HRI LENG LEH KAN TUNLAI NUN

Thlirna hrang hrang aṭangin kan tunlai boruak chu a hneawm ta hle mai! Kumin-ah hri leng thawh 2-na thleng mek vangin ni 30 chuang zet kan inkhuahkhirh ta a, Aizawlah chuan veng ṭhenkhat chu hri a darh nasat avangin veng dang zawng aia inkhuahkhirh leh zualte pawh an awm a, nunphung chep ang reng takah rilru thlamuang lo zeta khawsa te pawh an awm ngei ang.

May thla kal mek chhungin hri kai 3,500 chuang hmuh a ni tawh a, tun thla chhunga hri vanga nunna chan pawh nikum chhung zawnga hri vanga thi aiin an tam tawh bawk! Hri len ṭan ṭirh aṭanga vawiin thlengin mahni hna chan engemawzat an awm tawh a, hna chan ni chiah lo, hnathawh chhunzawm theih loh avanga hlawh lak tur nei mumal lo leh sum lakluhna hnar tawp ta pawh an awm nual a. Hetiang karah hian kei erawh chu vawiin thlengin ka hna tluang takin ka thawk chhunzawm thei a, harsatna lutuk tawk lovin kan la awm ve thei zel hi Pathian hnena lawmthu sawi tur ka va ni em!

Tunlai hian Social Media-ah hri leng thawh 3-na thleng mai tur ang leh a bikin naupang lamin hri an kai nasat dawn avanga damdawi lo pek lawk tur thlengin an tarlang a. Hetiang a nih avang hian Aizawla damdawi zawrhna dawr hrang hrang chuan damdawi an hralh nasa hle tih an sawi a. Hetihrual hian Health Department hotute chuan, hri leng thawh 2-na vanga harsatna leh buaina a thlen mek avangin thawh 3-na atana lo inbuatsaih lawk chu thil ṭul ber ni-a a lan loh thu an sawi a. Damdawi chu mihring mamawh dan mila Doctor ten an chawh tur a nih avangin, miin ṭha an tih vanga lo ei lawk ve ngawt tur a ni lo an ti bawk.

Engpawh ni se, mahni hriselna chu uluk taka en chunga, fimkhur taka inenkawl tur a ni teh meuh a, uchuak taka miin ṭha an tih apiang mithiamte thurawn ni lem lova lo bawh ve ruak ruak erawh thil ṭha ber a ni lo tih a chiang hle a ni.

A thuhrimah Mizote hi thil intihhmuh ching tak kan ni ve hrim hrim a. Pathian thu leh thu hriltu lar kan bawh hum hum dan te, damdawi leh inenkawlna chungchangah pawh miin a ṭha ni-a an sawi lo ti ve ta ngawt ṭhin pawh kan tam a. Hri leng vanga harsatna tawkte kan ṭanpui danah pawh mipui thlan lalten a ṭha zawnga inelna an kalpui emaw tih tur khawpa harsatna tawk an ṭanpui sup sup hi thil ṭha ang reng tak, chin zui zel tlak pawh niin a lang a. An ṭanpuina sum chu anmahni mimal sum nge MLA/Ward/MDC fund tih erawh a tam zawkin sawi lang lo mah se, ṭanpuina inpek hrim hrim hi a hlu a. Chutih rual chuan, mipui sum (MLA/Ward/MDC Fund) aṭanga ṭanpuina an pe a nih chuan a petu tan hmingṭhat lak tum kher erawh thil ṭul ber a ni lova, mipuiin an mahni sum, an chan tur dik tak an hmu-ah a ngaih theih zawk a. A petute hian thil ropui tak an ti a ni hran lo a ni!

Ṭanpuina han sawi takah chuan mahni ṭhahnem­ngaihnaa midang ṭanpuitu leh thil ṭha ti ni-a langten thlalak saktu an lo nei hman ziah hi thil ṭha ve angreng tak niin a lang a! A chhan chu thlalak saktu nei lo se chuan an thil ṭha tih kha mipui lamin an hre thei dawn tlat lo a ni.

Engpawh ni se, kan thil ṭha tih te, mi kan ṭanpuite hi mahni tan leh kan lo lar theih nan ni lovin, ṭanpui ngaiten malsawmna an lo dawn theihna tur ni zawk se, chutiang ni lova, ṭanpui duhna rilru lam aia a petute lam an langsar zawk ṭhin a nih chuan kan thil ṭha tih kha midangten min ngaihsan phahna lam aiin, mi min hmuh tleu phahna a ni palh ang tih a hlauhawm a. Hetiang a nih mek lai hian social media lama intarlang ve lem lo, politician leh mimal ṭhahnem tak midang tana luangchhuak an awm tih erawh kan hriat tel a ṭha awm a. Nikum lama hri leng vanga inkhuahkhirhna khauh tak kalpui a nih laia ṭanpui ngaite tana luangchhuak zo zaite kha hriat a nuam khawp mai.

Phut let beisei miah lova a mamawtute tan lak theih tura an in kawta buhfai hung chhuak an awm te kha hmuh a va nuam tehlul.

Samuel Lalruatsanga