Sorkar duhsakten Sorkar duhsak ve teh se

Mizoram sorkar ah hian duhsakna dawng uchuak bik hi an awm nasa a, a hmutu tur hre sain tender an chhang a, contract leh supply a nuai za tel an hmu a, chung mite hming chu Chief Minister Relief Fund ah hian an hming ka la hmu fuh ve mang lova, heng ho hi an chet chhuah ve a hun tawh a ni.

MNF sorkar chauh hi kan sawi lova, Congress sorkar lai kum 10 chhung khan a hlawk puite chuan cheng nuai za tel tak meuh meuhvin an hlawk pui a, Congress MLA-te kum 2008-a an affidavit leh kum 2013 inthlan dawna an affidavit te en ringawt pawh khan an sum neih pun chakzia chu kan hmu thei a, anni MLA hi chuan mipuite tan an pawisa neihte hi an la pe chhuak zawk a, Congress worker zingah khan sorkar hlawk pui fe fe pawisa ngah tak tak an tam nen kha mite khan CM Relief Fund ah hian pawisa rawn chhung lut ruih ruih awm an ni.

Mizoram kan Con­struction Firm lian tak tak te bakah hian vai ram lam construction company Mizorama cheng maktaduai tel contract hna thawktute pawh hian CM Relief Fund ah hian pawisate rawn chhung lut ve se a ṭha lo'm ni le, chu bakah sorkar hmasa hun laia duhsakna uchuak dawng ho kha an hming mipuiin an hria a nia. Mipui hmuha inham puar vak vakte pawh an awm kha, Congress hun laia hna an hmuh tam em em dan en khan sorkar ah hian rawn chhung lut ve se. NLUP hnuaia thil supply tute list pawh kha en ila khang mite kha rawn luang chhuak ve thei tawh se a hun tawh a ni.

MNF hunah pawh hian tun kum hnih leh a chanve dawn chhung hian con­tract cheng nuai za tel thawk hi an tam tawh a, chubakah supply pawh a kal reng bawka heng mite pawh hian CM Relief Fund ah rawn chhung ve se. Sorkar duhsakna dawng tute hian sorkar hi rawn duhsak ve se a ṭha a ni.

Sorkar hnathawk hlawh dil pawh hi sawisel tur a ni lova, a tam zawk hi chuan thawh loh hlawh an la ve char chara Covid-19 avang hian, mahse sorkar hnathawk aia sorkar chhawr zawk ruling party mi leh sa supply leh contract thawktute hming hi CM Relief Fund thawh tu list ah kan lo chang dawn a ni.

Lalmuanpuia