CCCC hi a va han ṭha tak em!!

Covid-19 hian kan hriat ngai loh thil thar a rawn hring chhuak zel a, chumi zinga pakhat chu Community Covid-19 Care Centre hi a ni. He mi hmang hian Mizoram sorkar sum leh pai hmang miah lovin kohhran leh khawtlangin hmun tam takah Covid-19 positive an enkawl a, hei hian sorkar pawisa senna tur pawh nasa takin a chhawk dawn a ni.

Mizoram sorkar chuan tlawm leh zah pawh dawn lovin, "Kan thei ta ngang love, kan sumin a tlin tawh lova, sorkar hnathawkte pawisa tel lo chuan Covid-19 hi kan do thei ta lo a ni," tiin sorkar hnathawk hnenah kut an dawh ta tawp mai a. Sorkar hnathawkte pawhin tlanchhiat mai tum bik lovin sorkarin puih a ngaih chuan pui turin an sum leh pai an rawn thehchhuak dawn tih news lamah kan lo hmu tawh a ni. Hei hi thil lawmawm tak a ni.

Sorkar hnathawk han tih hian a huam a zau khawp mai. Covid hri a len hnua zan tam haw tlai phah, tlaivar phah ṭhak ṭhak Health Department, Police Department, DC Office hrang hrang, Chief Secretary Office, Disaster Management Department anga thawktute hi chu pawisa thawh tura phut chi pawh an niin ka hre lova, mahse Covid chhunga "Paid Holiday" lo hmang ve char char mai sorkar hnathawk hi an tam em em a. Heng mite hnen aṭang hi chuan ni khat hlawh pawh ni lovin ni tam tak hlawh khawn hi chu sorkar tan inthlahrun tur pawh a ni lovang, chutih lai karah chuan a hnathawk hah zual hi chu pawisa thawh tir ve loh a ṭhat zawk ka lo ring ve a ni, mahni mimal ngaihdan han sawi ila.

Sorkar berin, "Pawisa kan nei tawh love," a tih takah chuan Kohhran hrang hrangin, "Kan Kohhran Hall ah hian positive chu an enkawl theih ang," an rawn ti ta sup sup a. YMA an rawn inpe ve leh bawk a, YMA Hall an rawn thawh a, VC leh Local Council pawhin an huam chhunga building remchang an rawn ti ve zel a, chuta positive damlo enkawlte chu sorkar pawisa ni lovin kohhran/ khawtlang chuan an ei leh in tur, an tui hman tur leh mamawh hrang hrang an pe ta tawp mai a, CCCC hi a va han hlu tak em! Hei ngei hi a lo nih hi Vantirhkoh chu le. Vantirhkoh chiang mang lo kan buaipui laiin CCCC hi Covid veite tana vantirhkoh chu a lo ni chiang e.

Hei hi kan Zonunmawi nen pawh a inhmeh hle a ni, CCCC atana mahni building hawh tirtu zawng zawng leh sum leh tha seng zawng zawngte hi an fakawm hle a ni. Hetiang lam positive news hi sawiho uar ila, Whatsapp lama thu lawi lo mai mai thehdarh ai chuan rilru a ti hrisel zawk a ni.

David Lalthansanga