SORKAR HNATHAWK DDO HNENA IN REPORT TÙRA TIH HI!
Mizoram sorkar ngenna anga sorkar hnathawkten Covid-19 dona atana an nikhat hlawh an thawh tùr chu buaipui mék zel niin a lang a. Thawh tawh an awm laiin, la thawh ve lo mi engemaw zat an la awm bawk. Sorkar hnathawkte zinga nikhat hlawh thawh ve remchang lo tùrte chu an Department ṭheuha Drawing & Disbursing Officer (DDO) hnenah in report tùra tih an ni a. Hei hi a thawh ve remcháng thei lote chunga action lák tumna a ni mai lo'ng maw!
He thil hi sorkar hnathawkte indirect-a vauna niin a lang a. Sorkar ṭanpuina atan an hlawh, engemaw rokhawlhna avanga thawh remcháng ve thei lote chhinchhiah tumna ni ngeiin a hriat a ni. MNF sorkar (ministry) hnuaiah hian sorkar hnathawk tam tak, harsa taka khawsa ve ṭawk ṭawk te leh nikhat hlawh thawh ve remchang thei lote hian sorkar hlauh avangin an in report ngam lo ang tih a rin zàwn theih a. He invauna anga ngaih theih thil avang hian mi tam tak chuan pe lo thei lo niin an inngai ngei ang.
Sorkar hian a hnathawkte hi in report tùra a ti anih pawhin, nikhat hlawh thawh theite hi DDO hnena in report turin ti zawk sela, a thawh list-te pawh tarlan zel ni zawk nghe nghe sela, a nih loh chuan sorkar hnathawk te'n an nikhat hlawh hmanga sorkar an ṭanpuina tùr hi tuk luih angah an ngai ang tih a hlauhawm hléin a hriat a ni.
Sorkar hnathawk tam tak chuan a hun taka hlawh leh hamṭhatna dang an la thei lo chungin, anmahni khua leh veng ṭheuhah Covid-19 dona atan te, khawsak harsa zawkte chhawmdawlna kawngah te, tha leh zung bakah sum leh pai nasa takin an lo séng ve tawh bawk a. Tin, sorkar hnathawk zinga tam tak chu loan rul mek te, mi inhnuai luah a harsa taka khawsa te leh natna khirh takin a tlakbuak ve mekte an awm bawk a ni.
Heti ang a nih mek laia, tuk luih donation ang ziazánga an nikhat hlawh thawh tir tumna hi a ṭha lo hlein a lang a, pawisa thawh ve thei lote in report tùra tihna hi sorkarin a tidanglam lo anih ngat chuan, MNF ministry hian sorkar hnathawkte thinlungah sèr nung a tuh ang a, an rilru ah hliàm dam thei lo a siam ang tih hi ka ringhlel lo ve.
David Zochhuanmawia (Vida Hrahsel Saza)