ANNI LEH KEINI (CM RELIEF FUND FOR COVID -19)

Tunhnaiah CM Relief Fund for Covid-19 chung changah inhnialna neuh neuh a awm a. CM Relief Fund-a chhung lo tura mipuite hnena Campaign-na pawh kan Opposition Party te lam aṭangin a richhuak leh nawk nawk ṭhin.

An hman danah pawh inhnialna a tam hle a, a langtlang lo tia sawi an awmlaiin a lantlang tia sawi an awm bawk a. State sorkar-in bungrua leinan a hmang tihte pawh sawi a awm nawk mai. Eng­pawhnise kan hmuh leh hriatphak chinah State dangin CMRF an hman dan leh Mizoram Opposition Party te ngaihdan hi han chik ve mai mai teh ang.

Tamil Nadu State chuan CMRF-a mipuite'n an chhunluh vaibelchhe 69 chu Oxygen Container te, hri vei mekte enkawlna damdawi Remdesevir leina atan an hmang vek a. An opposition party lam aṭangin sawiselna a awm lem lo. Keini State ah ve thung chuan hri dona kawnga a mamawh te leinan sorkar in a hmang ṭhen ve a, Opposition party te an thinrim hle thung.

Kerala-ah chuan mipui­te'n a thlawn a vaccine an dawn/ lak vek theihna atana sorkar ṭanpuina turin CMRF-a chhunglut tura campaign na 'Vaccine Challenge' tih chu mipuite zawkin an buatsaih a, nikhat thil thuah vaibelchhe 1 chuang CMRF-ah hian mipuite'n an chhunglut.

Keini State-ah thung chuan sorkarin mipuite a thlawna vaccine min pek vek a tum a. A lawmawm em mai tia Opposition Party te'n sorkar ṭanpuina atana CMRF chhunglut tura an tlangau chu sawiloh, mipuite hnenah CMRF-a chhunglut lo turin beihpui an thlak mek thung.

Assam State-ah chuan CM Relief Fund a lut leh Assam Aryoga Nidhi (Mizo­ram Health Care Scheme ang deuh hi a ni a, BPL family te tan tihbik niin kum 2012-a an din tawh a ni) a lut te chu ICU khum siam belhna atan te, Covid Care Centre enkawlna atan te, Medical infrastructure tihchangtlunna atan te an hman vek tur thu CM in a sawi a. Mipui leh Opposition lamin an Support hle.

Keini State-ah erawh chuan kan Opposition te'n Covid vei te enkawlna tur a indaih lo an ti a. Sorkarin CM Relief Fund for Covid-19 chu medical infrastracture tih­changtlunna atan a hmang ve a, Medical infra­structure tih chang­tlunna atana Sorkarin a hmang chu Opposition Party te an lawm viau dawn emaw tihlai lawm a hnekin an thinrim hle thung.

Meghalaya State chuan CM Relief Fund for Covid-19 a an hmuh Vaibelchhe 8 tling lo deuh aṭangin vaibelchhe li (4.5) chuang chu ambulance 25 leina atan a hmang a. Mizoram ah pawh Meghalaya State-in Ambulance 25 an lei hi Opposition Party te thlengin hahip in kan fak a nih kha. Covid-19 test-na kan indaih lo, khawl lei belh a ngai tiin Opposition party ten sorkar an nawr a. Sorkar chuan CMRF aṭangin District tina dah tur Truenat (Mini Rt-Pcr) khawl chu 10 a lei ve a. Meghalaya in CMRF aṭanga ambulance 25 an lei fak em em tu leh thehdarh chuai chuai tu kan opposition party te chuan Mizoram sorkarin Truenat khawl CMRF aṭanga an lei chu nasa takin an sawisel thung ang lawi a.

Delhi Sorkar, India ram CM te zingah ṭha ber pawl leh lar ber pawl a ngaih Kejriwal-a kaihhruai chuan LG(Lieutenant Governor)/ CMRF-a Covid-19 dona atana mipuite'n sum an thawh chu an dawnzat leh an hmanna te, an puanzar ṭhat loh em avangin Social Activist 1 in RTI Act in vawihnih a dil a. Delhi sorkar chuan an hmanna mumal tak/detail takin an pe thei lo ve ve a ni. Hetihlai hian Mizoram Sorkar chuan CMRF for Covid-19 a ṭanpuina an dawn zat leh an hmanna zat te hi Sorkar thuchhuak puangzar ṭhin tu DIPR Website mai bakah CM Instagram Account-ah te engtiklai pawha mipuite'n an hmuh theih turin an tarlang reng a. Mahse, kan opposition party te chuan a langtlang lo tiin CMRF hmanna detail taka tarlang theilo tu zawk Delhi sorkar chu hahipin an fak thung a.

Heng lo pawh hi State dangte'n CM Relief Fund hi Covid-19 dona atan ṭangkai takin an hmang a. Opposition Party te'n an sawiselna emaw hriattur a awmlo a, CMRF for Covid-19 a ṭanpuina pe lo tura Mizoram Opposition Party te anga campaign phei chu sawitur an awmlo hrim hrim. Kristian ram, Mizoram-ah chauh hetiang hi a thleng a ni.

Kohhran a ni emaw, pawl a ni emaw, mimal a ni emaw, a thawhduh te'n ṭanpui duhna rilru pu in an thawh a. A thawhtute hian mi harsa te ṭanpui duhin a ṭha nia an hriatah an thawh a nia. Mi thilphal, an neihin a tlin em bik vang pawh nilo, ṭanpui duhna rilru an put avanga ṭanpuina pe tu te an ni a. Miin ṭanpuina a pe a, a pekna tur lo kawhhmuh vak hi ṭangkaina a awm lem lo. A petu in phal takin a pek duhna hmunah a pe mai ang. Mi ṭanpuina pek tur chungchanga ro lo relsak tum chiam te hi ram hmangaih inti party te tan chuan sim hmak chi a ni e. CMRF for Covid-19 a chhung lut lo tura social Media lama thu vawrh vak ve tute hi CMRF ai chuan chumi khami chu ṭanpui an ngai zawk an tihte hnenah hian ṭanpuina pawh pe chuang lo hi a tamzawk an nih a rinawm.

Keimahni tan veka chhuak leh tur tho a ni tih hre reng chunga ṭanpuina pe lo tura kan Opposition Party te an campaign chhuak vak mai hi thilmak tak, Opposition party kan neihchhiat/ṭhatloh zia lantirna chiang tak a ni. Ram leh mipuite aiin politics-a an hamṭhatna tur, an sorkar theihdan ringawt an ngaihtuah zawk a ni.

Kan Opposition party te u, harhchhuak mawlh teh u.

V. Lalchhanchhuaha