PANDEMIC LEH ONLINE EXAM

Ni 1 june, 2021 atanga ni 28 june, 2021 thlengin MZU hnuaia Under Graduate Course hrang hrangte Semester Exam chu ONLINE EXAM hmangin neih a ni dawn a. Exam Dept., MZU a thuneitute fimkhur tak leh felfai takin an inbuatsaih a. Hri leng kara ruahmanna siam fimkhur a ngaih zia leh an thawhrim ziate mipui chuan kan hre kher lo ang a. Zirlai naupangte hmakhaw ngaia MZU lam hotute ruahmanna, kum hloh nei lo a zirlai naupangten an zirna an kalpui theihna tura an ruahmannate hi an fakawm tak zet a ni.

Hripui leng mek hi mahni/chhungkua a do hneh ngawt chi a ni lo ang bawkin, kan hma lawka online exam lo awm tur pawh hi zirlai, nu leh pa, khawtlang hruaitute nena tanrual ngai a ni a. Chhura favang buh thlirin kan hma lawk MZU Online Exam lo awm tur kaihhnawih leh tanrual kan ngaihnate i lo thlir ho ila.

1. Khua/ Veng/ YMA, VC, LLTF hruaituten kan hriatpui a ngai:

Online Exam hian ken tel tam tak a nei a- internet signal chak leh tha, kawlphetha (current) tha leh hri len lai a nih avanga inkaihhruaina zawm ngai a awm bawk a. Naupangin online exam an chhang ang a, online hmanga submit a ngaih dawn hunah internet signal an veng/ khua a awm loh chuan an submit thei lo ang a. MZU lamin signal a that loh chuan signal awmna veng khua ah pawh kal mai tur an ti a, VLTF/ LLTF lamin sawrkar thu chhuak angin veng/ khaw pawn chhuah an lo khap bur ve thei a. Tuboh leh dolung inkarah zirlai naupangte rilru hreawm takin an awm thei a. An submit loh chuan semester khat chhunga an zir lai kha a thlawnin a luang ral dawn a. Chuvangin, June thla zirlai exam nei an awm chhung chu kan veng/ khua ah zirlaite tana ngaihtuahna kan sen a, hmalak a tha awm e. Kan veng/ khua-ah Internet service provider-te current awmloh ruala signal tawp mai thin awmna khua kan ni em, current awmloha signal a awmlo a nih chuan a aiawh chawmtu generator lo ruahmanpui a, zirlai online exam turte harsatna tur su kiang tur zawnga hma la turin inbuatsaih a tha hle ang.

Aizawl veng thenkhat College Veng angah te chuan YMA hmalakna in Help Desk an buatsaih a. Pu Vanlalhlana MLA pawhin University exam tur a bial veng chhung thlan bikte tan Paper an mamawh ang a sem vek dawn bawk a. ZONET (FTTH) lamin Aizawl khaw chhung bikah Project Academia kalpuiin, internet a thlawna pawh (connection) tih theihna an kalpui bawk a. Hetiang hian tanrual a tha khawp ang.

2. Nu leh pa, chhungkaw mawhphurhna:

Exam Dept.MZU ruahmanna ang chuan Zirlai naupangte hian hri len hma a exam thin dan question pattern in an exam ang a, exam rei hun chhung leh zawhna kalphung pawh a ngai vek a ni ang. Thil thar ni ta ber tur chu, hri len hma a class room-a zirtirtute venna hnuaia exam an chhang a, an thiamna tak tak hmanga an chhanna ang kha kalpui theih dawn ta lo a ni. Thil thar ni ta chu – Nu leh pa te in fa te tan college zirtirtute aiawhin exam vengtu (invigilator) in ni ta a ni.

Dik tak, entawnlo a exam hmachhawn tura i fate in duh chuan in fate exam kha nangmahni ngeiin in veng thei a, hripui hian in fate exam ngei vengtu ni turin a ruat che u. In vannei a, in fate zirna, an thiam tak tak leh thiam tak tak loh a hmun ah, nangmah ngeiin i enpuiin i veng thei ta e. Zirtirtute kuta an awm loh avanga an entawn tura kan fate kan ngai ngawt a nih chuan inenfiah kan ngai hle ang.

Dikna, rinawmna keimahni in chhung atang theuhin fate zirtirna hun practical class hripui hian min rawn buatsaih sak e. Naupang chang an ni lo a, nu leh pa te pawhin exam kan hmachhawn ve tih i hria ang u. MZU in online exam a buatsaih hi a bu en a exam (open book exam) a ni lo a. Exam dan kalphung a la pangngai reng a, a bu enlo a exam tur a ni e. Zirlai naupang thenkhat nu leh pa te thudik tawk lo hrilh a, entawn a exam tura kal khawm an awm thin a, khatiang kha exam dan bawhchhiatna leh dan phal loh a ni tih kan hre reng dawn nia.

3. Zirlai naupangte u:

I dawhkanah i keu mai theih turin zirlaibu leh exam chhanna tur a awm reng a, i en duh loh khan nangmah leh nangmah i intanpui a, mi zahawmah i insiam a ni. I dawhkanah eiruk mai theih tur file chin fel ngai a lokal hunah zirlai i nih lai atanga dik taka i exam tawh avangin eiru lo tur leh dik taka tih theihna tur a chakna i nei dawn a ni.

Vengtu awmloh avanga i entawn a, tha taka i chhang a nih pawhin lemchang i ni a, nangma hmakhua i ti chhia a, nangmah ngeiin nangma hmakhua i tichhia a, nangma pawi i sawi a nih tih i hre reng dawn nia. Tunlai khawvel ah hna hmu turin thiamna tak tak neih a ngai tawh a. BA, B.Com., B.Sc., BCA etc i pass chhuah hunah hna zawngin i exam dawn a. UPSC/ MPSC/ SSC etc exam i hmachhawn hunah i thiamna tak tak hmang turin zawhna chi hrang hrang i hmachhawn dawn a. Chung exam-ah chuan entawna exam theih a ni dawn lo a, i college kal laia i thiamna khawlkhawm, taima taka i chhiar leh zir kha i hlawhtlin pui tur a ni.

Vengtu awmloh vanga online exama entawn a mark sang tak hmu a, a tlukpui thiamna (equivalent knowledge) i neih leh si loh chuan a rukin i la zak dawn a, i marksheet leh certificate kha eizawnna tlak ngeiin nangmah khan i siam a ngai zawk a ni. Chumi ti thei turin duhthlanna tunah hian in nei a, dik takin, rinawm takin, i thiamna hmang ngeiin online exam hi hmachhawn rawh le.

I thiante exam la thutak (serious) lo leh entawn pawh an awm mai thei a. Nu leh pa leh chhungte pawhin an enpui loh zalen taka thiante nena exam khawm an awm a nih pawhin, an zingah tel lo ngam ang che. Khawvela mi hlawhtling kan tih te, tuna Mizoram sawrkara officer lian leh entawn tlak tak tak te hi a hunlaia lehkha an zir nasat leh rual pawl loh ngam avanga vawiin mi hlawhtling ni ta an ni.

Rilru put hmang dik, principle nei Zirlai ni tlat ang che. Kum 5 a lo vei leh ang a, in thlen chin a insan hleih viau ang. Zirlai i nih lai atang khan “Ka eiru lo ang” “Ka entawn lo ang” ti ngam zirlai ni la, hmuingilna leh malsawna i nunah a lo luang lut mai dawn a ni.

Thu tlangkawmna:

Mizorama College awmna hrang hrang en ila, Aizawl leh District capital an ni deuh vek a. Hri len avangin hostela awm zirlai naupang thingtlang atanga kal te mahni khaw lamah an haw a ngai lo thei lo a. Chung zirlaite chu Mizoram khaw hrang hrang chhak leh thlang chhim leh hmar heng - Niawhtlang, Cheural, Farkawn, Bairabi, Vairengte, Mimbung, Khawkawn atangin exam an chhang dawn a. Khawpui leh thingtlang hmasawna kai rual lo rah chhuah internet connectivity harsatna avangin zirlai tam takin harsatna an tawk leh ngei dawn a. Kan veng/ khua ah Zirlai naupang harsatna tawkte tanpui theitu ni turin inbuatsaih theuh tum ila a tha awm e.

Dr. Zonunmawia, PUC