Laboratory pakhat lek kan nei
Hman nia Vanglaini lama Lal Thasanga article rawn ziah, 'RT-PCR hmanga endikna laboratory neih zat' tih chhiar khan Covid-19 dona kawngah hian kan sorkar hi kan fak kan fak hlawm laiin (lei pawh hi a faktu ka ni ṭhin) ka demna lian tak chu laboratory pakhat chiah kan lo la nei hi a ni.
Keini lo ngaih ve dan mawl takah chuan District tina CM Relief Fund hmanga mipui thawh khawm hmanga an lei True-Nat khawl an bun fel kha chuan District tinah hian laboratory ṭha kha kan lo nei kim tawh emaw kan lo ti a, a lo ni aw zawng si lo. RT-PCR hmanga hri endik theihna hi hmun khatah lek kan lo la nei chu niin, hei hi chu sorkar chak loh vang liau liau a ni tlat a, kan hri dona kawngah hi chuan ṭan lak thar leh a ngai a nih hi mawle.
Mi mawl leh mi vantlang (layman) lam pawhin kan lo hriatthiam ve chu Covid-19 dona kawnga thil pawimawh ber pakhat chu hri endik testing hi a ni an ti a, test dan hrang hrang awm zingah RT-PCR chu a rin tlak deuh ber a ni.
Chu khawl chu sorkar lam hotute sawi danin pali a function mek a, khawl pali zinga pathum hi pek khawm (Mimal donation, ICMR donation & UNICEF donation) a la ni ta deuh deuhva, khawl hmanga endikna hmun laboratory chu pakhat chiah kan sorkar hian a la din thei hi kum khat chhunga hmalakna a tlem avangin fak theih an ni ta lo a ni.
Laboratory hi siam a harsa viau nia an sawi kha kan awih hman tehlul nen Nagaland sorkar mai maiin laboratory pathum an nei thei tlat a, chuvangin nikuma sorkar lam ṭang ṭhenkhatin RT-PCR Laboratory siam harsatzia an sawi chiam mai kha chu chhuanlam mai mai a lo ni tih Nagaland hian an tichiang a ni ber e. Arunachal Pradesh pawhin hetiang laboratory hi pahnih an nei a, Manipur-ah phei chuan panga a awm nei tih article ah khan kan hmu a ni.
Hripuiin nasa taka min beiha eizawnna tam tak khar sak kan nih laia sorkar berin laboratory pakhat chiah (India rama nei tlem ber zingah kan tel, nei lo an awm lova pakhat nei hi nei tlem ber kan ni) min siam sak hi chu a fair lo viau a ni. Test tam zawk kan mamawh a ni.
Vanlalfela