RT-PCR hmanga endikna laboratory neih zat
Tun hnaiah Social Media lamah RT-PCR neih zat tiin tuten emaw thu belhchian dawn lo an rawn ti darh vak mai a, sorkar tihmualpho hrim hrim tumna lam hawi deuh a ni a, mahsela chumi sawifiahna a chhuah hnuah chuan thil awm dan zir chianin India ramah Laboratory nei chau ber leh Covid-19 hri endikna tura Laboratory din kawnga hnufum state kan lo ni tih a lang chhuak hi a zialo hle a ni.
Tute'n emaw thu an thehdarh dan chuan Mizoram chu RT-PCR khawl pakhat chiah nei angin an rawn ziak a, chumi vek chhanna tur chuan Social Media lamah bawk a rawn darh leh a. ZMC lam hotute sawifiahna ang taka rawn chhuakah chuan Mizoramah RT-PCR khawl hman lai mek pali a awm mek - (1) ABI Quan studio PCR, Source: NHM; (2) ROCHE PCR Source: Donation; (3) BIORAD PCR Source : ICMR donation; (4) BIAORAD PCR Source: UNICEF donation tih a ni a, a lawmawm hle a ni.
Chutih rual chuan heng khawlte hi 30 pawh nei tehreng ila, khawl hmanga hri endikna hmun laboratory hman theih pakhat chiah kan nei a, ZMC laboratory an khar chuan kan khawl pali hi an khar ve zel tihna a ni. Thawktu zingah Covid-19 positive an lo awm palh a, laboraroty khar a nih chuan a dang kan nei lova kan khawl hi an khar hnan zel a, tuna kan mamawh chu khawl tam zawk lam aiin laboratory tam zawk a ni.
Indian Council of Medical Research lamin May 19-a an tihchhuahah chuan RT-PCR hmanga Covod-19 hrik endik theihna laboratory 1498 (sorkar ta 583 leh private ta 915) a awm a, India hmar chhakah Mizoramin laboratory a nei tlem ber. Chu mai ni lovin state chu sawi loh Union Territory pawhin laboratory hi an neih vek avangin a nei tlem ber zingah Mizoram, Lakshadweep leh Dadra & Nagar Haveli te kan tel a, keini hi endikna hmun laboratory pakhat chiah nei kan ni a, Sikkim takngial pawhin laboratory pahnih an nei a, Sikkim hi census hnuhnung berah chuan mipui 6,10,577 lek awmna an ni. Census hnuhnung bera mipui 3,80,520 awmna Andaman Nicobar Island sorkar chuan laboratory pahnih a nei ve tlat maite hian rualawh a tina thar hle a ni.
India hmar chhakah pawh kan el phak vea kan ngaih Nagaland sorkar hian laboratory pathum an nei bik a - (1) State Referral BSL-3 Laboratory, Naga
Hospital, Kohima (2) Christian Institute of Health Sciences & Research, Dimapur (3) District Hospital, Tuensang tih a ni. Mizoram angah chantir dawn ila an Aizawl, an Lunglei leh an Champhai angah Naga ho chuan laboratory an nei tihna a nih chu.
Arunachal Pradesh hi en leh ta ila, kan ngaihsan vak loh state hian RT-PCT hmanga endik theihna laboratory pahnih an nei a, chu chu Tomo Riba Institute of Health & Medical Sciences, Naharlagun leh Department of Microbiology, Bakin Pertin General Hospital and Training Centre, Pasighat lamah a ni.
Engpawhnise Mizoram sorkar tihmualpho tumna lam ni lo se, Covid-19 hripui hi a reh tawh dawn emaw tih hnuah a rawn thawk thar leh thut si a, kan lo muang sual deuh a ni tih hi pawm tlan a ṭha ang, sorkar chang ni lovin mipui pawh kan muang sual a ni. Tichuan chuvang tak chuan laboratory pawh kan neih belh lova, Lunglei lama Congress MLA khawl pek pawh hman turin thuchhuah siam a ni tawha laboratory pawh an siam belh dawn niin a lang ta a, tunah hi chuan ZMC chiah kan neih avangin test result pawh a chhuak zung zung thei locva, hnathawktu an hahin an tlaivar ṭhak ṭhak niin a hre chiangte chuan an sawi a ni.
Test na tur khawl neih belh hi a ṭha anga, a endikna hmunhma laboratory neih belh hi a ṭul lehzual niin a lang a, sorkar pawh han ṭang sauh sauh se, state lian ni lo state ṭhenawm pawhin an neih sup sup theih laboratory hi kan tum phawt chuan kan nei ve thei ngei ang.
Lal Thansanga, College Veng, Saitual