SAWI HLAWH CM RELIEF FUND HMANNA CHU LE (Sorkar hi CMRF hmangin a lo in relief reng em?)

Chief Minister’s Relief Fund hman dan chungchang hian Mizoram-ah hmun a chang thuk hle a, ngaihdan pawh a inang lo thei viau ang. CM social media account leh I & PR website lamah a hmannate puangzar ve fo mah se, a hlawma tarlan a awm vak ngai loh avang leh thla a vei hnem tak deuh avangin CM Relief Fund hman dan dik tak hi mi tam tak tan a hriat loh theih viau mai a. Chuvangin, a zavaiin tarlang vek thei bik lo mah ila, kan hmuh theih chin vaibelchhe 21 leh nuai 40 hmanral dan hi i lo bihchiang dawn teh ang.

Sap ṭawnga “Relief” tih hi Pu Buanga Dictionary chuan ‘inchhawk zangkhaina, chhawktu, rethei ṭanpuina’ tiin a hrilhfiah a. CM’s Relief Fund kan tih chuan ‘CM-in harsatna tawkte a ṭanpuina tura pawisa dah’ tihna a nih ber chu. Tunhma pawhin CM Relief Fund hi pekchhuah a ni fo tawh a, mipuiin kan hriat danah pawh sorkar account tibuai lo a CM hminga harsatna khirh bik tawkte chhawmdawlna tur liau liau a ni ṭhin. Hetiang a nih avang hian covid hripui len hnua sorkar thila CM Relief Fund cheng vaibelchhe engemawzat hman a awm ni a lang hi Mizoram mipuiin kan hrethiam thei lo a ni ber e. Opposition party-te mai bakah Mizoram mipui kan phun luih luih a, May 17, 2021-ah Lockdown avanga chhuanchham a awmte chhawmdawlna tur cheng nuai 91.50 lai sanction a nih phah ta a ni, hei hi mipui tan hnehna a ni e.

A hnuaiah hian CM Relief Fund hmanna hrang hrang tarlan a ni a, tuna a hmanna kan tarlan theih zat hi cheng vaibelchhe 21.40 a ni. I & PR lamin an tarlan danin May 19, 2021 thleng khan CMRF-ah hian Rs. 233,267,954/- (Vbch. 23.32) a tlingkhawm tawh a, Hmanral tawh zawng zawng (as on 19.5.2021) hi Rs. 22,25,10,970/- niin hman loh Rs. 1,07,56,984/- a la awm bawk. Hmanralna zawng zawng hi CMRF enkawltute lamin a list min pek theih mai loh avangin I & PR website a mi a theih ang angin hai let a ni a. Kan haichhuah theih chin cheng vbch. 21.40 hmanna kan rawn tarlang ta mai a ni. Kan haichhuah theih bak Rs. 85,05,190/- pawh hi ṭangkai taka hman a ni ngei ang tih ring ila.

CM Relief Fund hmanna kan tarlante hi hlawm hnih - A (mipui hnen thleng phak) leh B (sorkar insensona tur niawm taka CMRF hmanna) ahte thliar hran a ni a. A thliar hran danah pawh hian ngaih­dan a inang lo thei viau ang. A sawitu sawi dan a zirin sorkar insensona ngei ngei tur ni a kan tarlan - Truenat khawl leh a behbawm leina te, ZMC tihhmasawnna senso thleng hian ‘Mipui tan vek tho alawm, mipui bakin an chhawr hleinem’ a tih theih tho awm e. Ni e, sorkar chetvelna zawng zawng hi mipui tan vek a ni tur a ni reng a ni! Amaherawhchu, CM Relief Fund-a pawisa thawhtute thawh chhan erawh chu hetiang lam hi a ni lo maithei.

Mi retheite leh harsat­na khirh bik tawkte chhawm­dawlna tura mipui thawh­khawm sum hmang hian Chief Minister zahawm tak hian a sorkar hi a lo chhawmdawl reng em tih chu CMRF hmanna engkim hmutute thutlukna siam turah dah ta ila. Sorkar sum hmanna awm taka CMRF sum cheng vaibelchhe 13 chuang hman a ni te hi a hman dan ngaihtuahtu committee-te ngaihtuah chhuah a ni reng em tihte pawh hriat a chakawm viau mai.

C.Lalhriatpuia