RAT AIAH RTPCR TEST TAM A NGAI, PRIVATE LAB LEH HOSPITAL HMAN TANGKAI A TUL

Heti chen hi lock­down kan kalpui tawh chunga case positive rate a la sang em em reng hi kan in­ngaihtuah chian a ngai! April thla tawp lama Delhi lockdown a nih tirh khan sample test aṭanga positivity rate kha 36% a kai hman hial a, tukin (25/5)-ah khan 2.5%-ah a tlahniam thei a ni. Mizoramah hian RAT aiah RTPCR test hi tun aia kan hman nasat ve hi a hun niin a lang.

RAT hian false result a pek chhuah hnem avangin RTPCR hman tam a ngai em em a ni. Miin covid symptom nei niin a inhria a, RTPCR duh duha pan tur a awm loh avangin, private-ah RAT a va tih tir a, vei reng si kha vei lo anga result a lo chhuah si chuan a pawi thui thei lutuk! Nimin tlaiah pawh kan ṭhianpa Lawngtlaia awm chu symptom a nei niin a inhria a, a khua erawh a la sik lo. Tukinah RAT a tih tir a, a negative tlat. RTPCR tih maina tur a remchang si lo.

Symptom nei nia inhria te, positive nena inhnaihchilh nia inhria, inringhlel apiangin awlsam taka RTPCR an test zung zung theihna remchang kan buat­saih vat vat a ṭul a ni.

Tun dinhmunah RTPCR lab pakhat chauh kan nei a, nitina positive result thar kan neih tam ber hi RAT hmanga en an ni a, mithiamte sawi danin, RAT hian positive ni si negative result a pek kha 50% lai mai a nih theih si chuan, chung negative result nei, a tak taka positive si te chuan hri an pu darh reng mai dawn tihna a ni thei ang?

Delhi-ah private laboratory-a RTPCR test man, kalchilhin cheng 800 a nia, thawktuten an pan chilhin cheng 1200 niin an sawi. Hetiangte hian ti ve thei ila, inringhlel te chuan an mahni sum sengin private an panin an ko zung zung mai anga, Sorkar tan zangkhaina a thlen bawk ang.

Private hospital-te hi kan hnuhluh a hun hle tawh bawk. An duh phawt chuan hma pawh an la chak thei ang. India ram khawpui liana private damdawi in tam takin covid damlo an enkawl thei hlawm ang hian Mizoramah hian Private hospital te hi hmang ṭangkai ve ila. ZMC-a a thlawna inenkawl kher ṭul ti lo, private hospital-a in enkawl duh zawk hi tam tak an awm dawn a, chu chuan sorkar phurrit pawh nasa takin a chhawk zangkhai ngei ang.

ZMC-a thawktu in­daihlohna leh sum senso tam zia kan hria a, heng pawhpenna kawng chu sawrkar leh private damdawi in zawng zawngte hi covid 19 positive enkawl theihna tura ruahman hi a ni.

Private lab kan neihte hi RTPCR labo­ratory din tir ve vat vat a hun tawh lutuk a, kan dinhmun enin kan inveng zo lo mai ang tih a hlauhawm ta!

Tun hnaia Times of India front page te kha tam tak chuan in lo chhiar ve thoin ka ring a, North East hi Covid hotspot a nih maitheih thu a rawn tar kuau mai! Hmanhmawh takin tuna kan kalphung pangngai piah lama kan pen vat vat hi kan himna tur a nih a rinawm.

Vanneihthanga