An zak lem lo

Genesis ah khan Adama leh Evi chungchangah khan "saruakin an awm a; mahse, an zak lêm lo," tih kha kan hmu anga, tunlai politician te hian an thil tih ṭhat hi thlakak nasa takin an theh darh tir a, an zak lem lo.

Facebook ah hian kan Minister zinga mi hi a nupui nen mitthi an ral tur ni tain ka hria an thlalak hi a lang a, tlema kawng chhe deuh leh kham deuhah hian inchei takin an kal a, chu thlalak chu group hrang rhangah thehdarh in a thehdarh tu chuan Minister chu nasa takin a fak zuia, mahse a comment ka han chhiar den den chu miin an fak pui ve hauh lova an nuihzat thu leh Mizo a nih chuan mitthi ral chu tih tur a nih thu leh Minister lo pawh an kal thu te kha a lang a ni. Chutiang ka chhiar chuan an zak lem lo tih hi rilruah a lo lut.

Tun hnaiah kan MLA zinga mi te pahnih chu hripui a len avangin an zin veivak chu kawng­pui sirah an lir thei tidingin chaw an fak lai thlalak an han ti darh leh pek a, chutah chuan ram hruaitu inngaitlawm an nih zia kawngpui kamah pawh an chawl ve mai tih kha a lang a, hei phei chu a nuihzahthlak. Tunlaiah chuan kawng kama mahni ei tur in ken mai loh chuan thingpui dawr leh hotel an in hawng lova, mahniin ei tur inken a ngai a, chutianga miin an tih chuan inngaih tlawmna ni lovin a ṭul vang a ni. Chu thlalak thehdarh tu chu a zam lem lo a ni ang.

Sorkar thlai thar pawh ni lo kuthna­thawktute thlai thar sorkar hotuten an uan puia an han sem kual vel te hi a zahthlak ngawih ngawih tura rin hi an zak lem lo.

Anmahni pawisa aṭanga an pek pawh ni lo MLA Fund aṭanga an thil semte pawh, "Pu Liana'n a bial tan a pe, Pu Mawia'n a bialte a hlan. etc' kan ti zel hi sorkar pawisa kawltuin an sem tihna a nih chauh avangin fakna tur a awm lova, mahse heti hian an ti duh zela an zak lem lo. Sorkar thiltih ni miah lo, Minister pakhatin an mimal thila ṭanpuina thilpek an pekte chu sorkar thupuanna Information Depart­ment Website ah an ziak a, an zak lam lo.

Mi hi an zah theih loh viau hian mipui an zah lo tel tihna a nih avangin inthlang ramah hi chuan mipui hian zah an phu a, mahse politician te hian mipui hi min zah lem lo.

Lalrintluanga, Bawngkawn