Khawh liam pur pur

Mizorama pawisa dinhmun sawina lar ve tak ṭhin chu 'beng muka liam zawih zawih' tihte kha a ni ṭhin. Kum 2018 inthlan dawna lo lar thar ta em em mai chu, 'Khawh lut zur zur, khawh liam pur pur' tih a ni, a sawitu pawh kan la hre vek awm e. 

He thilin a sawi tum chu sorkar laipui pawisa tamzia leh Mizoram pawhin kan zuk dil chhuah thiam chuan pawisa tam turzia sawina tiin kan hrilhfiah thei ang. 

Kan hisap lama tel ve miah lo Covid-19 a rawn thawk thut a, a hmaa pawisa tamzia kan sawi kan sawi kha kan pawisa neih tlem leh tam pawh hre tawh lovin 'Pa chauhvin a hria' tih tur a lo ni ta a. Kan ram sum leh pai dinhmun a hma lawka ṭha em em chu a chhe ta em em tiin kan sawi leh thei bawk ang. 

Pawisa awm zat chhiartu ni ve lo ta chu kan neih zat leh kan mamawh zat hi kan hre ve thiam phak lova, mahse pawisa nei lovin kan ram sorkar hi a buai mek niin a hre chiang te chuan an sawi ta a ni. 

Hetihlai hian zawhna mawl tak lo zawt ve ta ila, "SEDP-a pawisa tam tak sorkarin a la dah ṭhat hi eng tika hman tur nge?" tih lam hi lo sawi ve chhen ila. 

Pu Zodintluanga, Congress hotupa zinga mi khan 2019-2020 budget-ah khan SEDP-ah ringawt pawh cheng vbc 188 nuai 37 zet hman loh a la awm niin a sawi a. Kha kha kum hmasa budget lama mi a ni a, an hman loh pawh a la tam em em si a, kum 2020-21 budget-a SEDP lama an pawisa dah te nen phei chuan sorkar hi mangang tur a la ni lovang tiin kan sawi leh thei ta a ni. 

Tunah hian pawisa awm lo angin kan han awm tak nangin SEDP-ah pawisa tam tham tak dah ṭhat a ni a, chuti ni lova sawi dawn chuan SEDP-ah nakina 'sem tur' pawisa hi an la 'thukru; tho bawk a, chu pawisa chu tuna khawh liam pur pur tura dah ṭhat a ni zawk mai lo maw?  

Pawisa nei lo anga kan awm lai hian 2023 MLA inthlan hma deuh hianin SEDP lama dah ṭhat an rawn phawrh dawn a ni zawk lo maw? He chhiarkawp hi a hre deuhvin rawn chawk dik chhin ta che u.