Sorkar i ṭawiawm ang u khai...

Tun hnaiah Chief Minister's Relief Fund lama pawisa dah lut ve lova LLTF hnena ṭanpuina pek mai ṭha zawk tih inzirtirna a lo lut nasa a, hei hi thil ṭha awm taka lang, a nihna takah chuan thil ṭha lo zawk thlen thei a nihna lai a awm.

Entirna hmanga hriat fiah tum ta ila:- Pathian ram thilpek hi Synod-ah chhung lut duh miah lo ila, Tualchhung Kohhranah chiah chhung lut ta ila, Synod chuan thil hrang hrangah an hmang kawi a, a ṭhente phei chu Synod motor leina atan an hmang a, a ṭhen chu Bookroom lamah daih an hmang ang. A ṭhen chu rawngbawlna ki pawh nia lang lovah an hmang a, chuvangin Tualchhungah chiah hian thawh ila an hmanna a dik ber, tiin sawi ila tuna CMRF lama pawisa thawh lova LLTF lama thawh rawttute duh dan nen hian a inang vel a ni.

Chief Minister's Relief Fund awmzia chu amah kan Chief Minister kha pawisa kan va pe dawn tihna lam a ni lova, CM office ah Mizoramin Covid-19 a dona tur pawisa kan va thawh ve dawn tihna a ni a, hriatthiam loh tur a awm lo. Hetianga ram puma ṭan rual theih tluk hi a awm lo a ni.

Entirna dang han siam leh zui ta ila:- Synod lam­ah thawhlawm thawh tawh lovin Tualchhungah hian thawh ta vek zawk ila, Mission Veng leh Dawrpui Kohhran chu tun aiin an lian ngei anga nimahsela Ramthar lam chu an ngaihtuahawm dawn a, Synod pawhin office hmunhma leh inenkawlna a nei chau viau ang. CMRF ah kan thawh loh chuan veng lianin pawisa ngah mahse a harsa deuhte hi tunge ṭanpui ta ang le? tih hi zawhna awm thei ta chu a ni.

Engpawh chu ni se mahni ngaihdan dana thu lo sawi vak lovin sorkar hi i ṭawiawm phawt mai teh ang u. CMRF ah hian lungrual takin pawisa hi thawh dial dial ila, sorkar chuan mipuite tan bawk a rawn hmang chhuak leh dawn a, chu chu kan zavaia tan a ni si; tumahin CMRF lama thawh loh hi chu i sawi tawh lovang u khai.

Chutih rual chuan CMRF hman na tur leh hman lohna tur pawh hi sawi chian chu a ṭha a, khawl leina atana ṭanpuina (relief) sum lo hman hi chu sorkar hian ti tawh bik lo se. Sorkar pawisa dang aṭangin Covid-19 dona khawl te hi chu lo lei se.

CMRF hi ṭanpuina leh chhawm­dawlna atan liau liaua hman ni se mipuiin CMRF ah pawisa an thawh phur phah sawt leh dawn si a.

K. Lalhriatpuia