KHUAL ZIN MITEN MIZORAM AN HMUH DAN

Lockdown avangin hun awl kan ngah bawka, mahni thawhna online class lak leh lehkhabu buatsaih karah hahchawlh pahin Youtube kan thlir a. En tlak tak tak a lo tam phian a, en tur tam tak zingah hnam dangin Mizoram an rawn tlawh a an thil hmuhte chuan mit a la riau mai a, ka enkual dun dun ta mai a. Miin min hmuh dan aṭang hian, kan chhenna ram hi eng chiah nge a nih a, eng mi nge kan nih tih inhriat a awl a, mi hrang hrangin an thil hmuh, rilrua langsar zual han sawi lang ila.

Boruak nuam : Mizoram hi blue mountain ti hiala an lo hriat ṭhin chu a takin an rawn rap a, a ram leilung mawizia leh boruak nuam an tihzia ha hipin an sawi vek a, pakhat phei chuan hill station ka kal nual tawh a, Mizoramah hian lo kal ve la chu, Shimla i theihnghilh daih mai ang, a ti hial mawle. Shimla te chu tourist in an tlawh nasat tehreng nen, kan zotlang ram nuam hi mi tlawhpawh a la ni lo mai mai a lo nih hi tih rilruah a lo lang uar uar mai. A mak lutuk, tlai ni tla ringawt pawh an tan chuan thlir nuam a ni asin.

Keinin kan en liam mai mai hi, ram dang mite chuan an lo hmu ngai reng reng lo hi a lo nia. Hmanah Pune-a kan awm laiin, hmun mawi nia an hriatah outing kan nei a, chuta kan va hmuh chu, kham chhengchhia mai mai kha a lo nia, tlai lamah tlangah min lawnpui a, eng nge kan tih dawn kan tih chuan, ni tla kan thlir dawn an ti a, a danglam viau dawn emaw ka ti a. Mi lah chu an tam em em mai a, ni a lo tlak khan, Mizorama kan hmuh ni tin kha a lo ni lek a. A va ho tak ka ti a. Mahse hnam dang tan chuan a lo hmuhnawm em em mai hi a lo ni a. Hengte hi kan ram chuan kan nei bik a. Boruak nawmzia mawlh mai hi an sawi deuh vek a, 35° aiia lum a nih ngai loh thu an sawi deuh vek, tunah hian degree chuti zat chu a ni an ti deuh reng mai mawle.

M an fel : Mi tana ngaih­thlak nuam an sawi mai mai nge? mipui an felzia, kawm an nawmzia, an sawi deuh vek mai. Youtuber an ni hlawm bawk a, khawlai nun zawng zawng an ti lang vek a, Aizawl kawtthler pawh lirtheia kal mai lovin, kawng sir zawhin, ke in an kal ngat ngat mai a, mipui che vel zawng zawng pho lan an duh a. Mizote hi kan lo zakzum duk duk tawh bik lo tih pawh a hmuh theih, kawng kal lai apiangin hawihhawm takin an lo chhawn ve mai zel a. Heng nunte hi hnam dangah an hmu tam lo pawh a ni ang. Mikhualte chunga ṭhat kan lo chhuahna ho te pawh hi, mikhualte tan tlangnelna a lo ni zel mai.

An sawi tel ve ziah chu, kawng sira nghah loh dawr kan nei hi a ni bawk a, hei hi chu vawn nun reng chi a ni ang, khawvel khawi hmunah mah hmuh tur awm ve lo a ni tlat a. Mizoram cheitu chhuanawm tak a la ni zel dawn a ni.

Silent City : A ni reng lah taka, khawpui traffic tawt lutuk kara lirthei horn pek awm ve lo hi chu, khawvel hmun danga hmuh tur awm ve lo a ni tlat. Kan kawng zimzia erawh an sawi vek thung.

Thil pakhat, taxi fair mumal lo erawh chu, an buai phah ve khawp mai, hmun ṭhenkhatah km rate a awm laiin, ṭhenkhatah chuan hmun danga Rs.50/- an senna kha km 2 lekah Rs.200/- ti tein taxi driver in an sawi leh si a, phun nang nang an kal tak pawh a awm. Kan taxi fair rate hi a lo mumal lo viau a ni awm e.

Aizawl guide a la awm lo: Tunlai chhanah, hmun pawimawh awmna hi chu google hmangin a hriat theih mai a, mahse veng hrang hrang chanchin tlangpui te, hmun pawimawh chanchinte hi, online a hmuh tur kan lo la dah chhuak ve lo a ni ang. Mi tam zawk chu guide nei lem lova, mahni sut kuak ang ang rawn su ve tawp mai an ni a. Mi pakhat chuan, online aṭangin Aizawl city hi kalna tur pawimawh hmuh tur a awm ve si lova, vawiin chu market ka va kal mai teh ang, a ti tawp mai.

Kan tourist department lam hian, hengte hi hma lakna tharah neiin, Aizawl mai ni lo, tourist spot mai ni lo, Mizoram hmun pawimawh, tourist map of Mizoram chauh ni lo, Tourist guide of Mizoram buatsaih ve ila, internet-ah dah chhuak ve ila, khualzin tan a va tangkai dawn em.

Gas sem dan hi : Mi pakhat chu a len chhuahna kawng sirah gas an lo sem a, mipui intlar a hmuh khan mak a ti deuh a ni ang, hetianga kawng sira gas sem hi North East ah hian hmuh tur a la awm a, mipui tan a buaithlak awm mange a ti chuak phawng mai. India ram state tam zawkah chuan Gas home deliver hi an kalpui vek tawh a, keini pawh hian kalpui ve chu kan tum ṭan chu a nia, veng ṭhenkhatah kan kalpui tawh a, veng pum hian kalpui ve thuai tawh ila a va duhawm em. Mipui phurrit siam reng mai hi, khualzinte tan pawh thil mak a ni asin.

Ṭawng mawlh mai hi: Khualzinte harsatna lian tak chu, Mizo ṭawng chauh hmang thei kan tam lutuk hi a ni. Sap ṭawnga biak theih chu kan tam ve tawh viau a, hindi thiam erawh kan awm meuh lo.

Mi pakhat chu chhim lam Tlabung thleng thlengin, Chakma khaw tereuhte te thlengin a tlawh a. Chakma tam zawk chu hindi a biak theih vek an lo ni a, english thiam pawh an lo tam phian a, mak a ti khawp mai.

Tourist pakhatin a sawi chhuah chu, China-ah chuan google transtation an nei a, thil tih a awl, Mizote hian an ṭawng chauh an hmang nasa si a, google translation hi nei ve se a ṭha ang, a ti tawp mai. Hei hi chu sorkar lam hian hma lak nan hmang ve se a ṭha khawp ang.

Hmun mawi an zawng kher lo : Dik tak chuan hmun mawi kan neih hi a tam lem lo bawk a, Hmuifang, Reiek, Vantawng khawhthla, tih vel bak chu, ram dangin kan neih aia ropui leh mawi zawk an ngah a. Tourist tam ber chuan Mizoram leilung hrim hrim leh, a mi chengte awm dan hi, tlawh tlakah an ngai niin a lang. Hetiang taka hnam chetze hrang, India ram mi kan lo awm hi an sawi duh zawng tak a ni tlat.

Mizoram hi kan vawrh lar thiam chuan, hnam dang hian an la rawn tlawh sup sup dawn. Sairang thlenga Rel a lo luh hunah phei chuan, tlawhtu kan ngah tulh tulh ang. Khualzinte tana chet awlsam leh, mipui te ngei pawh inhawng tak, a sap ṭawng takin friendly taka kan lo inher rem ve zel a ngai dawn a ni.

Lalrinliana Colney