RT-PCR DAHNA TUR HI AN SAWI ANG A NI LO: TB ENDIKNAIN A TUAR!

Tunlai hian ZMC Lab.-ah COVID-19 Sample test tur inhnawh khawm a tam thei hle

a. May 11 a Sample an lak result pawh May 16 khan a chhuak thei chauh a. May 15 a Sample lak result pawh May 19 thleng hian chhuak lo tam tak ala awm. ZMC Laboratory a thawk zingah COVID-19 hri kai an awm tak zeuh zeuh avanga ZMC Lab.a chawlh a ngaih tak fo avangin Lunglei Civil Hospital a RT-PCR hi hnathawk thei tura puahchah thuai thuai hi sorkar tan tihmakmawh a ni.

Kum 2020 March thla tawp lam atangin COVID-19 avangin Mizoramah Lockdown kalpui tan a ni a, kum khat pumhlum chu COVID-19 avang hian kan buai tawh tihna a ni. Hetih chhung hian Mizoram sorkarin a ma pualin RT-PCR khawl hman theihna tur BSL-3 Laboratory building pakhat pawh a din thei lo a, Falkawna TB veite awmna building-ah COVID-19 Test-na Laboratory ala dah a. Congress party MLA Pu Zodintluanga’n Lunglei Civil Hospital tana RT-PCR khawt a donate dahna tur pawh thla 10 zet ral hnuah pawh ala siam thei lova.

A tir atang reng khan ruling party hotute leh an worker te hian RT-PCR khawl dahna tur BSL-3 Laboratory din hi thil harsa leh hautak tak niin an sawi a. District TB Centre, Falkawna TB endikna atana din mek laboratory chu hawh sakin, April 7, 2020 atangin RT-PCR khawl hawh chawp hmangin sample endik tan a ni a.

September 29, 2020 Falkawn a ZMC Laboratory kan tlawh tumin he Laboratory hi an sawi dan nen a inang lo nasa hle:

1. District TB Centre, Falkawna BSL-3 Laboratory, RT-PCR khawl hmanga COVID-19 sample endikna atana an hman lai mek awmna building hi Mizopa chhiara chhawng 4 a ni a. A hnuai berah TB vei damlote awmna ward a awm a, TB ward chung chiah hi COVID-19 sample test-na, BSL-3 Laboratory awmna a ni thin a, Laboratory chung chiah hi District TB Centre office niin, nitin TB vei dam lo engemawzatin an pan thin a, a chung ber hi COVID-19 veite dah nan hman a ni thin bawk. Tin, Laboratory atana hman chin tak tak phei chu feet 30 bial vel chauha zau a ni a. Tunah chuan TB

Building chhawng chung berah RT-PCR Lab hi an sawn chho tawh a. A chhawng chung ber hi Rev.Hruaia an enkawlna hmun kha a ni.

BSL-3 Laboratory din hautak zia leh, a hlauhawm zia te, fimkhur a ngaih ziate uar taka an sawi lai pawh khan kum khat dawn chu BSL-3 laboratory hnuaiah TB veite enkawlna Ward an dah reng tihna a ni a, an sawi anga hlauhawm a nih chuan TB vei dam lo awmte leh Office a thawkte tan pawh a hlauhawm hle dawn tihna a ni.

2. Falkawna TB endikna atana din BSL-3 Laboratory hi National TB Elimination Programme (NTEP) hnuaia din a ni a, Mizoram sorkarin COVID-19 endikna atana a hmansak lai pawh khan zawhfel a la ni lo. Ruahman lawk dan chuan kum 2020 June thla vel atanga TB endikna atana hman tur a ni. Chutiang tur chuan laboratory bungrua tam tak kan va tlawh lai hian a lo thleng tawh a, khawl bun fel vek hnuah Central TB Division-in an pawmpui (validate) a ngai bawk. Hetiang a nih lai hian COVID-19 test-na atana hman a nih daih avangin Central TB Division lama thuneitute pawhin vawi engemawzat an rawn nawr tawh a, COVID-19 test na atana hman a nih tlat avangin kan va tlawh lai hian Central TB Division pawmpuina (validation) hmuh theih a ni ta rih lo nghe nghe.

3. TB endikna atana Laboratory siam mek, COVID-19 Test-na atana hman a nih tak avangin Mizorama TB endikna lamin nasa takin a tuar a, endik tur tam tak phai lamah thawn a ngaih phah a, Lockdown avangin hun engemawchen chu thawn theih a ni lo nghe nghe. District TB Centre, Falkawn-ah hian Laboratory atana hman theih tura duan ambulance-ah leh office khawl pakhatah test an kalpui thei hram a, ni khata an test theih zat pawh a tlem phah nasa hle. Mizoramah hian TB vei kan la tam hle zel a, TB natna vei sa zingah COVID-19 hri vanga thi pawh an awm ta nual reng a ni.

RT-PCR dahna tur BSL-3 Laboratory din hi hautak em em anga sawi a nih avangin June 26, 2020-a Congress MLA Pu Zodintluanga’n Lunglei Civil Hospital tana RT- PCR khawl a pek pawh thla sawm chuang hman lohin an la dah mai mai a.

Amaherawhchu, BSL-3 Laboratory din hi an sawi ang em em a hautak a ni lo tih a chiang ta hle a.

Mizoram sorkar hian tum tak tak ni se, thla 10 chhung hian building sa chawp pawhin Falkawnah leh Lungleiah hian BSL-3 Laboratory hi a din thei ang. May 21, 2020-a Nagaland CM-in Naga Hospital Authority Kohima (NHAIC)-a BSL-3 Laboratory a hawn pawh kha ni 32 chhunga siam zawh vek a ni.

Congress sorkar liam ta khan Falkawn Referral Hospital din thar lehin, awm lo ata Medical College MIMER a din a. Research Institute atana ruahman a nih angin khawl tha tak tak tam tham tak a dah zui a, khawvel huap pawha bungraw tha a ngaihin a thuam a, cheng nuai 190 sengin Oxygen Generating Plant a siam bawk a. District Hospital a Oxygen Plant zawng zawngte hi NEDP suma lei vek a ni nghe nghe. Hengte hi COVID-19 veite enkawlna kawngah pawh an tangkai zui hle a ni tih hretute chu Mizoram mipui kan ni a. Hetiang taka Congress sorkarin kawng a sat kaw tawh chung pawh a RT-PCR khawl dahna tur MNF sorkarin BSL-3 Laboratory pakhat pawh ala din thei lo hi hriatthiam a har hle a ni.

Nagaland sorkar pawhin ni 32 chhung leka a din theih BSL-3 Laboratory, thla 10 chhunga MNF sorkar-in pakhat pawh a din thei lo hi COVID-19 hri do an ngaihpawimawh tawk loh vang a ni thei!!. Nge ni, publicity tha tak vanga Health Minister Dr. Thangtea hi hnathawk chak tak anga kan hmuh piah lamah a kut hi an lo hnungkhirh ru reng zawk em ni?

Dr.Lallianchhunga