Thil pahnih

Tun hnai chu ka rilruah thil, mi ngaituah dan lo duh in ka ngaithuah mai mai a. Thil tha awm taka lang si, mahse ngaithuah chian ngai deuh thil awm in ka hria a. Chung zinga mi pahnih chu kan thailang ve mai mai teh ang.

VC ten sorkar ram an pek thin hi: Tun hnaiah sorkar hnena VC ten vantlang ram an pek thawm a awm leh thin a. Thil lawmawm tak angin a lang a, mahse hetiang karah hian thil fel tawk lo hi a inphumru ve thei tih erawh kan hriat a tha awm e. Aizawl khawpuiah chuan vantlang hian ram an nei mang lova, Aizawl khaw pawn hmun thenkhatah hian vantlang ram ruakte hi VC ten sorkar, department hnenah hmasawnna thiltih nan an pe thin a. Sorkar department-in hmun thenkhatah office leh quarter tur ram an mamawh bawk nen. Chu remchang chu laiin veng/ khua thenkhat in department tan ram an pe thin a, sorkar lam tan a hmun leina tur sum sen a lo ngai lova, sum tam tak humna thil tha tak a ni a. Khawtlang mipui tan pawh sorkar in a mamawh miau chuan vantlang ram mah nise ui ngam chi a ni lo.

A lan danah chuan vantlang ram kha sorkarah hmasawnna atan hian an pe a ni mai a. Khawtlang tan pawh thil tha leh tangkai tak an nih theih avang hian han ui ngawt chi a ni ngawt lovang. Amaherawchu, VC lam hian (an ni vek hauh lo ang a) hetianga sorkar hnena ram an pek hian hlawknate an lo dawng ve thin niawm tak a nia. VC ram pe zawng zawng chu an ni hauh lo ang a, VC thenkhat chuan vantlang ram an pek denchhen hian sorkar atangin hlawkna leh therhlo, entirnan, chu mi rama hnathawh tur contract thawhna hi an lo beisei let ve thin a. Sorkar lam tan pawh ram a thlawn in pek an ni tawh a, lawmman atan a lo pek ve chu a awm ve viau thei. Heng VC ten contact an thawh te hi vantlang sumah a lut tawh lo hian, VC ten insem in, an mimal hlawkna tan hian an hmang daih thei a ni. Chutiang chuan vantlang ram hi indirect tak hian an mimal hlawkna tan hian an lo hralh thin niawm tak a nia. Chuvangin vantlang ram sorkar pek nazawng hi thil lawmawm tak a ni lem lo thei. Hetiang kawngah hian khawtlang mipui pawh kan harh thar hi a hun viau awm e. Chutihrual erawh chuan vantlang ram sorkar lak zawng zawng hi VC emaw te hian an hlawk pui vek lo ang tih chu a hriat reng, hetih karah hian hetiang lo ti duh hi an awm thei a, fimkhur thu hla ah kan ziak ve mai mai a ni e.

Mi harsa in sak thin hi: Tun hnaiah hian veng/khua thenkhat YMA emaw kohhran emaw khawtlang huapa tlawmngaia mi harsa zawk te insak sak thin hi an awm ta nual mai a. A lawmawm hle mai a, an ti tha thin hle mai. Chutihrual erawh chuan a lehlama tanga thlir chuan thil zahtlak leh thil kal fuh tawk lo awm vang niin a lang thei bawk awm e. Sorkar hian mi harsa zawkte insak sakna tur scheme a siam nual a, a hma lamah heng scheme hmang hian mi tam tak insak sak an ni hlawm tawh thin a. Tunah pawh hian Prime Minster Awas Yojona (PMAY) khawpui leh thingtlangah a kal pui a, tunah pawh Mizoram hmun hrang hrangah mi harsa zawk tan in an sa mup mup a ni. A nihna takah chuan khawtlang hruaitu nikhua leh fel tak ni se, khawtlang tha thawh ngai lo hian, vantlang tanpui ngai tur khawpa in leh lo nei chhia, chhuanchham hi chu tanpui dan hi chu a awm ngei ang. Mahse, heng mi harsa leh chhumchhia te kal kan hian party mi leh sa, chu pawh a dawng pha meuh lo an sem thin vang hian vantlang kan chet a ngai a ta thin a ni e.

Khua leh veng dang chu thuhran ah lo dah ila, PMAY (G) leh PMAY (U) an semna tawhna ah chauh pawh hian han en ila. Khawtlang hruaitu te hian ngaisak tak tak nise, party lam hruaitu te nena tangrual in mi harsa insakna tur hi a hmasa lamah hian an dah thei chiang. Hetiang lamah hian sorkar hnathawkte hi an fel in an in pawtsawi thui thei viau a, politic lam bawk hi a mu tan kan ni zel. Mi harsa tanpui ngai ngawih ngawih pawh nise chumi kha mi party a nia tiin kan tang tlat zel a. Mi harsa kha a harsat dana zir a tanpui tur nise, tanpui hmasak ber tur niawm tak pawh nise kan party lo chu kan kal kan mai thin. Tuna in sa mek leh sa zo tawh pawh hi a nihna takah chuan an mamawh vang aimah a, party duhsakna dawng hmasa tute mai an ni. Chuvangin, in sakna tanpuina sem tawhna khua ni si, vantlangin mi harsa leh chhumchhia insak sak an ngai a nih chuan khua nikhua tak an ni in kei chuan ka pawm thei lo. Chu khua chu ngaihsan viau turah ka ngai lem lo.

A nihna taka chuan kan politics hian kan mit a tidel em a, veng chhung a tanpuina turah pawh hian a mamawh aiin party induhsakna kan dah lian zel a. Sorkar term hmasa lam party pawh an bang chuang lova, VC te rawn miah lova, party in a dawngtu tur lo thlang tawp te kha an tam ve em a sin. Hetiangah hian khawtlang hruaitu te nen party lam hi kan tanrual a, khua leh veng chet chhuah ngai khawp hi chu a party tan pawh mualpho na a ni thei a ni tih hria in kan tanrual hram hram hi a tha awm e. A nihna takah chuan mi harsa in sa in bialtu MLA in a inchung tur a tum te kan ti a, hnatlang thingpui man tur a tum te kan ti a, a ropui hmel viau na in, VC leh party lam hi fing deuh se hetiang tiang hi a ngai tur a ni lo. Chuvangin, hmasawnna turah, kan veng mualpho theihna turah chuan, mi harsate lakah hian party ruihchilhna leh party behchhan in thil i ti lo ngam ila, hetianga ti ngam party chu mipui in kan ngaisang in vote pawh an hmuh that phah sawt ka ring a ni.

Engkima Chawngthu