KAWNG HMANG NEIIN AW

Hlawhtling tur hian taihmak te, hrát lák te, tum ruh te, beih vak te, beidawng lo va um ngar ngarte hi a pawimawh zia kan sawi ṭhin. Ni e, hêng tel lo hian a hlawhtlin tak tak theih loh. Mahse, he kan chênna khawvelah hian thil hi a awm chikim ve khawpa, awmze nei lo leh sâwt lova taihmak chiam te, beih hah chiam te, ûm hah chiam te hi a la awm thei leh ta zel mai!

"Lehkha a zir nasa sia, a pass thei si lo va, a khawngaihthlak asin aw!"

"A thawk nasa sia, mahse a thar tlêm thei sia, a khawngaihthlak tak tak..."

"Nitin a feh chhuak ve ziah a, mahse a thlai te beisei angin an ṭha thei lo va, hawn tur a nei ngai lem hlei lo va..."

"A hriat chu a hria mawle, a zir pawh a zir nasa, a beih pawh a bei nasa, mahse engmah thawk lovin a awm vel ta mai mai a nih hi..."

Hêng thute hian thinlung a hliam a, rilru a tihnual ṭhin a, lainatna leh khawngaihna chhungrilah alo chhuak leh ṭhin. Ni e, kan taihmak dan te, kan thawhrim dan te, kan hnathawh dan te hi kawng hmang leh awmze nei a ngai ve bawk a ni. Mi â hnathawh chiam chiam a hlâwk si lo te hi a awm ve thei a. Kan hah thlâwn ve thei bawk. Hei tak hi mi tam tak hlawhchhamna leh beidawnna thlentu a ni fo. "Ka bei nasa tawh, ka ti nasa tawh, kan thawk nasa tawh, engmah a ang thei lo" tih hi kan hmâwr bâwkna a ni leh fo ṭhin.

Tunah chuan mi kan fing ta deuh deuh a, zirna lamah pawh hmânlai deuha Arts subject lák dual dual ang chi te, ṭhiante kalna lama kal ve leh tawp mai ang chi te kha zawi zawiin kan hransan ta hret hret a. Mahni tuina zâwn te, kan hlawhtlin theih dan tur te uluk deuh zâwkin kan zir chiang a, ruahmanna kan siam a, awmze nei leh kawng hmang nei zawkin mi tam tak chu kan kal thiam ta. Tha sên inang rau rauah midangte hlawhchhamnaah hian a hlawhtlin theih tih kan hre thiam ta tial tial.

Awmze nei lova beih hah vak te, sâwt si lova thawh hah chiam chiamte hi hun leh tha a uihawm a, kan hun hloh tawh neih lêt leh ngawt theih a ni bik si lo va, chuvangin hlawhtling tur pawh hian ruahmanna fel tak neih a, kawng hmang nei leh awmze nei zawka thawhrim leh taihmak hi a sâwt leh zual bik êm êm a ni. Thiam bulfuk leh thiam bik êm êm nei lova thiam kual deuh ṭhum, eizawnna tling tak tak si lova khawih kual vak hi ṭhatna chu awm ve tho mahse a hlâwk lo deuh zawk em? Sap hovin 'Jack of all trades, but master of none' an tih ang chi, thiam tak tak nei lova thiam kual deuh dum ang chi hi tunlai khawvelah chuan a hlâwk vak tawh lo niin a lang deuh tlat a.

Kan khawvel a changkang a, mi thiam leh thluak ṭha kan ngah tial tial a, inelna a sâng tial tial a, thawkrim leh taima rau rau tân pawh hlawhtlinna chan a harsa ve tial tial zel dawn.

Chuvangin, hlawhtlin kan tum danah pawh hian kawng hmang nei leh awmze neia ngaihtuahna kan sên thiam deuh deuh a pawimawh ta ngawt mai.

PC Nghaklianmawia