COVID CARE CENTRE-A AWMTE FAISA RINGIN KAN AWM

Tunah hian Covid 19 hri ka lo kai ve avangin Durtlang BSUP CCC-ah ka awm ve mek a, tun dinhmunah Durtlang BSUP ringawtah pawh mi 350 chuang Covid vei kan awm mek a, nitin kaithar an rawn luh belh zel bawk. Aizawlah CCC 13 lai a awm bawk a, Mizoramah CCC 48 a awm mek bawk.

Durtlang bikah hian tuna awm mek mi 350(400 kan chuang leh tep tawh ang) vel hian nitin zing leh tlaiah chaw leh chawhmeh tui tak tak kan dawng ziah a. Kan chaw dawn hi chawhmeh ngai reng ni lo, chi hrang hrang kan hmeh reng mai. Sa pawh Sunday-ah Vawksa leh Arsa an sem ziah.Kan vawikhat chaw ei hi a tlem lam mi pakhat ei Rs.150 pawhin chhut ila, tuk khat kan chaw ei man hi Rs. 52,500 tihna a ni a, zing leh tlai kan chaw ei belhkhawm phei chu Rs. 105,000 zet a ni. Covid veite hi a lo berah ni 10 chhung tal Ragt kan in-test hma kan awm ngei ngei a ngai a, ni 10 aia rei awmte pawh an awm. Tuna BSUP-a awm mek mi 350 chuangte hian ni 10 chhung ringawt pawhin Rs. 10,50,000 (Cheng nuai 10 leh sing 5) lai mai kan chaw eiah sawrkar sum kan lo hmang tihna a ni.

Ni 1 danah PHE tui a rawn haw reng bawk a, heng PHE tui zawng zawngte hi a thlawn a ni lo ang, Sawrkarin min tumsak vek a ni.

Tuna kan sawi hi Durtlang BSUP CCC chauh a ni lenghal a,Aizawlah hmun 12 dangah sawrkar enkawl CCC-a awm mekte nen phei chuan ni khata a thlawna chaw kan dawn man zat hi a tam tham khawp ang le.Health Minister-in Mizorama CCC enkawl nan ni khatah cheng nuai 8 vel, thla khatah cheng nuai 230 vel kan seng a tih te kha a lo dik hmel hle mai.

Heng ka han sawi chhuahna chhan hi sawrkar ka tan vang a ni lo a, tunlai hian Covid 19 veite tanpui nan CM Relief fund for covid 19-a chhun luh ai chuan LLTF emaw direct-a pek a tha zawk tih thu a lar viau mai a, Sawrkar hnathawkten Covid 19 an do ve nan an ni khat hlawh an thawh vete chu khawnge a hman chhuahna tih a lar viau mai bawk a.Khang sum chhunluh te leh kan MLA leh Ministerten an thla hlawh leh MLA fund CM Relief funda an lo chhun luh zozai tawhte, The Mizoram (Containment and Prevention of COVID-19) Act, 2020 hmanga dan bawhchhia an lo chawitir tawh tlingkhawm te, Sawrkar hnathawk ni 1 hlawh tlingkhawmte leh CM Relief funda Pawl leh mimal ten sum an thawhkhawm te bakah Central sawrkar atanga Mizoram sawrkar puihna covid dona sum lo kalte kha keini Covid vei mek te leh lo vei tawh te leh la vei leh turte chenin Mizoram Sawrkar enkawl CCC-a awmte chuan kan chhawr hle a ni mai lo maw

Mizoram Sawrkar a insen nasat dan tur han chhutpuite hian Sawrkar enkawl CCC-a awmte Mizoram Sawrkarin a thlawn veka min chawm leh min enkawlna senso hi fak rih loh phal rual a ni loin ka hria!

Heng bakah hian VAIRAM leh MIZORAM kan inenkawl dan leh Covid kan inbuaipui dan hi ngaihven chi niin ka hria.

Covid-19 hripuiin nasa takin India ram a nuai mek lai hian Capital City Delhi CM chuan Covid-19 Positive a enkawl hneh lo mai pawh ni loin Damdawi In Khum pawh a pe thei lova, damlo enkawltu mamawh enkawltu nei si lo, Oxygen tel lovin kawtlaiah te an mu pheng phung mai a ni.

Mizoram CM ve thung chuan a ram chhung a enkawl bakah State pawn Delhi Mizoram Houseah ngei amite tan Covid-19 damlo enkawlna hmun a din a.

Damlo damna duhten damna beiseia, state pawn pan thin khan Covid-19 do kawnga, hma lakna leh damlo enkawl kawngah Kohhran, NGO & Sawrkar tanrualna avangin State pawna kan unaute an sahimna leh enkawlna thla hlelin an lo haw sung sung ta mai. Damlo a thlawnin CCC & ZMC etc-ah enkawl an ni bawk.

Health care scheme-a inziak lutte tan Cheng Nuai 2 thleng inenkawlna senso an la Bill thei zui.

Heng zawng zawng han ngaihtuah hian tun dinhmunah chuan sawrkar hi morale support pek hunlai tak niin ka hria.Lungawina reng nei lo ang maia thil chik chiang lova phun reng mai pawh hi a hun lo viau a ni, kan boruak a chhiat em hi, tanrual hun a ni,3rd wave thlengin Zoram hian engnge kan hmachhawn dawn kan hre si lo.

“Aw Pathian, kan ram hi hrereng la.”

Ricky Vanlalnghaka