LOCKDOWN BAWK

Health Minister hova meeting chuan hapta khat chhung Lockdown pawhsei leh turin a rel a. Nitin inhlawhfa chawp, AMC area a cheng ve si tan chuan Covid-19 aiin a rapthlak tawh zawk hial awm e. 

Duhthusamah chuan, ei leh in tur nei reng thei dawn ila chu, eng anga rei pawh in Lockdown ila a pawi hleinem.

Kan doctor-te pawh hian duhthu an sam tawi ka ti ṭhin. Duhthusamah chuan ni 14 te tal hi ni thei se te an tia. Kei ka duhthusamah chuan kumin te hi in Lockdown pawp ila hri hi chu a reh theih mai ka ring asin. 

Mahse a tih chi ngawt loh, kan tlin tawk a awm, kan ram dinhmun leh kan chhungkaw sum lakluhin a tlin tawk a awm; chu chu thlir thiam a ṭha.

Lockdown kan chhunzawm dawn avangin sawrkarin chhawmdawl ngaite tan ruahmanna a siam tih hriat tur awm mang si lo. Lockdown pawhsei ringawt rel thiam, in khai chhuahna lam rel thiam lo ram hruaitu neih hi a vanduaithlak ngawt mai. 

*    Nagaland chuan NEC aṭanga an sum hmuh Rs 2.4 crore chu inhlawhfa tan an hmang. 

*    Tripura Chief Minister chuan Rs 3.58 crore inhlawhfa tan an ruahman thu a sawi. 

*    Arunachal chuan, Prime Minister's care fund for the migrant kaltlangin Rs 3.6 crore an ruahman. 

*    Meghalaya chuan inhlawhfate tan Rs 51 crore an ruahman. 

*    Manipur pawhin CM relief fund aṭangin Rs 19 crore chu mi harsate chhawmdawl nan an hmang bawk.

Heng zawng zawng hi Politics a hmingṭhat tumna satliah nge, an hmang ngei tih chu kan audit a nih ngawt loh chuan a finfiahna kan nei thei lovang. Mahse thuchhuah siama an sawi a ni a, a rintlak turah ngai ila.

Mizoramah ve thung chuan, kan tih ni lo, Central-in a rawn ruahmansak mi engemawzatin an dawng ve ngei e; kha kha a chhan chu central-in Lockdown a puan avanga a rawn chhawmdawlna a ni. 

Central-in Lockdown a puan tawh loh hnuah kan puang vak vak a, a chhawmdawlna lam kan ngaihthah leh em em si hi chu kan inenfiah hle a ngai. 

Kan ṭhenawm state, keini tiat lek pawhin anmahni state bilin sum tam tak an ruahman mai. Manipur te phei chuan CM Relief fund aṭangin mi rethei te tan Rs 19 crore an sem tawh. 

Lockdown puan hi ṭul kan ti viau a nih chuan, mipui chhawmdawlna tur lam siam ve a ṭulzia hi ngaihtuah thleng teh ang u.

 

Relief Fund tih hian, khawl leina tur tihte hi a kawk tel reng em ni tih thleng hian ngaihtuah teh ang u. Kan hmai bal thup nana ṭanrual hun a ni, in dem hun a ni lo tih chhen pawh hi a ninawm zozai ta e. 

Pu te u, Lockdown extend rel thiam tak tak te u, Mipui Relief package rel te hi lo thiam ve tawh teh u.