kaw 15,991 hnenah ṭanpuina pek theih a ni. Sorkar khawl leina tur ni lovin ṭanpui ngaite ṭanpuina turin pawisa hi thawh a ni a, tuna hmanna hi chu sorkar thil atan a ni ta daih a ni.

Sum hmanna ngai­mawh awm zual ṭhenkhat chu:- Zoram Medical College-a COVID-19 Hospital dinna leh a kaihhnawih thil leina Rs 84,78,395; Covid-19 awareness pamphlet print na senso, 3 lakh Copies @Rs. 3/copy Rs 9,00,020; Taiwan Sawrkar aṭanga thilpek dawn Delhi aṭanga phurh thlenna Rs 90,624 tihte a ni. Hei hi nikum July thlenga a hmanna an tar chhuah aṭanga hmuh theih chin a nih avangin a hmanna kimchang dang hriat theih a chakawm rualin a huphurhawm tel em em bawk a ni.

Sorkar sum hmanna tur chi a awm a, mipui relief sum hmanna tur pawh hi a awm hrang ve lo maw? Ngaihdan i thawhkhawm ang u hmiang.

Malsawmdawngliana