SOCIAL MEDIA INFLUENCER (FB/ INSTA/YOUTUBE MI LAR)

Fb a ni emaw, YouTube a ni emaw, Instagram a ni emaw, talent hranpa nei lo, follower ngah riau an awm a. Chung ho chuan eng thil thil emaw an ti a. A chang leh an insiam chhia a, a chang leh an ṭawng zuap zuap a, an chang leh an vawih a; an thlalak ruak keng kung, an thlalak mak pui pui an post a, an khawi ilo kalna, an hmun leh lo ram tlawh an post a. Follower, likes leh subscribers an han ngah khan, sum siam dan ngawt an zawng ta ṭhin.

Tutu emaw hnenh, “I product, i works ka lo fak sak ang che, cheng chuti zah min pe la”, te an han ti a. I hotel, i huan, i dawr ka lo fak ang, i kawr ka lo ha ang, ka lar a nia, chuti zah chu min pethung la, te an ti a. Chung ho thanga awk tawh chu Mizo zingah hian kan awm em ka hre chiah lo. Hman deuh khan Mizo social media influencer pakhat tlangval nula tak mai leh mi dang inchhanna kha chu ka hmuin ka hria. Sumdawnna emaw, mihring class deuh ho chuan, ‘tiang ho hi chang fek fawk takin an chhang thla fo mai.

Hotel changkang tak pakhat pawhin, social media influencer pakhat chu, “Hna thawk la, thawkrim zawk mai rawh” tiin an chhang fawk nghe nghe a. Chumi social media influencer ai chuan hotel chuan social media follower an lo ngah daih zawk zui leh nghal a.

Mi tak tak, thil tak tak hian social media influencer hi an mamawh lutuk hran lo. Anni ho hi a thlawna mi thil neih tum, an thawhrim rah ni miah loa hlawkna lo tel tum an ni ṭhin. Rim taka hnathawk i nih chuan, mi tak takin i thawhrim rah an rawn hmuh hunah an hlut ang che. I kuthnute mipui hnena thlen dan kawng zahawm zawk a awm ṭhin a ni. Talent nei tak tak chinte chu chet dan hi chu thuhran a ni a. Talent nei tak tak chinte’n social media-a an thil post leh social media Influencer kan tih ang tam zawkte thil post dinhmun hi chu a inang lo a ni.

An zah theih loh avang leh an hman em em avanga influencer han nite hi i mamawh hran lo a. Hetiang ho chawimawi leh fak vanga i sumdawnna kha ṭha sawt tur a ni lem lo. Followers maktaduai 10 tal an nei te a nih ngawt loh chuan. Influencer-ah hian, mi tak tak, talent tak tak nei, an sulhnuin mi rilru a thlak danglam theihte chu an awm teh meuh mai a, chutiang mite thliar hran chu a har teh chiam lo.

Politiciante tan pawh invenna tak tur a niin a lang. Politician ṭhenkhat, limelight zawng riau an awm fo a. He’ng ho hian nuihzatthlakah an chhuah hlauh palh mai ang tihte pawh thil hlauhawm tak a ni zawk a ni.

An nungchang, an thiamna, an theihna leh miin an zahin a sawi an awih nge, an bawl luih luih tihte pawh hi fiah a ṭha a. “Like At” natna hi vei theih viau a nia. Miin an like/ follow nasat avanga pawimawh ta riau a inhria, mi ngaih pawimawh pawh phut zui ta bawk hmuh tur an awm zauh zauh mai.

Lar khelhna khawvelah hian, like at natna vei an tei suau suau ta mai. Pathian rawngbawltute zingah pawh, You Tube channel nei, ‘rate’ nei, designer ho thui thawmhnaw ha bik riau, an chet velna pawha inngaihlu riau mai hmuh tur an awm ta fo mai. Chutiang kara, thinlung leh tih tak zeta Lalpa fakna hla sa a, Kum khata vawikhat pro pic pawh thlak chauh ṭhin rawngbawltu an lo la awm ve mek bawk a, rilru an ti hahdam ru riau ṭhin. Mihring lama hlutna zawngtute chuan, Lalpa ropuina an puangchhuak zo ṭhin lo. Lal Isua mawina zawngtute chauhin, mawina tak tak an hlawh chhuak ṭhin a ni.

Kan han kalpeng zuai a, duh ang zawng pawh sawi zo chiah loin duhtawk dawn ang. Talent nei lo, an zahtheih loh avanga social media zuitu ngahte hi I mamawh lem lo a. Melh kan rawh, i sum ei an tum ngat phei chuan, hnawl rawh.

F Vanlalrochana