Hlauthawng lutuk teh suh

Covid-19 in kum khat pumhlum aia tam min chenchilh ta, a inkaichhawn dan hi mihring leh mihringah a ni a, mihring kan nih miau avangin mahni ngawtin kan awm ngawt thei lo a, engemaw chen chu midang nen kan inpawh tawn zel a ngai bawk si. Fimkhur em em reng pawh ni ila, he hri hi ka kai ve thei reng a ni tih hriaa rilru lam lo inpeih lawk ṭheuh pawh a pawimawh hle.

Lockdown rei tak tak neih a ṭul chhan hi hri leng umbona hmanrua ni lovin, hri kai pung chak lutuk tur venna tur leh damdawia inenkawlna kan neihten a tlin loh khawp buaipui ngai kan awm mai tur pumpelhna tur a ni ber a, vaccine te kan lak kim hunah nunphung pawh a la pangngai leh mai ang a, vaccine kan pek dan en chuan hun a la duh deuh dawn tih erawh a lang thei, chumi kan nghah thlen hma chuan, mithiamte thurawn, hri laka him theihnate hi taima takin zawm chhunzawm zel phawt ila.

Hri leng mek hi a hlauhawm lo tia sawi chi ni lo mahse, pulh puk pukna erawh a ni lo tih a chiang tawh a, Mizoramah hri vanga thi 33 an awm tawh a, hri kai tawh aṭanga thihpui zat hi za zela chhutin 0.32 chauh a ni a, hri leng thihpuite zinga ṭhenkhat hi chu ṭawng mawi lo ni lo se, 'hri kai lo mahse an damchhuak zo chuang lo ang a' tih tur ang chi, natna khirh tak neisa te an ni hlawm. Hri kai zinga a tam ber chu harsatna em em nei lovin, an dam leh mai.

Hri kai zinga thihpui zat en hian, hri kai zinga zaa 99 aia tam daih an dam chhuak tihna a ni thei a, chung zingah chuan nang, tuna hri kai mek pawh kha i tel dawn tih ring la, test hmabak meka awm pawh kha, i lo kai palh anih pawhin zaa 99 chuang zingah khian i tel ve dawn tih ring la, hlauthawng lutuk teh suh.

J Sawma Vanchhawng