VERVEKNA TEL LO NI RAWH SE

Hripui nena kan inbeihnaah mi tinin kan thiam tâwk leh phâk tawkin hma kan la ṭheuh mai a. Kan theih tawkin Sawrkarin inkaihhruaina dan a zam te pawh zawm kan tum hram hram a. Hetia chawlhkar thum ngawt a inzawm zata inkharkhipna puitling kan nei pawh hian harsatna tam tak min thlen mah se, kan tuar hram hram ṭheuh a ni. Chutih laiin hriat loh vang emaw, mahni hmasial vang emaw-a dan lo bawhchhia chu an awm teh meuh fo mai a, chung mite chuan hremna tawk fang pawh an tuar zel a nih hi.

Chutih laiin mamawh leh rokhawlhna bik damlohna leh chhiat tawhna dangah chuan Sawrkar hian a awm tawka mi ngaihhnathiam dan pawh a hre viau zel a ni.

Kan Sawrkar Pui pawh a buai hle : Kan thil tawn mek hi Mizoram chauhvin kan tawrh ni se chuan kan buaina a ziazang deuh vang. India Sawrkar pawhin min vil bik thei ngei ang. Mahse khawvel pumpuiin he hri hi a rualin kan tuar vek a, han inṭanpui tur chuang hi kan awm meuh lo va. India sawrkar ropui tak pawh hian state leh UT eng emaw zat a vil a ngaih avang hian keini Mizoram tan a insawrbing ngawt thei bik lo. Min duhsak fâl thei ngawt bik hek lo. Chuti chung chuan harsa takin sum min la sih chhuahin banzaina hmanrua (vaccines) leh oxygen te pawh min la thawn reng thei a, a lawmawm em em a ni. Chutih laiin India ram hi khawvela he hri tuar nasa ber pahnihna a lo ni ta hial a, ni khata kai zat pawhin nuai 4 a pelh hun a awm ta hial, a rapthlak hle a ni. India ram hmun tam takah oxygen leh damdawi in khum te an indaih lo em em a, mitthi halna hmun thlengin an inchan lo va, thu neitute lu a hai hle mai.

Mizoramah pawh hian nikum March thla aṭanga sawrkar hmalakna kha a ṭul dan ang zela tidanglamin kan la kalpui zel a. Kumin February aṭanga April thla tir thleng phei kha chuan kan ziaawm hle a, a vei lai pawh 10 hnuai lam kan nih laite kha a awm chho va. Kan inkhuahkhirhna pawh kan thlah dul chho ṭan viau kha a ni a. Mahse vawiinah chuan a ngaihna awm lo deuhthaw khawpin hri vei kan pung ta a. Hmanni lawk May 17th kha kan kai san ber ni niin mi 239 zetin ni khatah an kai a, a vei laiin 2000 an pel a, thihpui pawh a khat tawkin kan awm ta reng a nih hi. In ṭawngṭaipui sen loh khawpin kan inkai nasa ta a ni ber awm e.

Sawrkar a thawkrim : He­tiang taka thliar bik pawh nei lova min suasam mektu hripui kan dona kawnga Sawrka hma­lakna hi famkim lo mahse, an thawhrimna hi haider rual a ni lo. Theihpalingkawha thawktu hrang hrang doctor, nurse leh para-medics te thawh hahzia hi vantlang hian kan hre tawk lo mai thei. ZMC-a he hri veia damlote enkawltu Nurse zingah kan fanu a awm ve avangin engemaw chen chu Health Departmentin a bulṭhuma an thawh dan hi hre ve nualah ka inngai a. Damdawi ina thawk emaw CCC leh CCCC-a thawk zawng zawng te hi thlan kotlanga ding ang deuhvah an ngaih theih hial a ni.

Kar thum vel inzawm zata riahchilha an duty hnu-a in lama an lo haw pawhin fimkhur chitin renga fimkhur pui an ngai a, fate ti lovin kan ṭih ru deuh hrû mai a ni. Vanduaithlak taka a tidamtu tur berten an han vei leh tho mai tih han hriat te phei chuan a lungchhiatthlak thei hle a ni. IMA chhinchhiah danin India ramah doctor 275 he hri avang hian an thi ve ta. Nurse leh thawktu dang pawh an thi ve ngei ang. An lainatawm hle a ni.

Hetih laiin a hnarkaitu state sawrkara Disaster Management chelhtute hi an fakawm thlâwt bawk a ni. Hetianga rikrum thil ngaihtuah hi a hahthlak em em mai a. India ramah Jammu leh Kashmir tih lohva ram buai ber Manipura thawk ṭhin ka nih avangin tuna Mizoram sawrkara hotute mawhphurhna leh an rilru leh taksa hah dan tur chu ka zu hmuh pui ruak a ni. Hetiang rikrum thil hmachhawn hi chuan Chawlhni a awm thei lo va, Thawhlehni a ni reng mai a ni. Hah a sawi theih loh.

Kan hotute hi mihring ve mai bawk an nih avangin a chang chuan han rah pelh hlek emaw thupek han tihdanglam hlek emaw chang an nei a nih pawhin dem ngawt chi an ni lo. An dinhmunah ding ve ila, kan tiṭha zawk chuang hauh lo vang. Hospital mai ni lo hmun hrang hranga hri veite enkawlna tur an siam te, vaccine lak dan tur an ruahman te leh Airport-a khualzin lo haw te hruaina tur bik sawrkarin a ruahman zel te hi (chuan man pek ngai pawh ni sela) thil namen a ni lo. Sum luh tam dan tur pawh kan suangtuah thiam mai awm e. Mizoram chhunga mi te mai ni lova Mizoram pawna mizote thlenga buaipui an ngai hian sawrkar hna a tihautak zual hle bawk tih kan hre awm e.

Party politics tel lo sela : Sawrkar hmalakna te kan fak tur a nih laiin politics-a thangṭhat lak tum ang ziazanga sawrkar kan fak uchuak a nih chuan a dik hauh lo vang. Sawrkar chuan a mipuite chungah mawhphurhna a nei a, chu mi hlen chhuah chu a tih tur a ni. Bawih ṭhahnem lovah an inngai tur a ni. Thil engemaw ho tê têa sawrkar fak lutuk tumna avanga thu chhuah siam chiamte hi a ropui hran lo. Chutiang bawkin kan sawrkar a nih loh vanga fakna turah pawh sawrkar fak hreh tlatte kan nih chuan thil dik lo tak a ni bawk dawn a ni. Tirhkoh Paula chuan, “Hmangaihna chu vervekna tel lovin ni rawh se” (Rom 12:9:) a lo ti tawh a. Sawrkar kan fak pawhin party politics vervekna pu-a thangṭhat lak bik tum ni lo sela. Sawrkar siam ve lotu te pawhin sawrkar khalh ngil kan tumna avanga a fel tawk lo lai an sawi te hi a ṭha tho mai.

Chief Minister’s relief fund pawh hi a thei tan chuan thawh hrehna tur a awm lo ve. Politics khelhna ang dawn dawna hmanga thawh duh loh emaw, a thawh duh lotute sawisel zui emaw te hi awm kher lo bawk sela a hahdam ang. He hri beih letna atana ṭangkai hauh lo thil sawrkarin a buaipui emaw, kawng danga sawrkar demna tur emaw kan nei a nih pawhin he hun thimah hi chuan lo dah ṭha rih thei bawk ila a ṭha khawp ang. Hri kian hunah kan la X-ray dawn nia.

Mipui lam hian thu chu kan awih thei tlangpui a. Khawi laiah emaw fimkhur lo zual te lo awm mahse, a tlangpui thuin kan ti ṭhain a lang. Induh thawh deuhva sawi dawn chuan inhlat hi chu kan tih theih loh ber a la ni reng mai. Dawr leh bazar hawn hunah mawlh hian kan fimkhur seng lo tih a lang fo mai. Veng kilkhawr deuhvah phei chuan intlawhpawh pawh kan pawisa vak lovin a lang. Fimkhurna kawngah intuai thar leh kan mamawh hle a ni. He hri do kawngah hian pawl pawl sawi lovin ṭangrual thap ila, chu chu mizote kan vaia kan hming mawina tur a ni a, chu kan hmingmawina chuan khawvel a deng chhuak thei hial dawn a ni.

Tu party emaw tu mimal emaw hmingṭhatna mai ni lovin Mizote hmingṭhatna tur, kan zaa kan lu kan lek san theihna tur a ni ngei ang.

Hmabak a la ko : Tha kan la thlah thei mai dawn lo va. A vâwr tawp hi eng tikah nge kan thlen ang a, engtikah nge a rawn kuai thlak leh ang tih sawi fak theih a la ni lo. Fimkhur tak, mahse rilru fim tak si-a kan kal zel a la ngai dawn a. Sawrkar lam pawhin tun aia inkhuahkhirhna chak zawk a hman te pawh a la ngai hial mai thei. Hmelma thuhmun kan beih rawn mek lai hian kan thupui ber chu thinlung hmun khat pu-a ṭanrualna lo ni sela. Mi dem hman a ni ta lo ve.

P.C.Lawmkunga